VPC ꤢ꤬ꤚꤤ꤬ꤢ꤬ꤊꤛꤢ꤭
ꤠꤤ꤬ꤒꤥ꤭ꤚꤤ꤬ꤛꤢ꤬ ꤊꤜꤛꤢꤊꤜꤥ꤭ ꤜꤤ꤬ꤙꤢ꤬ꤘꤛꤢꤩꤗꤢ (VPC) ꤗꤢ꤬ ꤜꤤ꤬ꤙꤢ꤬ꤘꤛꤢꤩꤗꤢ ꤢ꤬ꤞꤢꤧ꤬꤭ ꤘꤣ ꤢ꤬ꤥ꤬ꤕꤢ꤬ ꤒꤟꤣꤜꤟꤢꤪ꤭ꤚꤢꤪ ꤢ꤬ꤒꤥ꤭ꤢ꤬ꤙꤢꤧ꤬ ꤒꤣ꤬ꤡꤣ꤬ ꤕꤚꤢꤧ꤯
ꤢ꤬ ꤘꤛꤢꤩꤒꤟꤢ꤭ ꤜꤤ꤬ꤙꤢ꤬ꤤ꤬ꤞꤝꤥ ꤘꤣ ꤢ꤬ꤒꤥ꤭ꤞꤢꤧꤕꤜꤢꤪ꤬ ꤒꤣ꤬ꤡꤣ꤬ ꤔꤢ ꤒꤟꤢꤧ꤬ꤒꤢ꤬ꤓꤝꤥꤒꤢ꤬ꤏꤛꤢ꤬ꤡꤝꤟꤥ ꤕꤟꤥ ꤘꤣ ꤔꤟꤢꤧ꤬ ꤑꤢꤩ꤭ ꤞꤛꤢꤖꤢꤨ ꤊꤢꤦ ꤗꤟꤢꤩ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤒꤟꤢꤧ꤬ꤡꤟꤛꤢꤒꤟꤢꤧ꤬ꤘꤢꤧ꤬ ꤘꤣ ꤢ꤬ꤒꤥ꤬꤭ꤢ꤬ꤙꤢꤧ꤬ꤔꤢ- ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤒꤢ꤬ꤟꤢꤩ꤬ ꤔꤢ ꤒꤟꤢꤧ꤬ꤗꤟꤢꤩ꤬ꤡꤟꤛꤢ ꤘꤣ ꤔꤟꤢꤧ꤬ ꤜꤥ꤬ꤙꤢꤧ꤬ ꤔꤢ ꤜꤟꤢꤩ ꤗꤟꤢꤩ꤬ꤙꤢꤧꤓꤛꤢ꤬ ꤔꤌꤣ꤬ ꤕꤚꤢꤧ꤯
ꤢꤧꤒꤢ꤬ꤊꤤ꤬ ꤗꤢ꤬ ꤢꤨ꤭ ꤗꤟꤢꤩ꤬ꤕꤜꤢꤦꤗꤟꤢꤩ꤬ꤓꤌꤣ꤭ꤊꤛꤢ꤭ VPC ꤙꤤ 11 ꤔꤢ꤬ ꤔꤢ 12 ꤔꤢ꤬ꤔꤌꤣ꤬, ꤗꤢ꤬ꤔꤢꤚꤢꤪ ꤢ꤬ꤒꤥ꤭ꤢ꤬ꤙꤢꤧ꤬ ꤕꤚꤢꤧ ꤖꤢꤨꤔꤌꤣ꤬ꤚꤢꤪ ꤡꤢꤓꤛꤢ꤬ꤚꤟꤢꤩꤊꤛꤢ꤭ ꤢꤧ꤬ ꤗꤟꤢꤒꤥ꤬ꤚꤢꤪ ꤗꤟꤢꤩ꤬ꤕꤜꤢꤦꤗꤟꤢꤩ꤬ꤓꤌꤣ꤭ ꤔꤥ꤬ꤑꤟꤢꤩ꤭ꤊꤜꤢꤪ꤭ ꤢꤧ꤬ 2 ꤔꤢ꤬ꤜꤣ ꤕꤚꤢꤧ꤯ ꤒꤟꤢꤧ꤬ꤤ꤬ꤞꤝꤥ꤬ꤤ꤬ꤞꤛꤢ꤬ ꤔꤌꤣ꤬ ꤢꤨ꤭ ꤒꤢ꤬ꤚꤤ꤬ꤒꤢ꤬ꤚꤛꤢ꤬꤭ꤥ꤬ ꤢꤧ꤬ ꤞꤛꤢꤖꤢꤨ ꤢꤨ꤭ ꤊꤢꤦ ꤔꤟꤤꤙꤢꤧ꤬ ꤚꤛꤢꤜꤣꤊꤟꤢꤪ꤭ ꤢ꤬ꤒꤟꤥꤔꤢ VCE ꤔꤢ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤔꤌꤣ꤬ ꤕꤚꤢꤧ꤯ ꤔꤟꤢꤧ꤬ ꤕꤟꤢꤨ꤭ꤞꤢꤧꤑꤢꤩ꤭ ꤒꤢ꤬ꤒꤢꤪ꤬ ꤡꤟꤛꤢ VPC ꤔꤢ ꤔꤟꤢꤧ꤬ꤔꤟꤢꤩ ꤔꤟꤤꤘꤢꤦ꤬ ꤕꤚꤢꤧ ꤚꤢꤪ ꤔꤟꤢꤧ꤬ ꤕꤚꤟꤢꤧ꤬ꤤ꤬ꤞꤛꤥꤤ꤬ꤞꤛꤢ꤬ ꤒꤢ꤬ꤟꤢꤩ꤬ ꤊꤢꤦ ꤗꤛꤢꤒꤟꤢ꤭ꤗꤛꤢꤒꤟꤢꤩ꤬ ꤕꤢꤩ ꤔꤟꤢꤧ꤬ ꤒꤟꤢꤧ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤘꤤ꤭ꤒꤢꤦꤔꤢ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤊꤟꤢꤨꤊꤟꤢꤚꤟꤢꤨꤚꤟꤛꤢ꤬ ꤘꤣ ꤢ꤬ꤗꤛꤢꤩ꤭ꤗꤛꤢꤩ꤭ꤢ꤬ꤡꤣ꤬ꤡꤣ꤬ ꤒꤢ꤬ꤟꤢꤩ꤬ ꤕꤢ꤭꤯
ꤔꤟꤢꤧ꤬ ꤞꤝꤥꤜꤤ꤬ꤟꤥ꤭ ꤊꤢꤦ ꤕꤜꤝꤥ꤭ ꤔꤟꤢꤧ꤬ ꤘꤣ ꤔꤟꤢꤧ꤬ ꤊꤢꤦꤢ ꤡꤢꤓꤛꤢ꤬ꤗꤟꤢꤩ꤬ VPC ꤙꤤ ꤏꤛꤣꤋꤢꤧ꤭ ꤙꤢꤪꤋꤢꤧ꤭ꤒꤢꤩ꤭꤮ ꤙꤢꤧ꤬ꤙꤢꤧ꤬ ꤘꤣ ꤞꤝꤥꤜꤤ꤬ꤟꤥ꤭ ꤢ꤬ꤔꤢ꤬ꤢ꤬ꤜꤢꤧ꤬꤭ ꤊꤢꤨ꤭ꤔꤌꤣ꤬ ꤕꤚꤢꤧ꤯ ꤏꤛꤣꤋꤢꤧ꤭ ꤘꤣ ꤔꤟꤢꤧ꤬ ꤗꤟꤢꤩ꤬ꤕꤜꤢꤦꤗꤟꤢꤩ꤬ꤓꤌꤣ꤭ꤊꤛꤢ꤭ VPC ꤔꤌꤣ꤬ꤗꤢ꤬ ꤢ꤬ꤒꤥ꤭ꤢ꤬ꤙꤢꤧ꤬ ꤕꤚꤢꤧ꤯
ꤔꤟꤢꤧ꤬ ꤒꤥ꤭ꤊꤢꤪ꤬ ꤟꤢꤩꤙꤢꤧ꤬ꤘꤣꤑꤢ꤭ VPC ꤢ꤬ꤒꤟꤢꤧ꤬ꤒꤟꤢ꤭ꤒꤥ꤭ꤒꤟꤢꤧ꤬ꤙꤢꤧ꤬ ꤘꤣ ꤔꤟꤢꤧ꤬ ꤑꤢꤩ꤭ ꤔꤢ ꤔꤟꤢꤧ꤬ ꤞꤝꤥꤜꤤ꤬ꤟꤥ꤭ ꤔꤢ ꤔꤟꤢꤧ꤬ ꤟꤤ꤬ꤖꤢꤨꤖꤛꤢ꤭ꤖꤢꤨ ꤢ꤬ꤑꤢꤩ꤭ ꤕꤢ꤭꤯
VPC ꤗꤢ꤬ ꤢ꤬ ꤖꤛꤢꤩꤒꤢ꤬ꤕꤜꤢꤩ꤬ꤞꤢꤧ꤭ꤊꤛꤢ꤭ VCAL ꤒꤟꤢꤧ꤬ꤋꤢ꤭ꤏꤛꤢꤩꤋꤢ꤭ꤚꤟꤛꤢ꤬ ꤋꤢ꤭ꤜꤟꤢꤩ ꤟꤢꤪ꤯
ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤔꤝꤥꤖꤛꤢꤩ ꤘꤣ VPC ꤒꤢ꤬ꤟꤢꤩ꤬
ꤔꤟꤢꤧ꤬ VPC ꤊꤢꤦ ꤙꤢꤩ꤬ꤔꤟꤌꤣ꤬꤭ꤥ꤬ꤕꤢ꤬:
- VPC ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬ (ꤗꤟꤢꤒꤥ꤬ꤚꤢꤪ VCE ꤜꤤ꤬ꤊꤢꤨ꤭ꤜꤢ꤭ ꤒꤟꤢꤧ꤬ꤔꤝꤥꤖꤛꤢꤩ ꤒꤢ꤬ꤟꤢꤩ꤬ ꤞꤛꤢꤔꤢ VCE VM ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬)
- VPC ꤜꤤ꤬ꤡꤟꤛꤢꤘꤛꤢꤗꤢꤒꤥ꤭ (ꤗꤟꤢꤒꤥ꤬ꤚꤢꤪ VCE ꤜꤤ꤬ꤕꤟꤢꤨ꤭ꤞꤢꤧꤑꤢꤩ꤭ꤗꤢꤒꤥ꤭ ꤒꤟꤢꤧ꤬ꤔꤝꤥꤖꤛꤢꤩ ꤒꤢ꤬ꤟꤢꤩ꤬ ꤞꤛꤢꤔꤢ VCE VM ꤜꤤ꤬ꤡꤟꤛꤢꤘꤛꤢꤗꤢꤒꤥ꤭)
- VPC ꤒꤟꤢꤧ꤬ꤡꤟꤛꤢꤘꤢꤧ꤬ ꤘꤣ ꤢ꤬ ꤤ꤭ꤡꤢꤦ꤭ ꤔꤢ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤒꤢ꤬ꤟꤢꤩ꤬
- VPC ꤒꤟꤢꤧ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤔꤟꤤꤘꤢꤦ꤬ꤒꤣ꤬ꤕꤚꤟꤢꤧ꤬ ꤒꤢ꤬ꤟꤢꤩ꤬
- ꤔꤢꤪ꤭ꤢꤩ꤬ ꤢ꤬ꤏꤛꤣꤢ꤬ꤋꤢꤧ꤭ ꤒꤢ꤬ꤊꤤ꤬ ꤘꤣ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤊꤢꤨ꤭ ꤞꤛꤢꤔꤢ ꤔꤟꤢꤧ꤬ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤣ꤬ꤊꤛꤢꤩ꤭꤯ ꤛꤢꤩ꤭ ꤗꤢ꤬ ꤞꤢꤧꤑꤢꤩ꤭ꤢꤧꤘꤢꤦ꤬ ꤔꤢ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤋꤢ꤭ꤜꤟꤢꤩ ꤒꤟꤢꤧ꤬ꤤ꤬ꤏꤢꤪꤓꤛꤢ꤬ꤔꤌꤣ꤬ ꤕꤚꤢꤧ꤯
ꤔꤟꤢꤧ꤬ ꤙꤢꤩ꤬ꤔꤟꤌꤣ꤭ꤕꤟꤥꤊꤌꤣ꤭ VCE ꤗꤟꤢꤒꤥ꤬ꤚꤢꤪ VCE VM ꤒꤟꤢꤧ꤬ꤔꤝꤥꤖꤛꤢꤩ ꤒꤢ꤬ꤟꤢꤩ꤬, ꤗꤟꤢꤒꤥ꤬ꤚꤢꤪ ꤔꤝꤥꤖꤛꤢꤩ ꤞꤛꤢꤖꤢꤨ ꤊꤢꤦ ꤙꤢꤩ꤬ꤔꤟꤌꤣ꤭ꤥ꤬ꤕꤢ꤬ꤔꤟꤤ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤘꤣ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤔꤢ ꤒꤟꤢꤧ꤬ꤤ꤬ꤞꤝꤥꤒꤥ꤭ (VET) ꤘꤣ VPC ꤢ꤬ꤊꤢꤨ꤭ꤔꤌꤣ꤬ ꤕꤚꤢꤧ꤯ ꤤ꤬ꤞꤝꤥꤤ꤬ꤞꤛꤢ꤬ ꤢꤧꤓꤛꤢ꤬ꤕꤟꤥ VET ꤢ꤬ꤚꤤ꤬ꤢ꤬ꤊꤛꤢ꤭ ꤘꤣ ꤠꤤ꤬ꤒꤥ꤭ꤚꤤ꤬ꤛꤢ꤬ ꤊꤜꤛꤢꤊꤜꤥ꤭ ꤜꤤ꤬ꤙꤢ꤬ꤘꤛꤢꤩꤗꤢ ꤢ꤬ꤊꤢꤨ꤭ꤔꤌꤣ꤬꤯
ꤔꤟꤢꤧ꤬ ꤕꤚꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤗꤟꤢꤒꤥ꤬ꤚꤢꤪ ꤕꤚꤟꤢꤧ꤬ꤘꤛꤢꤩꤡꤛꤢ꤬ꤘꤛꤢꤩꤑꤢ꤬ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤔꤌꤣ꤬ ꤢ꤬ ꤊꤢꤦ ꤗꤟꤢꤩ꤬ꤓꤛꤢ꤬ꤓꤢꤨ꤭ꤓꤛꤢ꤬ꤡꤝꤟꤥ ꤔꤟꤢꤧ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤒꤣ꤬ꤡꤣ꤬ ꤘꤣ ꤢ꤬ꤒꤥ꤭ꤢ꤬ꤚꤟꤢꤧ꤭ꤔꤢ ꤔꤟꤢꤧ꤬ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤜꤥ꤬ꤙꤢꤧ꤬ ꤒꤢ꤬ꤟꤢꤩ꤬ ꤔꤢ ꤒꤟꤢꤧ꤬ꤒꤥ꤭ꤞꤢꤧꤕꤜꤢꤪ꤬ ꤔꤟꤢꤧ꤬ ꤔꤌꤣ꤬ ꤒꤢ꤬ꤟꤢꤩ꤬ ꤕꤢ꤭꤯
VPC ꤔꤌꤣ꤬ ꤢ꤬ ꤢꤧꤡꤛꤣꤔꤟꤤꤡꤟꤛꤢ ꤔꤟꤢꤧ꤬ ꤙꤤꤒꤢꤩ꤭
ꤊꤤ꤬ ꤔꤟꤢꤧ꤬ ꤒꤢ꤬ꤜꤟꤛꤢꤩ꤬ꤊꤛꤢ꤭ ꤢꤧꤜꤢ꤭ ꤞꤝꤥꤜꤤ꤬ꤟꤥ꤭ ꤗꤟꤢꤒꤥ꤬ꤚꤢꤪ ꤔꤟꤢꤧ꤬ ꤒꤟꤢꤧ꤬ꤜꤥ꤬ꤙꤢꤧ꤬ ꤕꤟꤥ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤢ꤬ꤟꤢꤩ꤬ ꤊꤤ꤬ꤥ꤬ ꤟꤢꤩꤚꤢꤪ, VPC ꤔꤌꤣ꤬ ꤢ꤬ ꤊꤢꤦ ꤗꤟꤢꤩ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ꤡꤝꤟꤥ ꤔꤟꤢꤧ꤬ ꤘꤣ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬, ꤢ꤬ꤒꤟꤥ ꤔꤟꤌꤣ꤭ ꤘꤣ TAFE, VET ꤗꤟꤢꤒꤥ꤬ꤚꤢꤪ ꤜꤟꤢꤩꤔꤟꤤꤙꤢꤧ꤬ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤕꤢ꤭꤯
VPC ꤊꤟꤛꤢꤊꤜꤥ꤭ –ꤙꤚꤢ꤬ꤘꤣ꤬ ꤢ꤬ꤒꤟꤢꤧ꤬ꤡꤛꤣꤊꤜꤛꤢ
ꤙꤚꤢ꤬ꤘꤣ꤬ ꤗꤢ꤬ ꤢ꤬ꤜꤥ꤬ꤙꤢꤧ꤬ ꤒꤟꤢꤧ꤬ꤢ꤬ꤒꤥ꤭ꤢ꤬ꤙꤢꤧ꤬꤯ ꤢ꤬ ꤊꤟꤢ꤬ꤋꤛꤢꤩ꤭ ꤘꤣ ꤞꤝꤥꤜꤤ꤬ꤟꤥ꤭ ꤙꤤ ꤏꤛꤣꤋꤢꤧ꤭ꤥ꤬ꤊꤌꤣ ꤢ꤬ꤋꤢꤧ꤭ ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ ꤢ꤬ꤒꤟꤢꤧ꤬ꤋꤢꤨ꤬ꤒꤟꤢꤧ꤬ꤒꤟꤛꤢꤩ ꤢ꤬ꤚꤤ꤬ꤢ꤬ꤊꤛꤢ꤭ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤕꤚꤢꤧ꤯ ꤙꤚꤢ꤬ꤘꤣ꤬ ꤢ꤬ꤞꤢꤚꤢ ꤘꤣ ꤢ꤬ ꤤ꤬ꤞꤝꤥꤤ꤬ꤞꤛꤢ꤬ ꤔꤌꤣ꤬ ꤢ꤬ ꤟꤢꤩꤏꤥ꤬ VPC ꤢ꤬ꤚꤤ꤬ꤢ꤬ꤊꤛꤢ꤭ ꤔꤢ ꤜꤢꤨ꤭ ꤔꤢ ꤢ꤬ꤗꤟꤌꤣꤢ꤬ꤖꤢꤧ꤭꤯
ꤙꤚꤢ꤬ꤘꤣ꤬ ꤔꤌꤣ꤬ ꤢ꤬ ꤞꤢꤧꤐꤟꤢꤦ VPC ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ ꤢ꤬ ꤡꤢꤓꤛꤢ꤬ ꤔꤟꤤꤡꤟꤛꤢ ꤢ꤬ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ꤙꤤ ꤢ꤬ ꤞꤢꤧꤐꤟꤢꤦ ꤤ꤬ꤞꤝꤥ ꤢ꤬ꤋꤢꤧ꤭ꤔꤌꤣ꤬ ꤕꤚꤢꤧ꤯ ꤙꤚꤢ꤬ꤘꤣ꤬ ꤘꤛꤢ꤬ꤜꤟꤛꤢ꤬ꤞꤢꤧꤕꤜꤢꤪ꤬ ꤞꤛꤢꤖꤢꤨ ꤢ꤬ ꤊꤢꤦ ꤤ꤬ꤞꤝꤥ VPC ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤒꤢ꤬ꤟꤢꤩ꤬ ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ ꤢꤧ꤬ꤞꤤ꤭ ꤙꤢꤩ꤬ꤔꤟꤌꤣ꤭ꤥ꤬ꤕꤢ꤬ꤔꤟꤤ ꤘꤢꤪ꤭ꤖꤢꤨꤏꤥ꤬ꤖꤢꤨ ꤒꤟꤢꤧ꤬ꤚꤟꤛꤢ꤬ ꤒꤢ꤬ꤟꤢꤩ꤬ ꤚꤢꤪ ꤗꤟꤢꤩ꤬ꤚꤟꤥꤜꤢꤨ꤭ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤔꤢ ꤢ꤬ꤕꤜꤢꤪꤢ꤬ꤗꤟꤢꤨ꤬ ꤊꤢꤨ꤭ ꤒꤣ꤬ꤗꤟꤢꤨ꤬ ꤕꤚꤢꤧ꤯ ꤢ꤬ ꤖꤛꤢꤩꤑꤟꤢꤩ꤭ꤊꤟꤛꤢ ꤙꤚꤢ꤬ꤘꤣ꤬ ꤢ꤬ꤏꤛꤣꤢ꤬ꤋꤢꤧ꤭ 2 ꤔꤢ꤬ ꤜꤣ ꤞꤛꤢꤖꤢꤨ ꤢ꤬ ꤊꤢꤦ ꤗꤟꤢꤩ꤬ꤓꤌꤣ꤬꤭ꤕꤜꤢꤦꤔꤟꤤ ꤢ꤬ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤔꤌꤣ꤬ ꤕꤚꤢꤧ꤯
ꤜꤤ꤬ꤊꤢꤨ꤭ꤜꤢ꤭ ꤔꤢ ꤜꤤ꤬ꤘꤛꤢꤙꤢꤧ꤬ꤗꤢꤒꤥ꤭ ꤢ꤬ꤔꤢ꤬ 10 ꤋꤢ꤭ꤜꤟꤢꤩ ꤔꤌꤣ꤬, ꤙꤚꤢ꤬ꤘꤣ꤬ ꤤ꤬ꤞꤝꤥ VPC ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬ ꤔꤢ ꤒꤟꤢꤧ꤬ꤘꤛꤢꤙꤢꤧ꤬ꤞꤢꤧꤑꤢꤩ꤭ꤗꤢꤒꤥ꤭ ꤛꤢꤨ꤬ꤔꤤ 1 ꤔꤌꤣ꤬ ꤕꤚꤢꤧ꤯ ꤙꤤ ꤢ꤬ ꤔꤝꤥꤖꤛꤢꤩ ꤢ꤬ꤒꤟꤢꤧ꤬ꤔꤝꤥꤖꤛꤢꤩ ꤒꤢ꤬ꤟꤢꤩ꤬ ꤘꤣ 11 ꤔꤢ꤬ ꤔꤢ 12 ꤔꤢ꤬ ꤔꤌꤣ꤬, ꤙꤚꤢ꤬ꤘꤣ꤬ ꤞꤢꤧꤑꤢꤩ꤭ꤔꤢ VPC ꤗꤢ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤘꤣ ꤢ꤬ꤒꤥ꤭ ꤜꤢꤨ꤭ꤑꤢꤩ꤭ ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ ꤢ꤬ ꤜꤥ꤬ꤙꤢꤧ꤬ꤕꤢ꤭ ꤒꤟꤢꤧ꤬ꤢ꤬ꤒꤥ꤭ꤢ꤬ꤙꤢꤧ꤬ ꤔꤌꤣ꤬ ꤕꤚꤢꤧ꤯
ꤙꤤ 11ꤔꤢ꤬ ꤢ꤬ꤊꤢꤨ꤭ꤔꤌꤣ꤬ ꤢ꤬ ꤡꤢꤓꤛꤢ꤬ ꤜꤤ꤬ꤙꤢ꤬ꤘꤛꤢꤩꤗꤢ II ꤘꤣ ꤒꤟꤢꤧ꤬ꤗꤟꤢꤩ꤬ꤊꤟꤌꤣꤗꤟꤢꤩ꤬ꤋꤢ ꤕꤢ꤬ꤒꤤ꤬ꤖꤢꤨ ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ VET ꤛꤢꤩ꤭ꤔꤌꤣ꤬ ꤢ꤬ꤗꤟꤢꤩ꤬ꤐꤢꤨ꤬꤭ꤊꤜꤢꤪ꤭ ꤕꤢꤩ ꤜꤢꤨ꤭ꤑꤢꤩ꤭ ꤘꤣ ꤜꤟꤢꤩꤓꤛꤢ꤬ ꤤ꤬ꤞꤝꤥ ꤔꤌꤣ꤬ ꤕꤚꤢꤧ꤯ ꤙꤤ 12 ꤔꤢ꤬ ꤔꤌꤣ꤬, ꤙꤚꤢ꤬ꤘꤣ꤬ ꤓꤛꤢ꤬ ꤞꤝꤥꤜꤤ꤬ꤟꤥ꤭ ꤖꤢꤨ ꤕꤝꤟꤥ꤭ꤖꤌꤣ ꤔꤌꤣ꤬ ꤚꤢꤪ ꤢ꤬ ꤏꤢꤨ꤬ꤔꤟꤌꤣ꤭ꤔꤟꤤ ꤒꤟꤢꤧ꤬ꤚꤢ꤭ ꤘꤣ ꤜꤤ꤬ꤙꤢ꤬ꤘꤛꤢꤩꤗꤢ II ꤘꤣ ꤊꤜꤢꤧꤒꤢ꤬ꤚꤤ꤬ꤒꤝꤟꤥꤔꤟꤢꤩ ꤕꤚꤟꤢꤧ꤬ꤗꤟꤢꤩ꤬ꤡꤝꤟꤥ ꤥ꤬ ꤔꤌꤣ꤬ ꤕꤚꤢꤧ꤯ ꤢ꤬ ꤤ꤬ꤞꤝꤥ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤒꤟꤢꤧ꤬ꤤ꤬ꤏꤢꤪꤓꤛꤢ꤬ ꤘꤣ ꤊꤜꤢꤧꤤ꤬ꤡꤤ꤭ ꤋꤢꤨ꤬ꤜꤟꤌꤣ꤬ ꤚꤢꤪ ꤢ꤬ꤍꤟꤥꤜꤢ꤬ꤏꤢ ꤗꤢ꤬ ꤢ꤬ ꤊꤢꤦ ꤔꤟꤤꤙꤢꤧ꤬ ꤊꤚꤤꤘꤤꤗꤢ ꤘꤣ ꤢ꤬ꤒꤟꤢꤧ꤬ꤖꤛꤢꤩ꤬ꤒꤟꤢꤧ꤬ꤗꤟꤢꤩ꤬ ꤋꤢ꤭ꤜꤟꤢꤩꤘꤛꤢ꤬ꤒꤟꤢ꤭ ꤔꤌꤣ꤬ ꤕꤢ꤭꤯
ꤙꤚꤢ꤬ꤘꤣ꤬ ꤔꤌꤣ꤬ ꤢ꤬ ꤞꤢꤧꤐꤟꤢꤦ ꤒꤟꤢꤧ꤬ꤤ꤬ꤞꤝꤥꤚꤟꤛꤢ꤬ꤒꤟꤢꤧ꤬ ꤖꤢꤨ ꤕꤚꤟꤢꤧ꤬ꤤ꤬ꤡꤤ꤭ꤋꤢꤨ꤬ꤜꤟꤌꤣ꤬ ꤒꤣ꤬ꤕꤚꤟꤢꤧ꤬ ꤙꤤ ꤢ꤬ ꤓꤢꤩ꤬ꤊꤛꤢ꤭ ꤞꤝꤥꤜꤤ꤬ꤟꤥ꤭ ꤢ꤬ꤋꤢꤧ꤭ ꤕꤢ꤬꤭ ꤔꤌꤣ꤬ ꤕꤚꤢꤧ꤯
ꤙꤚꤢ꤬ꤘꤣ꤬ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤢ꤬ꤔꤢ꤬ 10 ꤒꤢ꤬ꤟꤢꤩ꤬
- VPC ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬ ꤛꤢꤨ꤬ꤔꤤ 1
- VPC ꤒꤟꤢꤧ꤬ꤘꤛꤢꤙꤢꤧ꤬ꤞꤢꤧꤑꤢꤩ꤭ꤗꤢꤒꤥ꤭ ꤛꤢꤨ꤬ꤔꤤ 1
ꤙꤚꤢ꤬ꤘꤣ꤬ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤢ꤬ꤔꤢ꤬ 11 ꤒꤢ꤬ꤟꤢꤩ꤬
- VPC ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬ ꤛꤢꤨ꤬ꤔꤤ 2
- VPC ꤒꤟꤢꤧ꤬ꤘꤛꤢꤙꤢꤧ꤬ꤞꤢꤧꤑꤢꤩ꤭ꤗꤢꤒꤥ꤭ ꤛꤢꤨ꤬ꤔꤤ 2
- VPC ꤒꤟꤢꤧ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤔꤟꤤꤘꤢꤦ꤬ꤒꤣ꤬ꤕꤚꤟꤢꤧ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 1
- VPC ꤒꤟꤢꤧ꤬ꤡꤟꤛꤢꤘꤢꤧ꤬ ꤘꤣ ꤢ꤬ꤒꤥ꤬꤭ꤢ꤬ꤚꤟꤢꤧ꤭ꤔꤢ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 1
- VET ꤜꤤ꤬ꤙꤢ꤬ꤘꤛꤢꤩꤗꤢ II ꤘꤣ ꤒꤟꤢꤧ꤬ꤗꤟꤢꤩ꤬ꤊꤟꤌꤣꤗꤟꤢꤩ꤬ꤋꤢ ꤕꤢ꤬ꤒꤤꤖꤢꤨ (ꤒꤟꤢꤧ꤬ꤗꤟꤢꤩ꤬ꤒꤟꤢꤧ꤬ꤚꤟꤛꤢ꤬/ ꤒꤟꤢꤧ꤬ꤗꤟꤢꤩ꤬ꤓꤢꤩ꤬ꤞꤢꤧ꤭) ꤛꤢꤨ꤬ꤔꤤ 1 ꤔꤢ 2
ꤙꤚꤢ꤬ꤘꤣ꤬ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤢ꤬ꤔꤢ꤬ 12 ꤒꤢ꤬ꤟꤢꤩ꤬
- VPC ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬ ꤛꤢꤨ꤬ꤔꤤ 3
- VPC ꤒꤟꤢꤧ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤔꤟꤤꤘꤢꤦ꤬ꤒꤣ꤬ꤕꤚꤟꤢꤧ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 2
- VPC ꤒꤟꤢꤧ꤬ꤡꤟꤛꤢꤘꤢꤧ꤬ ꤘꤣ ꤢ꤬ꤒꤥ꤬꤭ꤢ꤬ꤚꤟꤢꤧ꤭ꤔꤢ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 2
- VET ꤜꤤ꤬ꤙꤢ꤬ꤘꤛꤢꤩꤗꤢ II ꤘꤣ ꤊꤜꤢꤧꤒꤢ꤬ꤚꤤ꤬ꤒꤝꤟꤥꤔꤟꤢꤩ ꤜꤟꤢꤧ꤬꤭ꤜꤟꤛꤢ꤬ꤒꤣ꤬ꤕꤚꤟꤢꤧ꤬ ꤛꤢꤨ꤬ꤔꤤ 1 ꤔꤢ 2
- VET ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤘꤣ ꤢ꤬ꤒꤢ꤬ꤚꤤ꤬ꤓꤛꤢ꤬ꤗꤢ꤬ꤊꤜꤟꤢꤪ꤬ ꤛꤢꤨ꤬ꤔꤤ 1 (90ꤗꤢꤦ꤭)
Updated