သူငယ်တန်းလက်စွဲအိတ်များ - မိဘများအတွက် (Kinder Kits - Guide for families) - မြန်မာ (Burmese)

သူငယ်တန်း လက်စွဲအိတ်အကြောင်း-

ကလေးများ အဖို့ ကစားခြင်းနှင့် သင်ယူခြင်းသည် ဒွန်တွဲလျက်ရှိသည်။ ကလေးများသည် မိမိတို့အကြောင်းနှင့် ပတ်ဝန်းကျင်လောကကြီးအကြောင်းကို ကစားခြင်းအားဖြင့် သိရှိပြီး သင်ယူကြသည်။ မိဘနှင့် မိသားစုများသည် ထိုသင်ယူခြင်း၏ကြီးမားသော အစိတ်အပိုင်းတစ်ရပ်အနေဖြင့် ပါဝင်နေပါသည်။ သင့်ကလေး၏ သူငယ်တန်းလက်စွဲအိတ်ပါ ပစ္စည်းတိုင်းကို မိသားစုအတွင်း မျှဝေသုံးစွဲပြီး ပျော်ပျော်ပါးပါးဖြစ်စေရန် ဖန်တီးထားပါသည်။

ဗစ်တိုးရီးယား ကနဦးကာလ ပညာသင်ယူရေးနှင့် ဖွံ့ဖြိုးရေး စီမံချက် (Victorian Early Years Learning and Development Framework (VEYLDF)) ကို အသုံးပြု၍ သူငယ်တန်းကာလတွင် သင့်ကလေးအား သင်ယူရေးနှင့် ဖွံ့ဖြိုးရေးဆိုင်ရာ အကျိုး ငါးရပ်ကို ဖွံ့ဖြိုးတိုးတက်စေရန် အထောက်အကူပေးမည့် ပညာသင်ယူရေး အတွေ့အကြုံများကို ဖန်တီးပေးထားသည်။ အဆိုပါ အကျိုး ငါးရပ်မှာ -

• ပင်ကိုယ်လက္ခဏာ ဖော်ထုတ်ခြင်း
• လူမှု့အသိုင်းအဝိုင်း
• ကျန်းမာရွှင်လန်းခြင်း
• လေ့လာသင်ယူခြင်း
• ပြောဆိုဆက်သွယ်မှု

ရုပ်ပုံနှင့် စာလုံးပါ အန်စာတုံးများ

ပုံပြောခြင်းမှာ ကလေးများအဖို့ ၎င်းတို့၏ နေ့စဉ် တွေ့ကြုံမှုများကို နားလည်စေရန် အရေးကြီးသော အစိတ်အပိုင်း တစ်ရပ်ဖြစ်ပါသည်။ ၎င်းသည် အရေးအဖတ် ဖွံ့ဖြိုးမှုကို ပံ့ပိုးပေးပြီး ကလေးများအား ၎င်းတို့အနားရှိ လူများနှင့် မည်သို့ပြောဆိုရမည်ကို နားလည်စေပါသည်။

သင့်အနေဖြင့် အန်စာတုံးရှိ စကားလုံးအသစ်များကို အဂ်လိပ်စာဖြင့် သို့မဟုတ် အခြား ဘာသာစကားဖြင့် သင့်ကလေး သင်ယူစေရန် ကူညီပေးနိုင်သည်။

• အန်စာတုံးကိုလှည့်ပါ၊ ရုပ်ပုံများအကြောင်း ပြောပြပေးပါ
• ၎င်းတို့နှင့်အတူ စကားလုံးတိုးချဲ့ပါ
• ပုံများအကြောင်း ပြောပါ
• မေးခွန်များး မေးပါ

ရောင်စုံခဲတံများနှင့် ပုံဆွဲစက္ကူ

ရောင်စုံခဲတံများဖြင့် ပုံဆွဲခြင်းသည် အောက်ပါတို့ကို သင်ယူရန် နည်းလမ်းအမျိုးမျိုးကို ရသည်-

• ခဲတံကိုကိုင်တွယ်ခြင်းဖြင့် အနုစိတ်ကြွက်သားလှုပ်ရှားမှုကို ကောင်းစေခြင်း
• လက်-မျက်လုံး သဟဇာတဟန်ချက်ညီခြင်း
• အရောင်နှင့် ပုံသဏ္ဍာန်ကို လေ့လာခြင်း
• စာရွက်နှင့် အခြား အရာပစ္စည်းများဖြင့် တီထွင်ဆန်းသစ်မှုကို ဖော်ထုတ်ပြခြင်း

အရေးကြီးဆုံးအားဖြင့် သင့်ကလေးသည် သူတို့ကိုယ်တိုင် ပြောလိုသည်ကို ဘေးကင်းစွာနှင့် ရဲရင့်တည်ကြည်စွာပြောရန် သင်ယူနိုင်ပါမည်။ အချို့ကလေးများသည် သင် မသိနိုင်သော အမှတ်အသားများကို ရေးခြစ်နိုင်ပြီး ဤအတွက် ပြဿနာ မရှိပါ။ ၎င်းမှာ ပုံဆွဲသင်ယူခြင်း၏ ဖြစ်ရိုးဖြစ်စဉ်ဖြစ်ပါသည်။

• ပုံရေးဆွဲရန် ပုံဆွဲစက္ကူကို သုံးပါ
• မိသားစုလိုက် ပုံဆွဲခြင်းကို အားပေးပါ
• ပုံဆွဲနေစဥ် စကားပြောပါ
• အရောင်များနှင့် ပုံသဏ္ဍာန်များကို ပြောပြပါ

အစေ့များ

ကလေးများနှင့်အတူ အစေ့များကို စိုက်ပျိုးခြင်းသည် သိပ္ပံပညာ- အခြေခံသည့် သင်ယူရေးအတွေ့အကြုံ ကြွယ်ဝပြီး၊ ကလေးများအား သဘာဝလောက၏ အံ့မခန်းမှုကို မြင်တွေ့စေပါသည်။ သူတို့သည် သဘာဝကို လေ့လာယူမည်၊ ဘာသာစကားကို ပျိုးထောင်ပြီး ရိုးရိုး ညွှန်ကြားချက်များကို လိုက်နာရန် လေ့လာပါလိမ့်မည်။ သူတို့သည် အချိန်အလိုက် ဖြစ်ရပ်များကို မည်သို့စူးစမ်းရမည်ကိုလည်း လေ့လာပါလိမ့်မည်။

• အပင်များအကြောင်း ပြောပြပြီး အပင်အစိတ်အပိုင်းများအကြောင်း ပြောကြပါ။
• အစေ့များကို အတူတကွ စိုက်ကြပါ
• အပင်ကြီးထွားလာပုံကို နံနက်တိုင်း စစ်ပါ
• စျေး၌ သစ်သီးနှင့် ဟင်းသီးဟင်းရွက်များ အကြောင်းကို ပြောပြပါ

တိရစ္ဆာန်ရုပ်များကို ကြိုးထိုးပေးခြင်း

ကနဦး ကလေးဘဝ အရွယ်သည် လက်များ၊ လက်ချောင်းများ၊ လက်ကောက်ဝတ်များ၊ ခြေထောက်နှင့် ခြေချောင်းများရှိ ကြွက်သားငယ်များအပေါ် ပိုမိုထိန်းချုပ်မှု စတင်လုပ်သော အချိန်အခါဖြစ်သည်။ လက်များနှင့် လက်ချောင်းများရှိ အနုစိတ်ကြွက်သား ဖွံ့ဖြိုးလာခြင်းသည် ကလေးများ၏ မိမိကိုယ်ကို စောင့်ရှောက်ခြင်းနှင့် နောင်တွင် စာရေးခြင်းအတွက် အရေးကြီးပါသည်။ သင့်ကလေးသည် သူတို့၏ အနုစိတ်ကြွက်သား လှုပ်ရှားမှုကို ပလေးဒိုး အသုံးပြုခြင်း၊ ရောင်စုံခဲတံများသုံးခြင်းနှင့် တိရစ္ဆာန်ရုပ်များ ကြိုးထိုးပေးခြင်းအားဖြင့် ဖွံ့ဖြိုးပေးနိုင်သည်။ အနုစိတ်ကြွက်သား လှုပ်ရှားမှုကို လေ့ကျင့်နိုင်သော နည်းလမ်း အချို့ရှိသည်-

• တိရစ္ဆာန်၏ အပေါက်အတွင်း ကြိုးကို ထိုးသွင်းပါ
• သူငယ်တန်းလက်စွဲအိတ်ကို ဖွင့်ပိတ်ခြင်း
• ဇစ်ပိတ်ခြင်း သို့မဟုတ် ကြယ်သီးတပ်ခြင်းဖြင့် လေ့ကျင့်ပါ
• လက်နှင့် လက်ချောင်းများကိုသုံးခြင်းဖြင့် ပလေးဒိုးကို လိမ့်ခြင်း

ပလေးဒိုး

ကလေးတစ်ဦးသည် ဖန်တီးရန် ပလေးဒိုးကို သုံးနေသည့်အခါ အလွန် အရေးကြီးသည့် အောက်ပါ အရာအမျိုးမျိုးကို လုပ်နေပါသည်-

• အနုစိတ်ကြွက်သား လှုပ်ရှားမှု ကောင်းစေခြင်း
• စူးစမ်းရန် ၎င်းတို့၏ သိမှုအာရုံများကို အသုံးပြုခြင်း
• ၎င်းတို့၏ စိတ်ကူးစိတ်သန်းများကို ဖော်ဆောင်နေခြင်း

ပလေးဒိုးဖြင့် တီထွင်ခြင်းသည် သင့်ကလေး ပညာသင်ယူရေး၏ အရေးကြီးသော အပိုင်းဖြစ်သည်။

• အလုံးလုပ်လိုက်၊ ရိုက်ချလိုက်၊ ထုချလိုက်၊ အသံလေးထွက်အောင် ညှစ်ချလိုက်။
• လုပ်နေတဲ့ အကြောင်း ပြောပါ
• တခြား အရာများကိုထည့်ပါ ၎င်းတို့မှာ တုတ်ချောင်းများ သို့မဟုတ် ငှက်တောင်များ သို့မဟုတ် ခရုခွံများဖြစ်သည်
• သင် တွေ့နိုင်သည့်အရာများဖြင့် အလှအပပုံစံများ လုပ်ပါ

ကလေးစာအုပ်များ

အတူတကွ စာအုပ်ဖတ်ခြင်းသည် မိသားစုတစ်ခုအဖြစ် ရင်းနှီးခင်တွယ်သည့်နှောင်ကြိုးဖွဲ့ရန်နှင့် အတူတကွအချိန်ဖြုန်းနေရန် ကောင်းသောနည်းလမ်းတစ်ခုဖြစ်သည်။ ၎င်းသည် စာတတ်မြောက်မှုကို ပံ့ပိုးပေးရန် အရေးကြီးဆုံး နည်းလမ်းများအနက် တစ်ခုဖြစ်ပါသည်။ သင့်ကလေးနှင့်အတူ ပုံမှန် ပုံပြောပေးခြင်းအားဖြင့် ၎င်းတို့အဖို့ စိတ်ကူးစိတ်သန်းနှင့် စကားလုံး ဝေါဟာရကို ကြွယ်ဝစေပါမည်။

• စာအုပ်တစ်အုပ်ကို အတူတကွ ရွေးပါ
• အေးအေးဆေးဆေး ထိုင်ပြီး စာဖတ်ရန် အဆင်ပြေမည့် နေရာတစ်ခုကို ရှာပါ
• သူတို့အား စာမျက်နှာများကို လှန်ခိုင်းပါ
• အသံ အမျိုးအမျိုးကို စာအုပ် ဇာတ်ကောင်များအတွက် သုံးပါ၊ ရုပ်ပုံများအကြောင်း ပြောပါ

တေးဂီတ ဖန်တီးမှုများ

တေးဂီတသည် ကလေးများ၏ ပညာသင်ယူခြင်းနှင့် ဖွံ့ဖြိုးမှုအတွက် အကျိုးများစွာ ရှိပါသည်။ တေးဂီတကို ဖန်တီးခြင်းသည် စကားလုံး အသစ်များကို လေ့လာရန်၊ မိသားစုနှင့်အတူ သီချင်းများ သီဆိုရန် နှင့် ၎င်းတို့အဖို့ ကျေနပ်နှစ်သိမ့်စေရန်အတွက် ပျော်ရွှင်စရာကောင်းသော နည်းလမ်းတစ်ခုဖြစ်ပါသည်။ ကခြင်း၊ သီချင်းဆိုခြင်း၊ လှုပ်နေခြင်း၊ ခုန်နေခြင်းနှင့် လက်ချပ်တီးမုတ်ကိရိယာကို နှိပ်နေခြင်းတို့အားလုံး ပျော်ရွှင်စရာ ကောင်းပါသည်။

သင့်ကလေးနှင့်အတူ တေးဂီတဖြင့် ပျော်ရွှင်စေရန် အကြံဉာဏ် အချို့ရှိသည်၊ ၎င်းတို့မှာ-

• သင့်အကြိုက် သီချင်းနှင့် ကပါ၊ ခုန်ပါ
• နံပါတ်အရေအတွက်ကို သင်ကြားပေးရန်စည်းချက်များ ရေတွက်ပါ
• သံစုံသီချင်းများကို သီဆိုလေ့ကျင့်ပါ
• လက်ချပ်တီးမုတ်ကိရိယာများ ကို စကားလုံးများရှိ အက္ခရာစဉ်များ ရေတွက်ရန်သုံးပါ

လုပ်စရာများပါရှိသည့် လက်စွဲအိတ်

လုပ်စရာများပါရှိသည့် လက်စွဲအိတ်သည် စာအုပ်များနှင့် ကစားစရာအရုပ်များကို ထည့်ထားသည့် အိတ်သာ မကပါ - ၎င်းကို ပညာသင်ယူခြင်းနှင့် ဖွံ့ဖြိုးရေးကို ပံ့ပိုးရန် နည်းလမ်းများစွာဖြင့် အသုံးပြုနိုင်ပါသည်။ သင်ပုန်းဖြူ မျက်နှာပြင်မှာ သံလိုက်ပါသည့်ကစားစရာ၊ ပလေးဒိုးနှင့် ပုံဆွဲခြင်းအတွက် ကောင်းပါသည်။ လက်စွဲအိတ်ကို ပန်းချီတင်ဒေါက်အဖြစ် ခေါက်လိုက်ပါ။ လက်စွဲအိတ်ကို ဖြန့်လိုက်ပါ၊ ထိုအခါ အစိမ်းရောင် မျက်နှာပြင်ကို စိတ်ကူးယဥ် ကစားရန်အတွက် အသုံးပြုနိုင်သည်။ ၎င်းမှာ သမုဒ္ဒရာ မြင်ကွင်း သို့မဟုတ် မြို့တွင်းလမ်း မြင်ကွင်း ဖြစ်သွားနိုင်သည်။ သူငယ်တန်းသို့ သွားသည့်လမ်းကြောင်းကို ပြန်ပုံဖော်-ဖန်တီးပါ။ လက်စွဲအိတ်ကို သုံးရန် အခြား နည်းလမ်းအချို့ရှိသည်။

• ကမ္ဘာသစ်ပုံကို ဆွဲပါ
• ပလေးဒိုးကစားရန်ဖျာ
• စာအုပ်များ သို့မဟုတ် ကစားစရာအရုပ်များကိုသယ်ရန် လက်စွဲအိတ်
• ဟန်ဆောင်လုပ်ထားသော ကစားစရာ ပစ္စည်း

လုပ်စရာ လက်စွဲအိတ်ကို ပတ်ဝန်းကျင်နှင့် ယဥ်ပါးသည့် ပစ္စည်းအဖြစ် ပုံဖော်ထားသည်။ ၎င်းကို ပြန်လည်အသုံးချပစ္စည်းများဖြင့် တတ်နိုင်သမျှ လုပ်ထားပြီး သင့်ကလေး၏ သူငယ်တန်း အမှတ်တရ သိမ်းထားရန် ပစ္စည်းအဖြစ်ရည်ရွယ်၍ လုပ်ထားသည်။

လူမှု့အသိုင်းအဝိုင်းအား တည်ဆောက်ခြင်း

ဗစ်တိုးရီးယားပြည်နယ်သည် ကွဲပြားခြားနားကျယ်ပြန့်သည့် လူမှု့အသိုင်းအဝိုင်းဖြစ်သည်၊ ယဥ်ကျေးမှု များစွာနှင့် ပြောဆိုသည့် ဘာသာစကား အမျိုးမျိုးတို့၏ အခြေစိုက်ရာ နေရာဖြစ်ပါသည်။ ကွဲပြားခြားနားကျယ်ပြန့်မှုသည် ကျွန်ုပ်တို့ မည်သူဖြစ်သည်ကို ဖော်ဆောင်သည့် ကြီးကျယ်သော အပိုင်းတစ်ရပ်ဖြစ်သည်။ လက်စွဲအိတ်ပါ အရာပစ္စည်းများသည် လူမှု့အသိုင်းအဝိုင်း အမျိုးမျိုးအကြောင်း ပြောဆိုစကားပွဲများကို ပံ့ပိုးပေးသည်။

• ကလေးများ အဖို့ ကစားခြင်းနှင့် သင်ယူခြင်းသည် ဒွန်တွဲလျက်ရှိသည်။ ကလေးများသည် မိမိတို့အကြောင်းကို ကစားခြင်းအားဖြင့် တွေ့ရှိပြီး သင်ယူကြသည်။
• ပလေးဒိုးကို အခြား ယဥ်ကျေးမှုများ သို့မဟုတ် သင့်ကိုယ်ပိုင်ယဥ်ကျေးမှုမှ အစားအစာကို ဟန်ဆောင်လုပ်ရန်အတွက် အသုံးပြုပါ
• ရိုးရာတေးသီချင်းအားအခြား ယဥ်ကျေးမှုများ သို့မဟုတ် သင့်ကိုယ်ပိုင် ယဥ်ကျေးမှုမှ နားထောင်နေစဉ် လက်ချပ်တီး စည်းဝါးကို နှိပ်ပေးပါ
• သင့်ကလေးအား အခြား နိုင်ငံများနှင့် ၎င်းတို့၏ ဒေသခံ တိရစ္ဆာန်များအကြောင်း ပြောပြပါ

လက်ဟန်ပြ (Auslan) နည်းဖြင့် ဖတ်နိုင်သည့် စာအုပ်များ

၂၀၂၃ ခုနှစ် သူငယ်တန်း လက်စွဲအိတ်ပါ စာအုပ် အားလုံးကို လက်ဟန်ပြ (Auslan) ဘာသာပြန်ဆိုထားချက်များဖြင့် ရနိုင်ပါသည်။ လက်ဟန်ပြ (Auslan) နှင့် စာတမ်းထိုးကိုလည်း ဗီဒီယိုတွင် ပါရှိပါသည်။

လက်ဟန်ပြ (Auslan) မှာ အချက်ပြ ဘာသာစကားဖြစ်ပြီး သြစတြေးလျန်း နားမကြားသူ အများစုက အသုံးပြုကြပြီး အချို့ လေးနှစ်အရွယ် သူငယ်တန်းများတွင် ရရှိနိုင်သော ဗစ်တိုးရီးယားပြည်နယ်၏ ကနဦး ကလေးဘဝအရွယ် ဘာသာစကား အစီအစဉ်၏ တစ်စိတ်တစ်ပိုင်းလည်းဖြစ်ပါသည်။

ပညာရေး ကျွမ်းကျင်သူများက ရှာဖွေတွေ့ရှိခဲ့သည်မှာ အသက်ငယ်ရွယ်စဉ်၌ ဘာသာစကား နောက်တစ်ခုကို သင်ယူသည့် ကလေးများအဖို့ အကျိုးများစွာ ရှိကြသည်ဟုဆိုပါသည်၊ ၎င်းအကျိုးများတွင် အပါအဝင်ဖြစ်သည်မှာ-

• စာမဖတ်တတ် မရေးတတ်မီ စွမ်းရည်များ တိုးပွားခြင်း
• သိမှုအာရုံ လိုက်လျောညီထွေမှုရှိခြင်း
• ပင်ကိုယ်အရည်အသွေးနှင့် ကျန်းမာရွှင်လန်းမှု တိုးမြှင့်ခြင်း
• ယဥ်ကျေးမှုဆိုင်ရာ တည်ရှိမှု အားသန်ခြင်း

ပင်ကိုယ်တည်ရှိမှုကို လေးစားလက်ခံခြင်း

ကျွန်ုပ်တို့ နိုင်ငံ မူရင်း လူမျိုးများ၏ယဥ်ကျေးမှုများသည် သြစတြေးလျနိုင်ငံ့သမိုင်း၏ အရေးကြီးသော အစိတ်အပိုင်းတစ်ရပ်ဖြစ်သည်။ ကလေး အားလုံးအား ယဥ်ကျေးမှု အားလုံးအကြောင်း လေ့လာဆည်းပူးရန် တိုက်တွန်းအားပေးခြင်းသည် နားလည်မှု၊ လက်ခံမှု နှင့် ဂုဏ်သိက္ခာကို ဆောက်တည်ရာရောက်ပါသည်။ ဤလက်စွဲအိတ်၌ ကျွန်ုပ်တို့ နိုင်ငံ မူရင်း စာဆိုများနှင့် တိုင်းပြုပြည်ပြုသူများအား ဂုဏ်ပြုရသည်ကို ကျွန်ုပ်တို့ ဂုဏ်ယူပါသည်။ ဥပမာ၊ ပုံအကြောင်းပါ အန်စာတုံးများသည် အဘိုရင်ဂျင်းလူမျိုး ပုံပြောခြင်း၏ တက်ကြွသော ရိုးရာဓလေ့ကို သရုပ်ဖော်ထားပါသည်။ သင့်ကလေးအား နိုင်ငံ မူရင်း လူမျိုးများ၏ ရိုးရာဓလေ့များနှင့် ယဥ်ကျေးမှုများအကြောင်း ပိုမိုလေ့လာစေမည့် လေ့လာစရာ အချို့ ရှိပါသည်၊ ၎င်းတို့မှာ -

• အဘိုရင်ဂျင်းလူမျိုး၏ တိရစ္ဆာန်များ သို့မဟုတ် အရာပစ္စည်းများအတွက် သရုပ်ဖော်သင်္ကေတများကို လေ့လာပါ
• အဘိုရင်ဂျင်းလူမျိုး ခေါင်းဆောင်များ သို့မဟုတ် အားကစား ထူးချွန်သူများ အကြောင်းကို ပြောဆိုပါ
• နိုင်ငံ မူရင်းလူမျိုးများ၏ ယဉ်ကျေးမှုများနှင့် လူများအကြောင်းကို ပိုမိုလေ့လာပါ

ကျန်းမာရွှင်လန်းရေးနှင့် ပံ့ပိုးမှုအပို

ကလေးအားလုံးသည် မတူကွဲပြားစွာဖြင့် လေ့လာသင်ယူကြပြီး ၎င်းတို့၏ ကိုယ်ပိုင် လေ့လာနိုင်သည့်အတိုင်းအတာအရ လေ့လာဆည်းပူးကြပါသည်။ သူငယ်တန်း လက်စွဲအိတ်တွင် စွမ်းရည်အားလုံးကို စိန်ခေါ်ရန် အမျိုးမျိုးသော နည်းလမ်း အများအပြား၌ အသုံးပြုနိုင်သည့် သင့်ကလေးအတွက် စာအုပ်များနှင့် ကစားစရာ အရုပ်များ ထည့်ပေးထားပါသည်။ သို့သော် တစ်ခါတစ်ရံ၌ သင့်ကလေး၏ ပညာသင်ယူရေးအတွက် အပို ပံ့ပိုးမှု သင် လိုအပ်ပါသည်။ သင် သို့မဟုတ် သင့်ကလေးသည် အပို ပံ့ပိုးမှုအချို့ လိုအပ်နိုင်သည်ဟု သင် ထင်မြင်လျှင် သင် လုပ်နိုင်သည့် နည်းလမ်းများရှိပါသည်၊ ၎င်းတို့မှာ -

• ဗစ်တိုးရီးယားပြည်နယ်၏ သူငယ်တန်း ဆရာဆရာမများတွင် ကူညီပေးရန် ကျွမ်းကျင်မှုများနှင့် ဗဟုသုတ ရှိကြပါသည်။ သင့် မေးခွန်းများနှင့်ပတ်သက်၍ သင့်ကလေး၏ ဆရာဆရာမနှင့် ပြောဆိုပါ
• သင့်မေးခွန်းကို ဆွေးနွေးရန်အတွက် သင့် ဆရာဝန် သို့မဟုတ် မိခင်နှင့်ကလေး ကျန်းမာရေး သူနာပြုနှင့်တွေ့ဆုံရန် ရက်ချိန်းယူပါ
• မိဘဖုန်းလိုင်း (Parentline) ဖုန်း 13 2289 ကို အခမဲ့၊ လျှို့ဝှက်စွာပြုလုပ်ပေးသည့်နှစ်သိမ့်ဆွေးနွေးမှုနှင့် ပံ့ပိုးမှုအတွက် ဖုန်းခေါ်ဆိုပါ