ꤒꤟꤢꤧ꤬ ꤘꤣ ꤢ꤬ꤓꤢꤨ꤬ꤜꤛꤢ꤬ꤒꤢ꤬ꤊꤜꤛꤢ꤬ ꤘꤣ ꤑꤟꤢꤩ꤭ꤒꤟꤥꤒꤣ꤬ꤒꤟꤥ ꤘꤣ ꤢ꤬ꤘꤢꤨ꤬ꤢ꤬ꤕꤚꤟꤢꤧ ꤗꤢ꤬ ꤤ꤬ꤒꤢꤩ꤭ (What’s changing in senior secondary) - ꤊꤢ꤬ꤛꤢ꤭ ꤜꤟꤤ꤬ (Karenni)

ꤠꤤ꤬ꤒꤥ꤭ꤚꤤ꤬ꤛꤢ꤬ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤑꤟꤢꤩ꤭ꤒꤟꤥꤒꤣ꤬ꤒꤟꤥ ꤘꤣ ꤢ꤬ꤘꤢꤨ꤬ꤢ꤬ꤕꤚꤟꤢꤧ ꤗꤢ꤬ ꤢ꤬ ꤓꤢꤨ꤬ꤜꤛꤢ꤬ꤒꤢ꤬ꤊꤜꤛꤢ꤬ ꤕꤚꤢꤧ

ꤞꤛꤢꤖꤢꤨ ꤜꤟꤢꤩ ꤔꤟꤤꤙꤢꤧ꤬ ꤠꤤ꤬ꤒꤥ꤬꤭ꤚꤤ꤬ꤛꤢ꤬ ꤜꤤ꤬ꤙꤢ꤬ꤘꤛꤢꤩꤗꤢ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤔꤌꤣ꤬ ꤊꤜꤛꤢ ꤘꤣ ꤢ꤬ꤞꤢꤧ꤭ ꤒꤣ꤬ꤙꤥ꤭ ꤗꤢ꤬ ꤢ꤬ꤥ꤬ ꤕꤚꤢꤧ꤯

ꤋꤥ꤭ꤑꤟꤢ VCE ꤗꤢ꤬ ꤢ꤬ ꤙꤢꤩ꤬ꤔꤟꤌꤣ꤭ꤥ꤬ꤕꤢ꤬ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬, ꤑꤟꤢꤩ꤭-ꤔꤢ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤘꤣ ꤢ꤬ꤞꤢꤧ꤭ ꤘꤣ ꤢ꤬ ꤥꤑꤢ꤭ꤗꤢ꤬ ꤙꤤ VCE ꤢ꤬ꤊꤢꤨ꤭ ꤔꤌꤣ꤬ ꤕꤚꤢꤧ꤯

ꤠꤤ꤬ꤒꤥ꤬꤭ꤚꤤ꤬ꤛꤢ꤬ ꤊꤜꤛꤢꤊꤜꤥ꤭ ꤜꤤ꤬ꤙꤢ꤬ꤘꤛꤢꤩꤗꤢ ꤘꤣ ꤢ꤬ꤞꤢꤧ꤭ ꤗꤢ꤬ ꤢ꤬ꤥ꤬ ꤕꤢꤩꤊꤌꤣ꤭ ꤕꤚꤟꤢꤧ꤬ ꤘꤣ ꤢ꤬ꤜꤥ꤬ꤙꤢꤧ꤬ ꤒꤟꤢꤧ꤬ꤢ꤬ꤒꤥ꤭ꤢ꤬ꤙꤢꤧ꤬ ꤘꤣ ꤢꤧ꤬ꤞꤤ꤭ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤢ꤬ꤊꤢꤨ꤭ ꤕꤚꤢꤧ꤯

ꤒꤟꤢꤧ꤬ꤔꤝꤥꤖꤛꤢꤩ ꤘꤣ ꤢ꤬ꤞꤢꤧ꤬꤭ ꤛꤢꤩ꤭ꤒꤢ꤬ꤟꤢꤩ꤬ ꤖꤛꤢꤩꤒꤢ꤬ꤕꤜꤢꤩ꤬ꤞꤢꤧ꤭ꤊꤛꤢ꤭ ꤠꤤ꤬ꤒꤥ꤭ꤚꤤ꤬ꤛꤢ꤬ ꤜꤤ꤬ꤙꤢ꤬ꤘꤛꤢꤩꤗꤢ ꤘꤣ ꤜꤟꤢꤩꤔꤢꤪ꤭ꤢꤩ꤬ꤡꤟꤛꤢꤔꤟꤤ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤔꤢ ꤜꤤ꤬ꤙꤢ꤬ꤤ꤬ꤞꤝꤥ (VCAL) ꤘꤣ ꤢ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬, ꤚꤢꤪ ꤒꤢ꤬ꤚꤤ꤬ꤒꤢ꤬ꤚꤛꤢ꤭ꤥ꤬ ꤕꤢꤩ ꤔꤟꤢꤧ꤬ ꤔꤢ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤏꤛꤢꤩꤔꤥ꤬ꤋꤛꤢꤩ꤭ꤕꤢ꤭ ꤢ꤬ꤑꤢꤩ꤭, ꤒꤟꤢꤧ꤬ꤞꤝꤥꤒꤥ꤭ ꤘꤣ TAFE ꤗꤟꤢꤒꤥ꤬ꤚꤢꤪ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤢ꤬ꤑꤢꤩ꤭ ꤕꤚꤢꤧ꤯

VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬

VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤗꤢ꤬ ꤢ꤬ꤗꤟꤢ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ 2-ꤔꤢ꤬ ꤘꤣ ꤔꤢꤪ꤭ꤢꤩ꤬ꤔꤟꤤꤡꤟꤛꤢ ꤘꤣ VCE ꤢ꤬ꤊꤢꤨ꤬꤭ ꤒꤣ꤬ꤡꤣ꤬ ꤕꤚꤢꤧ꤯ ꤔꤟꤢꤧ꤬ ꤊꤢꤦ ꤗꤟꤢꤩ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤒꤟꤢꤧ꤬ꤞꤢꤧꤋꤢꤨ꤬ꤞꤢꤧꤑꤢꤩ꤭, ꤒꤟꤢꤧ꤬ꤞꤢꤧꤕꤜꤢꤪ꤬ꤋꤢꤦ꤭ ꤔꤢ ꤒꤟꤢꤧ꤬ꤡꤟꤛꤢꤘꤢꤧ꤬ ꤒꤢ꤬ꤟꤢꤩ꤬ ꤘꤣ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤔꤢ ꤒꤟꤢꤧ꤬ꤓꤝꤥ꤭ꤕꤚꤟꤢꤧ꤬ ꤢ꤬ꤑꤢꤩ꤭ ꤕꤢ꤭꤯ ꤢ꤬ ꤊꤢꤦ ꤒꤢ꤬ꤚꤤ꤬ꤒꤢ꤬ꤚꤛꤢ꤭ ꤔꤟꤢꤧ꤬ ꤘꤣ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬, ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤔꤢ ꤒꤟꤢꤧ꤬ꤤ꤬ꤞꤝꤥꤒꤥ꤬꤭ ꤏꤛꤢꤩ꤭ꤔꤥ꤬ꤋꤛꤢꤩ꤭ꤕꤢ꤭ ꤢ꤬ꤑꤢꤩ꤭ ꤕꤢ꤭꤯

ꤙꤤ ꤔꤟꤢꤧ꤬ ꤖꤛꤢꤩꤔꤟꤤ ꤟꤢꤪ ꤜꤤ꤬ꤙꤢ꤬ꤕꤟꤢꤩꤗꤢ ꤘꤣ ꤞꤝꤥꤜꤤ꤬ꤟꤥ꤭ ꤑꤟꤢꤩ꤭ꤒꤟꤥꤒꤣ꤬ꤒꤟꤥ ꤢ꤬ꤋꤢꤧ꤭ꤔꤌꤣ꤬, ꤔꤟꤢꤧ꤬ ꤊꤢꤦ ꤖꤛꤢꤩꤔꤟꤤꤘꤢꤦ꤬ ꤜꤤ꤬ꤙꤢ꤬ꤕꤟꤢꤩꤗꤢ ꤘꤣ ꤠꤤ꤬ꤒꤥ꤭ꤚꤤ꤬ꤛꤢ꤬ ꤜꤤ꤬ꤙꤢ꤬ꤘꤛꤢꤩꤗꤢ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ, ꤔꤢ ꤍꤟꤥꤏꤢꤨ꤬ꤜꤣꤕꤟꤥ ‘ꤒꤟꤢꤧ꤬꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬’ ꤕꤢ꤬꤭꤯

ꤊꤤ꤬ ꤔꤟꤢꤧ꤬ ꤘꤛꤢ꤬ꤘꤢꤨ꤬ꤚꤟꤢꤩꤜꤣ ꤗꤟꤢꤜꤢ꤬ꤊꤥ꤭ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤘꤣ ꤟꤢꤩ꤬ꤋꤢꤨ꤬ꤏꤤ꤬꤭ꤙꤢ꤬ ꤒꤢ꤬ꤠꤤ꤭ꤒꤢ꤬ꤠꤟꤢ꤬ ꤚꤢꤪ ꤔꤢꤪ꤭ꤢꤩ꤬ ꤗꤟꤢꤜꤢ꤬ꤊꤥ꤭ ꤒꤟꤢꤧ꤬ꤓꤝꤥ꤭ꤕꤚꤟꤢꤧ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤒꤢ꤬ꤟꤢꤩ꤬ ꤟꤢꤩꤚꤢꤪ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤗꤢ꤬ ꤒꤟꤢꤧ꤬ꤔꤝꤥꤖꤛꤢꤩ ꤘꤣ ꤢ꤬ꤘꤢꤨ꤬ꤢ꤬ꤓꤢꤨ꤭ ꤒꤣ꤬ꤡꤣ꤬ ꤕꤚꤢꤧ, ꤚꤢꤪ ꤙꤤ ꤔꤟꤢꤧ꤬ ꤞꤝꤥꤜꤤ꤬ꤟꤥ꤭ ꤕꤜꤢꤦꤓꤌꤣ꤭ꤟꤢꤪ ꤢ꤬ꤋꤢꤧ꤭ꤔꤌꤣ꤬ ꤔꤟꤢꤧ꤬ ꤜꤥ꤬ꤙꤢꤧ꤬ ꤕꤢ꤭ ATAR ꤒꤥ꤬ ꤟꤢꤪ꤯

VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤗꤢ꤬ ꤢ꤬ ꤔꤢꤪ꤭ ꤗꤟꤢꤩ ꤔꤢ ꤔꤟꤢꤧ꤬ ꤒꤟꤢꤧ꤬ꤏꤢꤨ꤬ꤘꤛꤢ꤭ꤗꤛꤢ ꤒꤢ꤬ꤟꤢꤩ꤬ ꤒꤥ꤬ ꤗꤟꤢꤒꤣ꤬ꤋꤥ꤬ꤔꤌꤣ꤬ ꤔꤟꤢꤧ꤬ ꤜꤥ꤬ꤙꤢꤧ꤬ ꤗꤟꤢꤩ꤬ ꤒꤟꤢꤧ꤬ꤓꤢꤦꤡꤟꤢꤩ꤬ꤗꤛꤢ ꤒꤟꤢꤧ꤬ꤗꤟꤢꤩ꤬ꤙꤢꤧ ꤘꤣ ꤢ꤬ꤡꤣ꤬ꤡꤣ꤬ (GAT) ꤔꤌꤣ꤬꤯

ꤟꤣ ꤢꤧꤕꤟꤥ ꤘꤣ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤯

ꤠꤤ꤬ꤒꤥ꤭ꤚꤤ꤬ꤛꤢ꤬ ꤊꤜꤛꤢꤊꤜꤥ꤭ ꤜꤤ꤬ꤙꤢ꤬ꤘꤛꤢꤩꤗꤢ

ꤠꤤ꤬ꤒꤥ꤬꤭ꤚꤤ꤬ꤛꤢ꤬ ꤊꤜꤛꤢꤊꤜꤥ꤭ ꤜꤤ꤬ꤙꤢ꤬ꤘꤛꤢꤩꤗꤢ ꤗꤢ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤘꤣ ꤢ꤬ꤒꤥ꤭ꤢ꤬ꤙꤢꤧ꤬ ꤒꤣ꤬ꤡꤣ꤬꤯ ꤢ꤬ ꤒꤢ꤬ꤚꤤ꤬ꤒꤢ꤬ꤚꤛꤢ꤭ ꤕꤢꤩ ꤔꤢ ꤞꤝꤥꤜꤤ꤬ꤟꤥ꤭ꤖꤢꤨ ꤕꤢ꤬ꤒꤤ꤮ꤕꤚꤟꤢꤧ꤬ ꤘꤣ ꤢ꤬ꤔꤢ꤬ꤥ꤬ 11ꤔꤢ 12 ꤒꤢ꤬ꤟꤢꤩ꤬ ꤘꤣ ꤢ꤬ꤚꤤ꤬ꤢ꤬ꤊꤛꤢ꤭ ꤥ꤬ ꤘꤣ ꤢ꤬ꤗꤛꤢꤩ꤭ꤗꤛꤢꤩ꤭ꤢ꤬ꤡꤣ꤬ꤡꤣ꤬ ꤚꤢꤪ ꤢ꤬ ꤤ꤬ꤞꤝꤥꤔꤟꤤꤡꤟꤛꤢ ꤟꤤ VCE ꤗꤟꤢꤒꤥ꤬ꤚꤢꤪ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤒꤥ꤬ ꤒꤢ꤬ꤟꤢꤩ꤬ ꤢ꤬ꤑꤢꤩ꤭ ꤕꤚꤢꤧ꤯

ꤢ꤬ ꤊꤢꤦ ꤒꤢ꤬ꤚꤤ꤬ꤒꤢ꤬ꤚꤛꤢ꤭ ꤕꤢꤩ ꤔꤟꤢꤧ꤬ ꤘꤣ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤑꤢꤩ꤭, ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤔꤢ ꤒꤟꤢꤧ꤬ꤤ꤬ꤞꤝꤥꤒꤥ꤭ ꤏꤛꤢꤩꤔꤥ꤬ꤏꤛꤢꤩꤋꤛꤢꤩ꤭ ꤢ꤬ꤑꤢꤩ꤭ ꤕꤢ꤭, ꤥ꤬ꤕꤢ꤬ꤒꤟꤣꤊꤌꤣ꤭ VCE꤯

ꤊꤤ꤬ ꤠꤤ꤬ꤒꤥ꤭ꤚꤤ꤬ꤛꤢ꤬ ꤊꤜꤛꤢꤊꤜꤥ꤭ ꤜꤤ꤬ꤙꤢ꤬ꤘꤛꤢꤩꤗꤢ ꤔꤌꤣ꤬ ꤢ꤬ꤒꤥ꤭ ꤘꤣ ꤔꤟꤢꤧ꤬ ꤑꤢꤩ꤭ ꤟꤢꤩꤗꤢ꤬ ꤔꤟꤢꤧ꤬ ꤞꤝꤥꤜꤤ꤬ꤟꤥ꤭ ꤔꤌꤣ꤬ ꤢ꤬ ꤗꤟꤢꤩ꤬ꤡꤝꤟꤥ ꤔꤟꤢꤧ꤬ ꤘꤛꤢ꤬ꤜꤟꤛꤢ꤬ꤞꤢꤧꤕꤜꤢꤪ꤬ ꤕꤚꤢꤧ꤯

ꤟꤣ ꤢꤧꤕꤟꤥ ꤠꤤ꤬ꤒꤥ꤭ꤚꤤ꤬ꤛꤢ꤬ ꤊꤜꤛꤢꤊꤜꤥ꤭ ꤜꤤ꤬ꤙꤢ꤬ꤘꤛꤢꤩꤗꤢ ꤢ꤬ꤚꤤ꤬ꤢ꤬ꤊꤛꤢ꤭꤯

ꤗꤢ꤬ꤗꤟꤢꤩ꤬ꤒꤢꤩ꤭ ꤢ꤬ꤋꤢꤨ꤬ꤢ꤬ꤋꤛꤢꤩ꤭ꤒꤢꤩ꤭ꤚꤢꤪ ꤙꤢꤩ꤬ꤒꤢ꤬ꤕꤜꤢꤩ꤬ꤞꤢꤧ꤭ꤊꤛꤢ꤭ VCAL ꤗꤟꤢꤩ꤬ꤒꤢꤩ꤭

ꤒꤟꤢꤧ꤬ꤓꤢꤨ꤬ꤜꤛꤢ꤬ꤒꤢ꤬ꤊꤜꤛꤢ꤬ ꤛꤢꤩ꤭ꤒꤢ꤬ꤟꤢꤩ꤬ ꤗꤢ꤬ ꤒꤟꤢꤧ꤬ꤓꤝꤥ꤬꤭ꤓꤛꤢ꤬ ꤘꤣ ꤒꤟꤢꤧ꤬ꤓꤢꤦꤡꤟꤢꤩ꤬ꤗꤛꤢꤊꤟꤢ꤬ꤋꤛꤢꤩ꤭ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤔꤢ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤊꤜꤛꤢꤊꤜꤥ꤭ ꤘꤣ ꤔꤢꤪ꤭ꤢꤩ꤬ꤔꤟꤤꤡꤟꤛꤢ ꤘꤣ ꤒꤟꤢꤧ꤬ꤤ꤬ꤞꤝꤥ ꤑꤟꤢꤩ꤭ꤒꤟꤥꤒꤣ꤬ꤒꤟꤥ ꤘꤣ ꤢ꤬ꤘꤢꤨ꤬ꤢ꤬ꤕꤚꤟꤢꤧ ꤕꤚꤢꤧ (ꤒꤟꤢꤧ꤬ꤓꤢꤦꤡꤟꤢꤩ꤬ꤗꤛꤢꤊꤟꤢ꤬ꤋꤛꤢꤩ꤭ ꤑꤟꤢ꤭ꤖꤌꤣ ꤒꤣꤖꤌꤣ)꤯ ꤒꤟꤢꤧ꤬ꤓꤢꤦꤡꤟꤢꤩ꤬ꤢꤩ꤭ꤗꤛꤢꤊꤟꤢ꤬ꤋꤛꤢꤩ꤭ ꤘꤣ ꤗꤛꤢꤓꤛꤢꤩ꤬ꤔꤌꤣ꤬ ꤢ꤬ ꤜꤥ꤬ꤙꤢꤧ꤬ ꤗꤟꤢꤩ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤒꤟꤢꤧ꤬ꤤ꤬ꤞꤝꤥ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤣ ꤞꤝꤥꤜꤤ꤬ꤟꤥ꤭ ꤒꤢ꤬ꤟꤢꤩ꤬ ꤢ꤬ꤊꤢꤨ꤬꤭ ꤕꤚꤢꤧ꤯

ꤋꤥ꤭ꤑꤟꤢ ꤔꤟꤢꤧ꤬ ꤊꤢꤦ ꤔꤟꤤꤙꤢꤧ꤬ ꤘꤢꤨ꤬ꤚꤛꤢ ꤜꤣꤊꤜꤢꤪ꤭ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤘꤣ ꤢ꤬ꤚꤛꤢ ꤜꤣꤊꤜꤢꤪ꤭ ꤢ꤬ꤒꤥ꤭ꤢ꤬ꤚꤟꤢꤧ꤬꤭ ꤔꤢ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤔꤢ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤢ꤬ꤋꤝꤢꤢ꤬ꤛꤢ꤬ ꤘꤣ ꤔꤢꤪ꤭ꤢꤩ꤬ꤔꤟꤤꤡꤟꤛꤢ ꤒꤢ꤬ꤟꤢꤩ꤬ ꤕꤢ꤭꤯ ꤔꤟꤢꤧ꤬ ꤊꤢꤦ ꤔꤢꤪ꤭ꤢꤩ꤬ꤔꤟꤤꤡꤟꤛꤢ ꤔꤟꤢꤧ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤢꤧꤡꤣ꤬ ꤒꤢ꤬ꤟꤢꤩ꤬ ꤔꤢ ꤊꤜꤛꤢ ꤘꤣ ꤢ꤬ꤞꤢꤧ꤭ ꤒꤢ꤬ꤟꤢꤩ꤬ ꤘꤣ VCE ꤘꤣ ꤢ꤬ꤞꤢꤧ꤭ ꤢ꤬ꤜꤟꤢꤧ꤭ ꤔꤌꤣ꤬ ꤕꤢ꤭꤯

ꤞꤝꤥꤜꤤ꤬ꤟꤥ꤭ꤖꤢꤨ ꤢꤧ꤬ꤕꤚꤟꤢꤧ꤬ ꤘꤣ ꤢ꤬ ꤗꤟꤢꤩ꤬ VCAL ꤘꤣ ꤢ꤬ꤔꤢ꤬ 2022 ꤒꤢ꤬ꤟꤢꤩ꤬ꤔꤌꤣ꤬ ꤢ꤬ꤗꤟꤢꤩ꤬ꤕꤜꤢꤦꤓꤌꤣ꤭ ꤟꤢꤪ VCAL ꤗꤟꤢꤒꤥ꤬ꤗꤢ꤬ ꤢ꤬ ꤓꤢꤨ꤬ꤜꤛꤢ꤬ꤊꤛꤢ꤭ ꤒꤣ꤬ꤡꤣ꤬ ꤘꤣ ꤒꤟꤢꤧ꤬ꤔꤝꤥꤖꤛꤢꤩ ꤘꤣ ꤢ꤬ꤞꤢꤧ꤭ ꤒꤢ꤬ꤟꤢꤩ꤬ ꤢ꤬ꤊꤜꤢꤧ꤭ ꤕꤚꤢꤧ꤯ ꤞꤝꤥꤜꤤ꤬ꤟꤥ꤭ꤖꤢꤨ ꤕꤢ꤬ꤒꤤꤕꤚꤟꤢꤧ꤬ ꤗꤢ꤬ ꤢ꤬ ꤊꤢꤦ ꤗꤟꤢꤩ꤬ VCAL ꤊꤜꤢ꤭ꤗꤢꤩ꤭ꤊꤢꤨ꤭ ꤙꤤ ꤢ꤬ꤔꤢ꤬ 2023ꤔꤌꤣ꤬ ꤕꤢ꤭꤯

ꤔꤝꤥꤖꤛꤢꤩꤔꤟꤤ ꤔꤟꤢꤧ꤬ ꤊꤜꤛꤢꤊꤜꤥ꤭

ꤔꤟꤢꤧ꤬ ꤞꤝꤥꤜꤤ꤬ꤟꤥ꤭ ꤒꤟꤢꤧ꤬ꤤ꤬ꤞꤝꤥ ꤘꤛꤢꤩꤡꤛꤢ꤬ꤘꤛꤢꤩꤑꤢ꤬ ꤒꤟꤢꤧ꤬ꤥ꤬ꤊꤢꤨꤥ꤬ꤊꤛꤢ ꤒꤢ꤬ꤟꤢꤩ꤬ꤔꤌꤣ꤬ ꤢ꤬ ꤊꤢꤦ ꤘꤛꤢꤩꤞꤢꤧꤑꤢꤩ꤭ ꤔꤟꤢꤧ꤬ ꤒꤟꤢꤧ꤬ꤔꤝꤥꤖꤛꤢꤩ ꤊꤜꤛꤢꤊꤜꤥ꤬꤭ ꤒꤢ꤬ꤟꤢꤩ꤬ ꤢ꤬ꤚꤤ꤬ꤢ꤬ꤊꤛꤢ꤭ ꤕꤢ꤭꤯

ꤟꤢꤩꤙꤢꤧ꤬ ꤔꤢ ꤔꤟꤢꤧ꤬ ꤞꤝꤥꤜꤤ꤬ꤟꤥ꤬꤭ ꤞꤛꤢꤖꤢꤨ ꤊꤢꤦ ꤓꤢꤦꤡꤟꤢꤩ꤬ ꤒꤟꤢꤧ꤬ ꤘꤣ ꤢꤧ꤬ꤞ꤬ꤤ꤭ ꤘꤛꤢꤩꤒꤟꤢ꤭ ꤔꤌꤣ꤬ ꤔꤤ꤯ ꤒꤟꤢꤧ꤬ꤙꤛꤢꤙꤢꤦ꤭ ꤢ꤬ꤑꤢꤩ꤭, ꤔꤟꤢꤧ꤬ ꤙꤢꤩ꤬ꤔꤟꤌꤣ꤭ꤡꤟꤛꤢ ꤕꤟꤥ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤔꤢ ꤒꤟꤢꤧ꤬ꤤ꤬ꤞꤝꤥꤒꤥ꤬꤭ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤒꤟꤢꤧ꤬ꤡꤟꤛꤢꤒꤟꤢꤧ꤬ꤘꤢꤧ꤬ ꤘꤣ ꤔꤟꤢꤧ꤬ ꤊꤜꤛꤢꤊꤜꤥ꤭ ꤔꤌꤣ꤬ ꤕꤚꤢꤧ꤯

ꤟꤣ ꤢꤧꤕꤟꤥ ꤛꤢꤩ꤭ ꤔ꤬ꤢ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤑꤟꤢꤩ꤭ꤒꤟꤥꤒꤣ꤬ꤒꤟꤥ ꤘꤣ ꤢ꤬ꤚꤟꤌꤣ꤬ ꤘꤣ ꤢ꤬ꤘꤢꤨ꤬ꤢ꤬ꤕꤚꤟꤢꤧ ꤒꤟꤢꤧ꤬ꤓꤢꤨ꤬ꤜꤛꤢ꤬ꤒꤢ꤬ꤕꤜꤢꤩ꤬ ꤒꤢ꤬ꤟꤢꤩ꤬ ꤔꤢ ꤒꤟꤢꤧ꤬ꤔꤝꤥꤖꤛꤢꤩ ꤒꤢ꤬ꤟꤢꤩ꤬꤯