ܟܝܼܣܝܵܬܹܐ ܕܓܲܢܬܵܐ ܕܫܲܒܼܪܹܐ (Kinder Kits) - (ܐܵܬܘܿܪܵܝܵܐ) Assyrian

ܡܲܒܠܲܓܬܵܐ ܕܫܲܒܼܪܵܘܟܼܘܿܢ ܒܛܲܐܲܠܬܵܐ ܝܼܠܵܗܿ ܚܕܵܐ ܐܘܼܪܚܵܐ ܪܹܫܵܝܬܵܐ ܠܣܢܵܕܬܵܐ ܕܝܠܵܦܬܲܝܗܝ ܘܡܛܵܘܪܵܢܘܼܬܲܝܗܝ. ܐܲܒܼܵܗܹܐ، ܢܵܛܪܵܢܹܐ ܘܒܲܝܬܘܼܝܵܬܹܐ ܝܼܢܵܐ ܗܿܘ ܣܲܗܡܵܐ ܒܘܼܫ ܐܵܢܲܢܩܵܝܵܐ ܕܗܿܘ ܚܙܘܼܩܝܵܐ.

ܟܝܼܣܝܵܬܹܐ ܕܓܲܢܬܵܐ ܕܫܲܒܼܪܹܐ ܡܸܠܝܹܐ ܝܢܵܐ ܡܼܢ ܟܬܵܒܼܹܐ، ܒܘܼܩܝܵܬܹܐ ܘܥܵܒܼܘܿܕܘܵܬܹܐ ܝܘܼܠܦܵܢܵܝܹܐ ܥܒܼܝܼܕܹܐ ܩܵܐ ܫܲܒܼܪܵܘܟܼܘܿܢ ܘܒܲܝܬܘܼܬܵܐ ܩܵܐ ܚܡܵܠܬܵܐ ܓܵܘ ܒܲܝܬܵܐ.

ܟܠ ܚܕܵܐ ܟܝܼܣܬܵܐ ܕܓܲܢܬܵܐ ܕܫܲܒܼܪܹܐ ܟܹܐ ܚܵܒܼܫܵܐ ܡܸܢܕܝܼܵܢܹܐ ܥܒܼܝܼܕܹܐ ܕܝܼܠܵܢܵܐܝܼܬ ܩܵܐ ܫܲܒܼܪܹܐ ܒܥܘܼܡܪܵܐ ܕܬܠܵܬ ܫܸܢܹܐ.

ܟܲܪܟܘܼܒܼܵܐ ܕܦܘܼܠܚܵܢܵܐ ܕܝܠܵܦܬܵܐ ܘܕܡܛܲܘܪܵܢܘܼܬܵܐ ܕܫܸܢܹܐ ܒܟܼܝܼܪܵܝܹܐ ܓܵܘ ܒܼܸܟܬܘܿܪܝܵܐ

ܡܲܠܦܵܢܹ̈ܐ ܕܫܲܒܼܪܘܼܬܵܐ ܒܟܼܝܼܪܵܝܬܵܐ ܘܡܬܲܠܡܸܕܵܢܹ̈ܐ ܣܵܢܕܝܼ ܠܫܲܒܼܪܵܘܟܼܘܿܢ ܕܓܲܪܘܸܣ ܘܝܵܠܹܦ.

ܚܘܼܪܙܹܐ ܕܓܲܢܬܵܐ ܕܫܲܒܼܪܹܐ ܟܹܐ ܡܲܦܠܸܚܝܼ ܟܲܪܟܘܼܒܼܵܐ ܕܦܘܼܠܚܵܢܵܐ ܕܝܠܵܦܬܵܐ ܘܡܛܵܘܪܵܢܘܼܬܵܐ ܕܫܸܢܹܐ ܒܟܼܝܼܪܹܐ ܕܓܵܘ ܒܼܸܟܬܘܿܪܝܵܐ (Victorian Early Years Learning and Development Framework (VEYLDF)) ܠܡܗܲܕܘܼܝܹܐ ܝܠܵܦܬܵܐ ܘܡܛܵܘܪܵܢܘܼܬܵܐ ܕܫܲܒܼܪܹܐ.

ܟܠܚܲܕ ܡܸܢܕܝܼ ܓܵܘ ܟܲܪܡܘܼܟܼܬܵܐ ܕܓܲܢܬܵܐ ܕܫܲܒܼܪܹܐ (Kinder Kit) ܟܹܐ ܐܵܣܹܪ ܥܲܡ 1 ܝܲܢ ܙܵܘܕܵܐ ܡܼܢ ܚܲܕ ܡܼܢ ܦܠܵܛܹܐ ܕܓܵܘ VEYLDF.

• ܗܲܝܵܝܘܼܬܵܐ

• ܝܘܼܠܦܵܢܵܐ

• ܟܢܘܼܫܬܵܐ

• ܝܵܗܒܼܫܩܵܠܵܐ (ܣܘܼܘܵܕܵܐ)

• ܛܵܒܼܘܼܬܵܐ ܕܚܲܝܹ̈ܐ

ܓ̰ܲܢܬܵܐ ܕܚܲܨܵܐ

ܓ̰ܲܢܝܵܬܹܐ ܕܚܲܨܵܐ ܕܟܲܪܡܘܼܟܼܬܵܐ ܕܓܲܢܬܵܐ ܕܫܲܒܼܪܹܐ ܡܵܨܝܵܢܬܵܐ ܝܠܵܗܿ ܕܦܵܝܫܝܼ ܡܘܼܦܠܸܚܹܐ ܟܠܝܘܿܡ ܩܵܐ ܛܥܵܢܬܵܐ ܕܡܸܢܕܝܼܵܢܹܐ ܘܩܵܐ ܛܲܐܲܠܬܵܐ.

ܫܲܒܪܵܘܟܼܘܿܢ ܡܵܨܹܐ ܓܵܪܹܫ ܚܲܕ ܫܸܟܠܵܐ ܥܲܠ ܩܸܛܥܵܐ ܙܥܘܿܪܵܐ ܕܘܲܪܵܩܵܐ ܕܟܵܪܬܘܿܢ ܠܵܒܵܬ݉ܪܵܐ، ܩܵܐ ܕܐܵܢܝܼ ܝܵܕܥܝܼ ܐܲܝܢܝܼ ܝܠܵܗܿ ܓ̰ܲܢܬܵܐ ܕܚܲܨܵܐ ܕܕܝܼܲܝܗܝ.

ܦܬܘܿܚܘܼܢ ܠܹܗ ܙܸܢܓ̰ܸܠ ܕܓ̰ܲܢܬܵܐ ܕܚܲܨܵܐ ܘܕܲܒܫܘܼܢ ܠܗܘܿܢ ܪܘܼܫܡܹܐ ܕ Velcro ܠܐܸܠܬܸܚܬ ܠܡܲܦܠܘܼܚܹܐ ܫܸܛܚܵܐ ܕܠܲܒܵܕ ܩܵܐ ܛܲܐܲܠܬܵܐ ܨܲܠܡܸܢܵܢܬܵܐ.

• ܚܠܘܿܨܘܼܢ ܝܲܢ ܡܲܪܦܹܝܡܘܼܢ ܠܬܲܣܡܵܬܹܐ ܕܓ̰ܲܢܬܵܐ ܕܚܲܨܵܐ ܩܵܐ ܕܓ̰ܲܢܬܵܐ ܝܵܬܒܼܵܐ ܠܥܸܠ ܡܼܢ ܚܲܨܵܐ ܕܫܲܒܼܪܵܘܟܼܘܿܢ.

• ܡܲܒܪܹܝܡܘܼܢ ܚܕܵܐ ܬܘܼܢܝܼܬܵܐ ܡܼܢ ܕܲܒܘܼܫܹܐ ܕܠܲܒܸܕ.

• ܚܲܦܛܘܿܢ ܪܫܵܡܬܵܐ ܥܲܠ ܪܘܼܫܡܵܐ ܕܫܸܡܵܐ.

• ܡܲܦܠܸܚܘܼܢ ܡܗܝܼܪܘܼܝܵܬܹܐ ܕܡܼܢ ܩܵܕ݉ܡ ـ ܟܬܵܒܼܬܵܐ.

ܩܪܵܝܬܵܐ

ܓܪܵܫܬܵܐ ܕܫܸܟܠܹܐ ܘܪܫܵܡܬܵܐ ܕܪܘܼܫܡܹܐ ܟܹܐ ܫܲܒܼܩܵܐ ܩܵܐ ܫܲܒܼܪܹܐ ܕܡܲܚܙܝܼ ܓܵܢܲܝܗܝ ܒܚܕܵܐ ܐܘܼܪܚܵܐ ܡܲܒܪܸܝܵܢܬܵܐ ܘܒܵܢܝܵܐ ܠܵܗܿ ܗܲܝܡܵܢܘܼܬܵܐ ܒܓܵܢܲܝܗܝ. ܒܓ̰ܲܪܲܒܬܵܐ ܕܡܲܦܠܲܚܬܵܐ ܕܩܲܠܵܡܹܐ ܡܓܵܘܢܵܢܹܐ ܥܲܠ ܘܲܪܵܩܵܐ، ܫܲܒܼܪܹܐ:

• ܟܹܐ ܡܛܲܘܸܪܝܼ ܡܗܝܼܪܘܼܝܵܬܹܐ ܙܵܘܥܵܢܵܝܹܐ ܪܹܫܵܝܹ̈ܐ، ܐܲܝܢܝܼ ܕܐܵܢܲܢܩܵܝܹܐ ܝܢܵܐ ܩܵܐ ܝܠܵܦܬܵܐ ܕܵܐܟܼܝܼ ܠܟܬܵܒܼܵܐ

• ܡܲܕܪܸܣܝܼ ܠܡܣܲܕܪܵܢܘܼܬܲܝܗܝ ܕܐܝܼܕܵܐ ܘܥܲܝܢܵܐ

• ܝܵܠܦܝܼ ܒܘܼܬ ܓܵܘܢܹܐ، ܫܸܟܠܹܐ، ܢܸܡܘܼܢܹܐ ܘܚܛܘܼܛܹܐ

• ܡܲܚܙܝܼ ܡܸܬܒܲܪܝܵܝܘܼܬܵܐ

• ܝܵܗܒܼܝܼ ܘܫܵܩܠܝܼ ܥܲܡ ܐ݉ܚܹܪ݉ܢܹܐ.

• ܚܲܦܛܘܼܢ ܠܫܲܒܼܪܵܘܟܼܘܿܢ ܕܡܲܒܣܸܡ ܒܥܵܡܠܝܼܬܵܐ ܕܪܫܵܡܬܵܐ.

• ܒܲܩܪܘܼܢ ܒܘܼܩܵܪܹܐ ܦܬܝܼܚܹܐ ܩܵܐ ܕܫܵܒܼܩܝܼܬܘܿܢ ܠܹܗ ܫܲܒܼܪܵܘܟܼܘܿܢ ܕܗܲܡܙܸܡ ܒܘܼܬ ܫܸܟܠܹܗ.

• ܐ݇ܡܘܿܪܘܼܢ ܠܗܘܿܢ ܫܸܡܵܢܹܐ ܕܓܵܘܢܹܐ (ܪܲܢܓܹܐ) ܘܫܸܟܠܹܐ ܕܒܸܚܙܵܝܲܝܗܝ ܝܬܘܿܢ.

ܥܵܒܼܘܿܕܘܵܬܹܐ ܡܸܬܒܲܪܝܵܢܹܐ

ܛܲܐܲܠܬܵܐ ܡܸܬܒܲܪܝܵܢܬܵܐ ܟܹܐ ܡܚܲܦܛܵܐ ܟܠܲܝܗܝ ܐܵܢܝܼ 5 ܪܸܓܼܫܹܐ ܕܫܲܒܼܪܵܘܟܼܘܿܢ ـ ܚܙܵܝܬܵܐ، ܡܲܡܲܚܬܵܐ، ܫܡܸܥܬܵܐ، ܕܩܵܪܬܵܐ ܘܛܥܵܡܬܵܐ. ܝܼܠܵܗܿ ܚܕܵܐ ܐܘܼܪܚܵܐ ܡܲܚܡܸܠܵܢܬܵܐ ܠܦܲܠܬܘܼܫܹܐ، ܡܲܫܟܼܘܼܚܹܐ ܘܠܸܝܠܵܦܵܐ ܒܘܼܬ ܬܹܒܼܹܝܠ (ܕܘܼܢܝܹܐ) ܠܚܲܕܸܪܘܵܢܵܘܟܼܘܿܢ.

• ܚܲܦܛܘܼܢ ܠܩܸܘܝܘܼܬܵܐ ܒܡܲܚܙܲܝܬܵܐ ܕܫܲܒܼܪܵܘܟܼܘܿܢ ܕܡܸܬܩܲܒܠܵܢܬܵܐ ܝܠܵܗܿ ܫܲܪܲܝܬܵܐ ܚܕܵܐ ܓܵܗܵܐ ܐ݇ܚܹܪ݇ܬܵܐ. ܐܸܢ ܢܦܝܼܠܠܗܘܿܢ ܩܲܠܒܹܐ (ܡܘܼܟܲܥܲܒܵܬ) ܕܛܲܐܲܠܬܵܐ ܕܒܢܵܝܬܵܐ، ܫܩܘܿܠܘܼܢ ܚܲܕܟܡܵܐ ܢܲܦܵܣܹܐ ܥܲܡܘܼܩܹܐ ܘܬܢܹܝܡܘܼܢ ܠܒܢܵܝܬܵܐ ܥܲܡܚܕܵܕܹܐ.

• ܓ̰ܲܪܒܘܼܢ ܕܲܘܸܪܝܼܬܘܿܢ ܠܹܗ ܠܲܝܫܵܐ ܕܛܲܐܲܠܬܵܐ ܠܦܸܨܠܵܐ ܕܚܕܵܐ ܓܘܼܕܬܵܐ، ܥܒܼܘܿܕܘܼܢ ܫܸܟܠܹܐ ܦܪܝܼܫܹܐ، ܦܛܘܿܚܘܼܢ ܠܹܗ، ܡܪܘܿܟ̰ܘܼܢ ܠܹܗ.

• ܥܒܼܘܿܕܘܼܢ ܡܘܿܣܝܼܩܵܐ ܥܲܡܚܕܵܕܹܐ. ܡܲܒܪܹܝܡܘܼܢ ܩܝܼܢܵܬܹܐ ܘܪܸܟܼܢܹܐ ܦܪܝܼܫܹܐ ܒܡܚܵܝܬܵܐ ܕܟ̰ܲܦܹܐ ܒܐܝܼܕܵܘܟܼܘܿܢ ܝܲܢ ܒܢܩܵܪܬܵܐ ܥܲܠ ܡܸܢܕܝܼܵܢܹܐ ܕܐܝܼܬܠܵܘܟܼܘܿܢ ܓܵܘ ܒܲܝܬܵܐ.

ܛܲܐܲܠܬܵܐ ܓܵܘ ܗܵܘܵܐ ܦܬܘܿܚܵܐ (ܠܒܼܲܕܲܪ ܡܼܢ ܒܲܝܬܵܐ)

ܛܲܐܠܬܵܐ ܡܕܘܼܒܸܪܬܵܐ ܓܵܘ ܗܵܘܵܐ ܦܬܘܿܚܵܐ ܝܼܠܵܗܿ ܚܲܕ ܣܲܗܡܵܐ ܓܘܼܒܼܪܵܐ ܕܓܲܪܘܲܣܬܵܐ، ܡܛܲܘܪܵܢܘܼܬܵܐ ܘܛܵܒܼܘܼܬܵܐ ܕܚܲܝܹܐ ܩܵܐ ܫܲܒܼܪܵܘܟܼܘܿܢ.

ܫܲܒܼܪܹܐ ܡܵܨܝܼ ܕ:

• ܓܲܪܘܸܣܝܼ ܠܵܗܿ ܦܲܪܡܲܝܬܲܝܗܝ ܒܘܼܬ ܝܘܼܠܦܵܢܵܐ ܒܚܙܵܝܬܵܐ ܕܟܝܵܢܵܐ

• ܩܵܢܝܼ ܚܕܵܐ ܪܓܼܵܫܬܵܐ ܕܫܲܪܝܘܼܬܵܐ (ܬܟܼܵܠܬܵܐ ܥܲܠ ܓܵܢܵܐ)

• ܚܵܒܼܛܝܼ ܫܲܘܬܵܦܵܐܝܼܬ ܥܲܡ ܫܲܒܼܪܹܐ ܐ݉ܚܹܪ݉ܢܹܐ

• ܦܲܠܬܸܫܝܼ ܘܝܵܠܦܝܼ ܩܵܐ ܕܥܵܒܼܕܝܼ ܓܘܼܒܵܝܹܐ ܨܦܵܝܝܼ ܐܝܼܡܲܢ ܕܛܲܐܘܼܠܹܐ ܝܢܵܐ

• ܛܲܘܸܪܝܼ ܡܲܓ̰ܘܲܓ̰ܬܵܐ ܟܠܵܢܵܝܬܵܐ ܕܦܲܓܼܪܵܐ، ܡܣܲܕܪܵܢܘܼܬܵܐ ܕܐܝܼܕܵܐ ܘܥܲܝܢܵܐ ܘܡܗܝܼܪܘܼܝܵܬܹܐ ܙܵܘܥܵܢܵܝܹܐ ܪܹܫܵܝܸܐ ܘܕܡܸܬܒܲܪܝܵܢܘܼܬܵܐ.

• ܗܲܡܙܸܡܘܼܢ ܒܘܼܬ ܛܲܪܦܹܐ ܘܐ݉ܡܘܿܪܘܼܢ ܫܸܡܵܢܹܐ ܕܓܵܘܢܹܐ ܘܕܦܸܨܠܹܐ ܦܪܝܼܫܹܐ.

• ܢܨܘܿܒܼܘܼܢ ܒܲܪܙܲܪܥܹܐ ܥܲܡܚܕܵܕܹܐ.

• ܥܒܼܘܿܕܘܼܢ ܐܲܣܘܼܪܵܐ ܥܲܡ ܟܝܵܢܵܐ. ܗܲܡܙܸܡܘܼܢ ܒܘܼܬ ܚܲܡܲܝܬܵܐ ܕܡܲܚܕܘܼܪܵܐ ܕܕܝܼܲܢ.

• ܒܢܹܝܡܘܼܢ ܩܲܠܥܵܬܹܐ ܕܚܝܼܙܵܐ.

ܛܲܐܲܠܬܵܐ ܕܪܵܡܵܝܬܵܐ

• ܦܲܠܬܘܼܫܹܐ ܘܡܲܒܪܘܼܝܹܐ ܬܹܒܼܹܝܠܹܐ ܚܲܕܬܬܹܐ

• ܫܲܪܘܼܟܹܐ ܘܒܸܫܩܵܠܵܐ ܢܵܘܒܹܐ

• ܐܘܼܪܚܵܬܹܐ ܕܚܒܼܵܛܬܵܐ ܘܣܘܼܘܵܕܵܐ ܥܲܡ ܐܸܚܕܵܕܹܐ.

• ܐ݉ܡܘܿܪܘܼܢ ܫܸܡܵܢܹ̈ܐ ܕܚܲܝܘܵܬܹ̈ܐ ܒܠܸܫܵܢܵܐ ܐܸܢܓܠܸܣܢܵܝܵܐ ܘܒܠܸܫܵܢܹ̈ܐ ܐ݉ܚܖܹ̈ܢܹܐ.

• ܒܪܝܼܡܘܼܢ ܠܦܲܪܨܘܿܦܹ̈ܐ ܕܛܲܐܲܠܬܵܐ.

• ܡܲܒܪܘܼܢ ܠܬܘܼܢܝܵܬܹ̈ܐ.

• ܡܲܦܠܸܚܘܼܢ ܚܲܝܘܵܬܹܐ ܠܦܲܠܬܘܼܫܹܐ ܘܡܲܚܙܲܝܬܵܐ ܕܪܓܼܵܫܝܵܬܹܐ ܘܢܸܒܼܗܹܐ ܦܪܝܼܫܹܐ.

ܛܲܐܲܠܝܵܬܹܐ

ܛܲܐܲܠܬܵܐ ܕܛܲܐܲܠܝܵܬܹܐ ܥܲܡ ܒܲܝܬܘܼܬܵܐ ܘܚܲܒܼܪܵܢܹܐ ܝܼܠܵܗܿ ܚܕܵܐ ܐܘܼܪܚܵܐ ܪܹܫܵܝܬܵܐ ܠܒܢܵܝܵܐ ܡܗܝܼܪܘܼܝܵܬܹܐ ܫܲܘܬܵܦܵܝܹܐ ܕܫܲܒܼܪܵܘܟܼܘܿܢ.

ܛܲܐܲܠܝܵܬܹܐ ܡܵܨܝܼ ܗܲܝܸܪܝܼ ܫܲܒܼܪܹܐ ܕܝܵܠܦܝܼ ܡܗܝܼܪܘܼܝܵܬܹܐ ܕܡܲܢܵܝܘܼܬܵܐ، ܕܠܸܫܵܢܵܐ ܘܕܫܪܵܝܬܵܐ ܕܩܸܛܪܹܐ.

• ܝܵܠܦܝܼ ܩܵܢܘܿܢܹܐ ܕܛܲܐܲܠܬܵܐ ܘܡܲܦܠܸܚܝܼ ܛܲܐܲܠܬܵܐ ܒܢܵܘܒܹܐ.

• ܡܚܲܠܸܢܝܼ ܠܫܪܵܝܬܵܐ ܕܩܸܛܪܹܐ ܘܠܡܗܝܼܪܘܼܝܵܬܹܐ ܕܕܟܼܵܪܬܵܐ.

• ܕܵܪܫܝܼ ܡܸܢܝܵܢܹܐ ܘܡܲܦܠܸܚܝܼ ܚܲܫܒܲܢܬܵܐ ܒܡܸܢܕܝܼܵܢܹܐ.

ܒܢܵܝܬܵܐ ܕܟܢܘܼܫܬܵܐ

ܛܲܐܲܠܬܵܐ ܝܼܠܵܗܿ ܕܵܐܟܼܝܼ ܫܲܒܼܪܹܐ ܟܹܐ ܡܲܫܟܼܚܝܼ ܘܝܵܠܦܝܼ ܒܘܼܬ ܓܵܢܲܝܗܝ ܘܒܘܼܬ ܬܹܒܼܹܝܠ ܕܚܲܕܸܪܘܵܢܲܝܗܝ. ܩܵܐ ܫܲܒܼܪܹ̈ܐ، ܛܲܐܲܠܬܵܐ ܘܝܠܵܦܬܵܐ ܟܹܐ ܓ̰ܵܘܓ̰ܝܼ ܥܲܡܚܕܵܕܹ̈ܐ. ܡܸܢܕܝܼܵܢܹܐ ܕܓܵܘ ܟܝܼܣܬܵܐ ܕܓܲܢܬܵܐ ܕܫܲܒܼܪܹܐ ܟܹܐ ܣܵܢܕܝܼ ܠܵܘܟܼܘܿܢ ܩܵܐ ܕܗܵܘܹܐܠܵܘܟܼܘܿܢ ܣܘܼܘܵܕܹܐ ܒܘܼܬ ܦܪܝܼܫܘܼܬܵܐ ܘܡܲܪܕܘܼܝܵܬܹܐ ܦܪܝܼܫܹܐ.

• ܗܲܡܙܸܡܘܼܢ ܥܲܡ ܫܲܒܼܪܵܘܟܼܘܿܢ ܒܘܼܕ ܐܲܬܪ̈ܵܘܵܬܹܐ ܐ݉ܚܹܪ̈݉ܢܹܐ ܘܚܲܝܘܵܬܹ̈ܐ ܐܵܨܠܵܝܹ̈ܐ ܕܕܝܼܲܝܗܝ.

• ܓܲܫܩܘܼܢ ܠܚܕܵܐ ܚܲܪܝܼܛܵܐ ܕܬܹܒܼܹܝܠ ܩܵܐ ܕܚܵܙܝܼܬܘܿܢ ܡܼܢ ܐܲܝܟܵܐ ܫܘܼܪܹܝܹܐ ܝܢܵܐ ܠܸܫܵܢܹܐ ܦܪܝܼܫܹܐ.

ܡܝܲܩܲܪܬܵܐ ܕܗܲܝܼܵܝܘܼܬܵܐ

ܟܬܵܒܼܹ̈ܐ ܒܠܸܫܵܢܵܐ ܕ Auslan

ܐܵܗܵܐ ܚܘܼܪܙܵܐ ܝܼܠܹܗ ܡܸܬܩܲܢܝܵܢܵܐ ܓܵܘ ܚܲܕܟܡܵܐ ܓܲܢܵܬܹܐ ܕܫܲܒܼܪܹܐ.Auslan ܝܼܠܹܗ ܠܸܫܵܢܵܐ ܕܪܸܡܙܹܐ ܡܘܼܦܠܸܚܵܐ ܓܵܘ ܚܘܼܪܙܵܐ ܕܠܸܫܵܢܵܐ ܕܫܲܒܼܪܘܼܬܵܐ ܒܟܼܝܼܪܵܝܬܵܐ ܕܓܵܘ ܒܼܸܟܬܘܿܪܝܵܐ.

ܐܝܼܬ ܪܵܒܵܐ ܝܘܼܬܪܵܢܹܐ (ܦܲܝܕܹܐ) ܩܵܐ ܫܲܒܼܪܹܐ ܕܒܸܝܠܵܦܵܐ ܝܢܵܐ ܚܲܕ ܠܸܫܵܢܵܐ ܐ݉ܚܹܪ݉ܢܵܐ ܒܚܲܕ ܥܘܼܡܪܵܐ ܒܟܼܝܼܪܵܐ، ܒܸܚܒܼܵܫܵܐ:

• ܡܗܝܼܪ̈ܘܼܝܵܬܹܐ ܙܵܘܕܵܢܹ̈ܐ ܕܡܼܢ ܩܵܕ݉ܡ ܩܪܵܝܬܵܐ ܘܕܡܼܢ ܩܵܕ݉ܡ ܟܬܵܒܼܬܵܐ

• ܬܲܚܡܲܢܬܵܐ ܛܵܥܘܿܦܬܵܐ ܥܒܼܝܼܕܬܵܐ ܒܘܼܫ ܨܦܵܝܝܼ

• ܗܲܝܡܵܢܘܼܬܵܐ ܒܓܵܢܵܐ ܘܛܵܒܼܘܼܬܵܐ ܕܚܲܝܹܐ ܒܘܼܫ ܚܘܼܠܸܢܹܐ

• ܗܲܝܵܝܘܼܬܵܐ ܡܲܪܕܘܼܬܵܢܵܝܬܵܐ ܡܚܘܼܠܸܢܬܵܐ.

ܪܵܒܵܐ ܡܼܢ ܟܬܵܒܼܹܐ ܚܒܼܝܼܫܹܐ ܓܵܘ ܟܝܼܣܬܵܐ ܕܓܲܢܬܵܐ ܕܫܲܒܼܪܹܐ ܕܫܹܢ݉ܬܵܐ 2026 ܐܝܼܬܠܗܘܿܢ ܬܲܪܓܲܡܝܵܬܹܐ ܡܸܬܩܲܢܝܵܢܹܐ ܒܠܸܫܵܢܵܐ ܕ Auslan.

• ܡܲܚܙܹܝܡܘܼܢ ܪܓܼܵܫܝܵܬܹܐ ܒܐܘܼܪܚܵܐ ܕ Auslan.

• ܐ݇ܡܘܿܪܘܼܢ ܫܠܵܡܵܐܠܵܘܟܼܘܿܢ ܒܠܸܫܵܢܵܐ ܕ Auslan.

ܫܲܝܢܘܼܬܵܐ (ܣܲܠܵܡܲܬܘܼܬܵܐ) ܕܫܲܒܼܪܵܐ، ܛܵܒܼܘܼܬܵܐ ܕܚܲܝܹܐ ܘܣܢܵܕܬܵܐ ܒܘܼܫ ܙܵܘܕܵܐ

ܠܲܝܬ ܚܲܕ ܡܸܢܕܝܼ ܒܘܼܫ ܐܵܢܲܢܩܵܝܵܐ ܡܼܢ ܫܲܝܢܘܼܬܵܐ ܘܛܵܒܼܘܼܬܵܐ ܕܚܲܝܹܐ ܕܫܲܒܼܪܹܐ. ܒܲܩܪܘܼܢ ܡܼܢ ܚܸܠܡܲܬܵܘܟܼܘܿܢ ܕܵܐܟܼܝܼ ܐܵܢܝܼ ܟܹܐ ܚܲܡܝܼ ܠܫܲܒܼܪܹܐ ܣܲܠܵܡܲܬ.

ܟܠܲܝܗܝ ܫܲܒ݂ܪܹܐ ܟܹܐ ܝܵܠܦܝܼ ܒܐܘܼܪ̈ܚܵܬܹܐ ܦܪ̈ܝܼܫܹܐ ܘܒܓ̰ܲܠܕܘܼܬܵܐ ܕܠܲܚܡܵܐ ܥܲܡܲܝܗܝ. ܗܲܡܙܸܡܘܼܢ ܥܲܡ ܡܲܠܦܵܢܵܐ ܕܫܲܒܼܪܘܼܬܵܐ ܒܟܼܝܼܪܬܵܐ ܕܕܝܼܵܘܟܼܘܿܢ ܐܸܢ ܐܝܼܬܠܵܘܟܼܘܿܢ ܐܲܝܢܝܼ ܢܸܓܵܪܵܢܘܼܝܵܬܹܐ ܕܗܵܘܝܼ. ܐܸܢ ܐܲܚܬܘܿܢ ܘܫܲܒܼܪܵܘܟܼܘܿܢ ܣܢܝܼܩܹܐ ܝܬܘܿܢ ܠܣܢܵܕܬܵܐ ܙܵܘܕܵܢܬܵܐ، ܗܲܝܲܪܬܵܐ ܡܸܬܩܲܢܝܵܢܬܵܐ ܝܠܵܗܿ ܒܐܲܢܹܐ ܐܘܼܪܚܵܬܹܐ ܕܒܹܐܬܵܝܵܐ ܝܢܵܐ:

• ܫܩܘܿܠܘܼܢ ܚܲܕ ܡܵܘܥܕܵܐ ܩܵܐ ܕܚܵܙܝܼܬܘܿܢ ܐܵܣܝܵܘܟܼܘܿܢ ܝܲܢ ܝܵܨܘܿܦܬܵܐ (ܢܹܪܣ) ܕܐܸܡܗܵܝܘܼܬܵܐ ܘܕܚܘܼܠܡܵܢܵܐ ܕܫܲܒܼܪܵܐ ܩܵܐ ܕܪܵܫܬܵܐ ܕܒܘܼܩܵܪ̈ܵܘܟܼܘܿܢ.

• ܡܲܚܒܸܪܘܼܢ ܩܵܐ ܚܘܼܛܵܐ ܕܚܘܼܠܡܵܢܵܐ ܕܐܸܡܗܵܝܘܼܬܵܐ ܘܕܫܲܒܼܪܵܐ (Maternal and Child Health line) ܥܲܠ ܡܸܢܝܵܢܵܐ 29 22 13 ܩܵܐ ܒܲܝܬܘܼܝܵܬܹܐ ܕܓܵܘ ܒܼܸܟܬܘܿܪܝܵܐ ܕܐܝܼܬܠܗܘܿܢ ܫܲܒܼܪܹܐ ܒܹܝܠ ܥܘܼܡܪܵܐ ܕܡܼܢ ܒܪܵܝܬܵܐ ܗܲܠ 6 ܫܸܢܹܐ، 24 ܣܵܥܲܬܹܐ ܒܝܵܘܡܵܐ، 7 ܝܵܘܡܵܢܹܐ ܒܫܵܒܼܘܿܥܵܐ.

ܬܲܚܡܸܢܘܼܢ ܕܫܲܪܝܼܬܘܿܢ ܚܲܕ ܫܘܼܓܼ݉ܠܵܐ ܓܵܘ ܩܲܛܵܥܵܐ ܕܓܲܢܬܵܐ ܕܫܲܒܼܪܹܐ ܕܓܲܪܘܘܼܣܹܐ ܝܠܹܗ ܓܵܘ ܒܼܸܟܬܘܿܪܝܵܐ. ܠܣܢܵܕܬܵܘܟܼܘܿܢ ܕܗܵܘܝܼܬܘܿܢ ܚܲܕ ܡܲܠܦܵܢܵܐ ܕܫܲܒܼܪܘܼܬܵܐ ܒܟܼܝܼܪܵܬܵܐ ܝܲܢ ܚܲܕ ܡܲܠܦܵܢܵܐ، ܐܝܼܬ:

• ܓܘܼܒܵܝܹܐ ܠܚܝܼܡܹܐ ܕܩܸܪܝܵܢܵܐ

• ܡܵܘܗܵܒܼܝܵܬܹܐ ܕܩܸܪܝܵܢܵܐ ܫܦܝܼܥܹܐ

• ܡܚܲܦܛܵܢܹܐ ܟܸܣܦܵܢܵܝܹܐ (ܙܘܼܙܵܢܵܝܹܐ)

ܕܒܼܵܚܬܵܐ ܕܟܝܼܣܬܵܐ ܕܓܲܢܬܵܐ ܕܫܲܒܼܪܹܐ ܕܕܝܼܵܘܟܼܘܿܢ

ܐܝܼܡܲܢ ܕܫܲܒܼܪܵܘܟܼܘܿܢ ܦܵܪܹܩ ܡܼܢ ܡܸܢܕܝܼܵܢܹܐ ܕܟܲܪܡܘܼܟܼܬܵܐ ܕܓܲܢܬܵܐ ܕܫܲܒܼܪܹܐ (Kinder Kit)، ܐܸܢ ܒܲܣܡܵܐܠܵܘܟܼܘܿܢ ܪܲܦܹܝܡܘܼܢ ܠܗܘܿܢ ܒܐܘܼܪܚܵܐ ܡܸܫܬܲܐܠܵܢܬܵܐ.

ܐܸܢ ܡܸܢܕܝܼܵܢܹܐ ܝܼܢܵܐ ܒܐܲܝܟܲܢܵܝܘܼܬܵܐ ܨܦܵܝܝܼ، ܬܲܚܡܸܢܘܼܢ ܒܕܒܼܵܚܬܲܝܗܝ ܩܵܐ ܚܲܕ ܫܘܼܬܐܵܣܵܐ ܥܘܼܕܪܵܢܵܝܵܐ. ܒܲܩܪܘܼܢ ܡ̣ܢ ܓܵܢܵܘܟܼܘܿܢ ‘ܒܸܕ ܝܵܗܒܼܸܢܠܹܗ ܐܵܗܵܐ ܩܵܐ ܚܲܕ ܚܲܒܼܪܵܐ؟’. ܐܸܢ ܦܘܼܢܵܝܵܐ ܝܼܠܹܗ ܗܹܐ، ܗܿܝܓܵܗ݇ܐ ܠܚܝܼܡܹܐ ܝܢܵܐ ܕܦܵܝܫܝܼ ܝܗܝܼܒܼܹܐ ܩܵܐ ܚܲܕ ܫܘܼܬܐܵܣܵܐ ܥܘܼܕܪܵܢܵܝܵܐ.

ܐܸܢ ܡܸܢܕܝܼܵܢܵܘܟ݂ܘܿܢ ܠܹܐ ܝܢܵܐ ܠܚܝܼܡܹܐ ܕܦܵܝܫܝܼ ܝܗܝܼܒܼܹܐ ܩܵܐ ܚܲܕ ܫܘܼܬܐܵܣܵܐ ܥܘܼܕܪܵܢܵܝܵܐ، ܐܸܢ ܒܲܣܡܵܐܠܵܘܟܼܘܿܢ ܬܢܹܝܡܘܼܢ ܠܡܲܦܠܲܚܬܲܝܗܝ ܐܲܝܟܵܐ ܕܡܸܬܗܵܘܝܵܢܬܵܐ ܝܠܵܗܿ.

ܡܲܒܨܲܪܬܵܐ ܘܪܲܦܲܝܬܵܐ ܕܙܸܒܠܵܐ ܒܐܘܼܪܚܵܐ ܠܚܝܼܡܬܵܐ ܟܹܐ ܗܲܝܸܪܝܼ ܒܒܢܵܝܬܵܐ ܕܚܕܵܐ ܒܼܸܟܬܘܿܪܝܵܐ ܒܘܼܫ ܕܟܼܝܼܬܵܐ (ܬܲܡܸܙ)، ܘܒܘܼܫ ܩܝܼܢܬܵܐ.