Ko e ‘uhinga ‘oku fiemaʻu ai ke ngaungaue ange ʻa e fānaú
‘Oku fokotuʻu atu ke fakahoko ʻe he fānau taʻu 5-12 mo e toʻutupu ‘i he taʻu 13-17 ha fakamālohisino miniti ‘e 60 ‘i he ‘aho kotoa pē. Ke tokoni ki hono fakafaingofua ení, ‘okú mau fokotuʻu atu ke vahevahe ʻeni ki he miniti ‘e 15, tuʻo 4 ‘i he ‘aho.
Ko e fakamālohisinó ko ha ngāue ‘okú ne ueʻi ho sinó ke ngaungaue, fakatupu koe ke vave hoʻo mānavá mo hiki ‘a e tā ho mafú. ‘Oku fakatupu ‘e he fakamālohisinó ke fiefia pea mo moʻui lelei ʻa e fānaú, mo tokoniʻi kinautolu ke nau fakatupulekina ‘a e ngaahi angamaʻu ʻoku moʻuilelei.
Ko e ngaungaue ‘i he ‘aho kotoa pē ‘oku ‘i ai hono ngaahi lelei, ‘o kau ai ‘a e:
- lelei ange ʻa e moʻui lelei fakalukufuá
- lahi ange ʻa e iví
- siʻisiʻi ‘a e faingamālie ke mahamahakí, mahaki’ia mo tupu ‘a e sino ʻa ia ‘oku ‘ikai moʻuilelei
- lelei ‘a e toto, ngako ʻi he sino pea mo e lēvolo ‘o e suká
- fiefia fakataha mo e ngaahi kaungāmeʻá mo e fāmilí
- siʻisiʻiange ‘a e ngaahi ‘ulungāanga ‘ikai ke fie feohi fakasosialé
- lahiange ‘a e potoʻi fengāueʻakí mo e ngāue fakatimí
- leleiange hoʻo ongoʻi fekauʻaki mo koé mo hoʻo lotomaʻú
- holoki hoʻo loto hohaʻá mo e loto moʻuá
- lelei ange ʻa e tuku taha hoʻo tokangá
- tupu mo fakalakalaka ʻi ha founga ʻoku moʻui lelei
- mālohi ‘a e ngaahi uouá mo e ngaahi huí
- lelei ange hoʻo tuʻunga moʻui leleí, māfihungá mo e ngaué
Miniti ‘e 15, tuʻo 4 ʻi he ‘aho
‘Oku mau fokotuʻu atu ke fakahoko ‘a e fakamālohisinó ʻo tu’o fā ʻi he ‘aho ‘i he miniti ‘e 15.
Ko e ngaahi fakamālohisino ko ʻení ‘e lava ke kau ai ‘a e ngaahi meʻa ʻo hangē ko e:
- luelue pe heka ki he akó pe takatakai ‘i ho ngaahi kaungāʻapí
- fakaluelueʻi ‘a e kulií
- ‘alu ki he paaká mo e ngaahi kaungāmeʻá
- ‘akapulu
- sikeiti
- vaʻinga ‘i he toumui ‘o ‘apí
- tenisi
- kakau
- tauʻolunga
- lele pe tōtō
- pasiketipolo
- kakakaka
- ʻioka
- hiki meʻamamafa
- netipolo
Reviewed 07 December 2022