ܫܡܹܥܡܘܼܢ ܒܘܼܕ ܓܲܢܬܵܐ ܕܫܲܒ݂̈ܪܹܐ ܩܵܐ ܫܲܒ݂̈ܪܹܐ ܕܒܥܘܼܡܪܵܐ ܕܬܠܵܬ ܫܸܢܹ̈ܐ ܘܓܲܢܬܵܐ ܕܫܲܒ݂̈ܪܹܐ ܕܫܘܼܪܵܝܵܐ ܒܟ݂ܝܼܪܵܝܵܐ.
Transcripts
ܓܲܢܲܬ ܫܲܒ݂ܖܹ̈ܐ (ܟܸܢܕܵܐ)، ܐܵܦ ܝܕܝܼܥܬܵܐ ܐܲܝܟ݂ ‘ܓܲܢܲܬ ܫܲܒ݂ܖܹ̈ܐ’ ܐܵܘ ‘ܝܘܼܠܦܵܢܵܐ ܒܟ݂ܝܼܪܵܝܵܐ ܕܫܲܒ݂ܪܘܼܬܵܐ’ ، ܝܼܠܹܗ ܚܲܕ݉ ܣܲܗܡܵܐ ܐܵܢܲܢܩܵܝܵܐ ܕܛܘܼܘܵܪܵܐ ܘܝܘܼܠܦܵܢܵܐ ܕܫܲܒ݂ܪܵܘܟ݂ܘܿܢ. ܡܣܲܓ݂ܲܠܬܵܐ ܕܫܲܒ݂ܪܵܘܟ݂ܘܿܢ ܓܵܘ ܚܘܼܪܙܵܐ ܕܓܲܢܲܬ ܫܲܒ݂ܖܹ̈ܐ ܩܵܐ ܡܸܬܚܵܐ ܕܬܲܪܬܹܝܢ ܫܸܢܹ̈ܐ ܡܵܨܹܐ ܕܗܲܝܸܪ ܠܡܛܲܘܲܪܬܵܐ ܕܡܗܝܼܖ̈ܘܼܝܵܬܵܝܗܝ ܩܵܐ ܕܥܵܒܕܝܼ ܨܦܵܝ ܓܵܘ ܚܲܝܘܼܬܵܐ ܘܡܲܕܪܲܫܬܵܐ.
ܣܵܥܲܬܹ̈ܐ ܕܓܲܢܲܬ ܫܲܒ݂ܖܹ̈ܐ (ܟܸܢܕܵܐ):
ܚܘܼܖ̈ܙܹܐ ܕܓܲܢܲܬ ܫܲܒ݂ܖܹ̈ܐ (ܟܸܢܕܵܐ) ܕܬܠܵܬܵܐ-ܫܸܢܹ̈ܐ- ܝܼܢܵܐ ܩܵܐ ܡܸܬܚܵܐ ܒܹܝܠ 5 ܘ 15 ܣܵܥܲܬܹ̈ܐ ܒܟܠ ܫܵܒ݂ܘܿܥܵܐ ܘܚܘܼܖ̈ܙܹܐ ܕܓܲܢܲܬ ܫܲܒ݂ܖܹ̈ܐ (ܟܸܢܕܵܐ) ܕܐܲܪܒܥܵܐ-ܫܸܢܹ̈ܐ- ܝܼܢܵܐ ܩܵܐ ܡܸܬܚܵܐ ܕ15 ܣܵܥܲܬܹ̈ܐ.
ܦܠܵܛܹ̈ܐ ܡܫܘܿܪܸܖܹ̈ܐ:
ܫܲܒ݂ܖܹ̈ܐ ܕܟܹܐ ܐܵܙܠ݉ܝܼ ܠܚܲܕ݉ ܚܘܼܪܙܵܐ ܕܓܲܢܲܬ ܫܲܒ݂ܖܹ̈ܐ ܩܵܐ ܕܡܛܲܘܸܪܝܼ ܠܡܗܝܼܖ̈ܘܼܝܵܬܹܐ ܐܲܝܟ݂ ܕܵܐܟ݂ܝܼ ܕܡܵܢܝܼ ܘܝܵܕܥܝܼ ܠܖ̈ܲܩܡܹܐ ܘܐܵܬܘܵܬܹ̈ܐ، ܘܕܵܐܟ݂ܝܼ ܫܵܪܝܼ ܠܩܸܛܖܹ̈ܐ. ܫܲܒ݂ܪܵܘܟ݂ܘܿܢ ܒܸܕ ܒܵܢܹܐ ܗܲܝܡܵܢܘܼܬܵܐ ܒܓܵܢܵܐ ܘܫܲܪܝܘܼܬܵܐ ܓܵܘ ܓܲܢܲܬ ܫܲܒ݂ܖܹ̈ܐ ܘܝܵܠܹܦ ܡܗܝܼܖ̈ܘܼܝܵܬܹܐ ܫܵܘܬܵܦܵܝܹ̈ܐ ܘܖܸ̈ܓ݂ܫܵܢܵܝܹܐ. ܐܵܢܝܼ ܒܸܕ ܫܵܘܬܸܦܝܼ ܘܗܵܘܹܐ ܠܗ݉ܘܿܢ ܚܲܒ݂ܖ̈ܵܘܵܬܹܐ ܚܲܕܬܹ̈ܐ.
ܒܘܼܨܵܝܵܐ ܡܲܚܙܘܿܝܹܐ ܝܠܹܗ ܕܟܲܕ ܒܥܘܼܡܪܵܐ ܕ16 ܫܸܢܹ̈ܐ، ܬܲܠܡܝܼܕܹ̈ܐ ܕܗܕܝܼܖܹ̈ܐ ܝܗܘܵܘ ܓܵܘ ܚܲܕ݉ ܚܘܼܪܙܵܐ ܕ ܓܲܢܲܬ ܫܲܒ݂ܖܹ̈ܐ (ܟܸܢܕܵܐ) ܩܵܐ ܡܸܬܚܵܐ ܕܬܲܪܬܹܝܢ ܐܵܘ 3 ܫܸܢܹ̈ܐ ܡ݂ܢ ܩܲܕ݉ܡ ܕܫܲܪܝܼ ܝܗ݉ܘܵܘ ܠܡܲܕܪܲܫܬܵܐ ܫܩܝܼܠ ܠܗ݉ܘܿܢ ܕܲܖ̈ܓܹܐ ܒܘܼܫ ܥܸܠܵܝܹ̈ܐ ܓܵܘ ܠܸܫܵܢܵܐ ܐܸܢܓܠܝܼܣܵܝܵܐ ܘܡܲܢܵܝܘܼܬܵܐ ܡ݂ܢ ܐܵܢܝܼ ܬܲܠܡܝܼܕܹ̈ܐ ܕܠܵܐ ܝܗ݉ܘܵܘ ܗܕܝܼܪܹܐ ܠܓܲܢܲܬ ܫܲܒ݂ܖܹ̈ܐ (ܟܸܢܕܵܐ).
ܕܵܐܟ݂ܝܼ ܟܹܐ ܦܵܠܚܝܼ ܐܲܒ݂ܵܗܹ̈ܐ ܘܡܲܠܦܵܢܹ̈ܐ ܕܓܲܢܲܬ ܫܲܒ݂ܖܹ̈ܐ ܥܲܡ ܚܕܵܕܹ̈ܐ:
ܓܲܢܲܬ ܫܲܒ݂ܖܹ̈ܐ (ܟܸܢܕܵܐ) ܟܹܐ ܦܵܠܚܵܐ ܒܘܼܫ ܨܦܵܝ ܐܲܝܟ݂ ܚܕܵܐ ܫܲܪܝܼܟܘܼܬܵܐ ܒܹܝܠ ܐܲܒ݂ܵܗܹ̈ܐ/ܝܵܨܘܿܦܹ̈ܐ، ܒܲܝܬܘܼܝܵܬܹ̈ܐ ܘܡܲܠܦܵܢܹ̈ܐ. ܐܲܝܟ݂ ܐܲܒ݂ܵܗܹ̈ܐ/ܝܵܨܘܿܦܹ̈ܐ، ܐܲܚܬܘܿܢ ܝܼܬܘܿܢ ܗ̇ܘ ܣܲܗܡܵܐ ܒܘܼܫ ܐܵܢܲܢܩܵܝܵܐ ܕܛܘܼܘܵܪܵܐ ܕܫܲܒ݂ܪܵܘܼܟ݂݂ܘܿܢ. ܐܲܚܬܘܿܢ ܟܹܐ ܡܲܠܦܝܼܬܘܿܢ ܠܗ݉ܘܿܢ ܦܘܼܪܫܘܼܢܝܵܐ ܒܹܝܠ ܬܪܝܼܨܘܼܬܵܐ ܡ݂ܢ ܚܸܠܛܵܐ، ܠܸܫܵܢܵܘܟ݂ܘܿܢ، ܡܲܪܕܘܼܬܵܘܟ݂ܘܿܢ ܘܝܲܩܝܼܖ̈ܘܵܬܵܘܟ݂ܘܿܢ ܐܲܝܟ݂ ܪܵܚܡܘܼܬܵܐ ܘܐܝܼܩܵܪܵܐ. ܡܲܠܦܵܢܹ̈ܐ ܒܸܕ ܗܲܡܙܸܡܝܼ ܥܲܡܵܘܟ݂ܘܿܢ ܒܘܼܕ ܡܵܐ ܝܠܹܗ ܒܪܵܝܵܐ ܓܵܘ ܓܲܢܲܬ ܫܲܒ݂ܖܹ̈ܐ ܘܐܘܼܖ̈ܚܵܬܹܐ ܩܵܐ ܗܲܝܲܪܬܵܐ ܕܫܲܒ݂ܪܵܘܟ݂ܘܿܢ ܩܵܐ ܬܲܡܸܡ ܝܘܠܦܵܢܵܐ ܓܵܘ ܒܲܝܬܵܐ. ܒܵܥܝܼ ܕܝܵܕܥܝܼ ܒܘܼܕ ܒܘܼܣܵܡܹ̈ܐ ܕܫܲܒ݂ܪܵܘܟ݂ܘܿܢ ܘܕܵܐܟ݂ܝܼ ܒܵܥܝܼ ܕܝܵܠܦܝܼ.
ܡܵܨܝܼܬܘܿܢ ܛܵܠܒܝܼܬܘܿܢ ܡ݂ܢ ܡܲܠܦܵܢܵܐ ܕܓܲܢܲܬ ܫܲܒ݂ܖܹ̈ܐ ܕܫܲܒ݂ܪܵܘܟ݂ܘܿܢ ܩܵܐ ܕܡܲܪܝܸܙܝܼ ܚܲܕ݉ ܬܲܪܓܸܡܵܢܵܐ ܒܟܠ ܥܸܕܵܢܵܐ ܕܗܵܘܝܵܐ. ܐܵܗܵܐ ܩܵܘܡܵܐ ܕܗܵܘܝܵܐ ܒܕܘܼܟܬܵܐ ܕܓܲܢܲܬ ܫܲܒ݂ܖܹ̈ܐ ܐܵܘ ܒܐܘܼܪܚܵܐ ܕܬܹܠܝܼܦ̮ܘܿܢ ܐܵܘ ܒܒ݂ܝܼܕܝܘܼ. ܒܲܝܬܘܼܝܵܬܹ̈ܐ ܠܹܐ ܦܵܪܥܝܼ ܚܲܕ ܡܸܢܕܝܼ ܩܵܐ ܡܲܦܠܲܚܬܵܐ ܕܐܵܗܵܐ ܚܸܠܡܲܬ.
ܡܵܐ ܟܹܐ ܒܵܪܹܐ ܓܵܘ ܓܲܢܲܬ ܫܲܒ݂ܖܹ̈ܐ:
ܡܲܠܦܵܢܹ̈ܐ ܟܹܐ ܡܚܲܦܛܝܼ ܠܫܲܒ݂ܖܹ̈ܐ ܕܝܵܠܦܝܼ ܒܐܘܼܪܚܵܐ ܕܛܲܐܲܠܬܵܐ. ܥܵܒ݂ܘܿܕܘܼܝܵܬܹ̈ܐ ܩܵܘܡܵܐ ܕܚܵܒ݂ܫܝܼ ܪܫܵܡܵܐ، ܙܡܵܪܵܐ، ܟ̰ܪܵܚܵܐ، ܚܦܵܪܵܐ ܘܪܚܵܛܵܐ ܠܒܲܕܲܪ، ܛܲܐܲܠܬܵܐ ܒܛܲܐܲܠܝܵܬܹ̈ܐ ܘܩܪܵܝܬܵܐ ܕܟܬܵܒܹ̈ܐ. ܛܲܐܲܠܬܵܐ ܟܹܐ ܡܚܲܦܛܵܐ ܠܫܲܒ݂ܖܹ̈ܐ ܕܡܲܦܠܸܚܝܼ ܨܲܠܡܲܢܬܵܝܗܝ ܘܥܵܒ݂ܕܝܼ ܡܲܫܟ݂ܲܚܝܵܬܹ̈ܐ، ܟܲܕ ܗܲܪ ܒܗ̇ܝ ܥܸܕܵܢܵܐ ܐܵܢܝܼ ܦܠܵܚܵܐ ܝܢܵܐ ܥܲܡ ܐ݉ܚܖܹ̈ܢܹܐ ܒܐܘܼܪܚܵܐ ܕܫܲܪܲܟܬܵܐ ܘܫܩܵܠܬܵܐ ܕܢܵܘܒܹ̈ܐ. ܫܲܒ݂ܖܹ̈ܐ ܒܸܕ ܝܵܠܦܝܼ ܒܘܼܕ ܩܵܠܹ̈ܐ، ܚܲܒܖ̈ܵܢܹܐ ܘܠܸܫܵܢܵܐ، ܒܸܚܒ݂ܵܫܵܐ ܕܵܐܟ݂ܝܼ ܗܲܡܙܸܡܝܼ ܘܦܲܪܡܝܼ ܠܸܫܵܢܵܐ ܐܸܢܓܠܸܣܢܵܝܵܐ.
ܫܲܒ݂ܖܹ̈ܐ ܕܓܲܢܹ̈ܐ ܕܫܲܒ݂ܖܹ̈ܐ ܝܼܢܵܐ ܚܲܕ݉ ܣܲܗܡܵܐ ܡ݂ܢ ܟܢܘܼܫܬܲܢ ܣܲܓܝܼ ܡܲܪܕܘܼܢܵܝܬܵܐ:
ܚܘܼܖ̈ܙܹܐ ܕܓܲܢܲܬ ܫܲܒ݂ܖܹ̈ܐ ܟܹܐ ܩܲܒܠܝܼ ܒܫܲܝܢܵܐ ܠܐܲܒ݂ܵܗܹ̈ܐ ܡ݂ܢ ܟܠܵܝܗܝ ܒܵܬܖ̈ܵܝܘܼܝܵܬܹܐ ܩܵܐ ܕܗܵܘܝܼ ܣܲܗܡܵܐ ܕܟܢܘܼܫ̈ܝܵܬܵܝܗܝ. ܐܵܢܝܼ ܝܼܢܵܐ ܚܕܵܐ ܕܘܼܟܬܵܐ ܐܲܝܟܵܐ ܕܡܵܨܝܼ ܐܲܒ݂ܵܗܹ̈ܐ ܕܬܵܦܩܝܼ ܘܫܲܪܸܟܝܼ ܒܬܘܼܢܵܝܹ̈ܐ ܘܝܵܠܦܝܼ ܡ݂ܢ ܚܕܵܕܹ̈ܐ.
ܡܲܠܦܵܢܹ̈ܐ ܒܵܥܝܼ ܕܝܵܕܥܝܼ ܒܘܼܕ ܫܲܒ݂ܪܵܘܟ݂ܘܿܢ ܘܡܲܪܕܘܼܬܵܘܟ݂ܘܿܢ. ܐܵܗܵܐ ܒܸܕ ܗܲܝܸܪܵܐ ܠܗ݉ܘܿܢ ܕܗܵܕܪܝܼ ܠܚܘܼܖ̈ܙܹܐ ܕܝܼܢܵܐ ܡܵܖܹ̈ܐ ܕܡܲܥܢܵܝܵܐ ܩܵܐ ܫ݂ܲܒ݂ܪܵܘܟ݂ܘܿܢ، ܒܸܚܒ݂ܫܵܐ ܥܵܒ݂ܘܿܕܘܼܝܵܬܹ̈ܐ ܒܸܢܝܹ̈ܐ ܥܲܠ ܝܵܘܡܵܢܹ̈ܐ ܘܩܲܘܲܡܝܵܬܹ̈ܐ ܡܲܪܕܘܼܬܵܢܵܝܹܐ ܘܙܲܝܸܚܝܼ ܦܪܝܼܫܘܼܬܵܐ ܓܵܘ ܒ݂ܝܼܟܬܘܿܪܝܵܐ.
ܡܲܠܦܵܢܹ̈ܐ ܟܹܐ ܚܵܒ݂ܫܝܼ ܟܠܚܲܕ݉ ܓܵܘ ܥܵܒ݂ܘܿܕܘܼܝܵܬܹ̈ܐ، ܩܵܐ ܕܫܲܒ݂ܖܹ̈ܐ ܕܠܵܐ ܗܲܡܙܸܡܝܼ ܒܠܸܫܵܢܵܐ ܐܸܢܓܠܸܣܢܵܝܵܐ ܕܗܵܘܹܐ ܠܗ݉ܘܿܢ ܐܵܢܝܼ ܦܘܼܖ̈ܣܲܬܹܐ ܕܛܲܐܠܝܼ ܘܝܵܠܦܝܼ ܐܲܝܟ݂ ܐ݉ܚܖܹ̈ܢܹܐ. ܚܲܕ݉ܟܡܵܐ ܚܘܼܖ̈ܙܹܐ ܕܓܲܢܲܬ ܫܲܒ݂ܖܹ̈ܐ ܐܝܼܬܠܗ݉ܘܿܢ ܡܲܠܦܵܢܹ̈ܐ ܕܟܹܐ ܗܲܡܙܸܡܝܼ ܒܬܪܹܝܢ ܠܸܫܵܢܹ̈ܐ ܕܡܵܨܝܼ ܗܲܝܸܪܝܼ ܩܵܐ ܫܲܒ݂ܖܹ̈ܐ ܕܟܹܐ ܗܲܡܙܸܡܝܼ ܚܲܕ݉ܟ̰ܵܐ ܐܵܘ ܗܸܟ̰̰ ܡܸܢܕܝܼ ܒܠܸܫܵܢܵܐ ܐܸܢܓܠܸܣܢܵܝܵܐ. ܫܲܒ݂ܖܹ̈ܐ ܐܵܦ ܝܼܢܵܐ ܡܘܿܠܦܹ̈ܐ ܕܚܵܒ݂ܛܝܼ ܘܩܲܒܠܝܼ ܠܐ݉ܚܖܹ̈ܢܹܐ ܘܡܝܲܩܪܝܼ ܠܫܘܼܚܠܵܦܹ̈ܐ ܡܲܖ̈ܕܘܼܬܵܢܵܝܹܐ.
ܦܸܨܠܹ̈ܐ ܕܚܘܼܖ̈ܙܹܐ ܕܓܲܢܲܬ ܫܲܒ݂ܖܹ̈ܐ (ܟܸܢܕܵܐ)
ܫܲܒ݂ܖܹ̈ܐ ܟܹܐ ܡܵܨܝܼ ܗܵܕܪܝܼ ܠܚܲܕ݉ ܚܘܼܪܙܵܐ ܕܓܲܢܲܬ ܫܲܒ݂ܖܹ̈ܐ ܕܬܠܵܬܵܐ-ܫܸܢܹ̈ܐ- ܓܵܘ ܩܸܢܛܪܘܿܢ ܕܝܲܨܝܼܦܘܼܬܵܐ ܕܝܵܘܡܵܐ ܝܲܪܝܼܟ݂ܵܐ (ܐܵܦ ܦܝܼܫܬܵܐ ܝܠܵܗ̇ ܝܕܝܼܥܬܵܐ ܐܲܝܟ݂ ܓܲܢܲܬ ܫܲܒ݂ܖܹ̈ܐ) ܐܵܘ ܓܵܘ ܚܕܵܐ ܚܸܠܡܲܬ ܕܓܲܢܲܬ ܫܲܒ݂ܖܹ̈ܐ ܫܪܝܼܬܵܐ (ܐܵܦ ܦܝܼܫܬܵܐ ܝܠܵܗ̇ ܝܕܝܼܥܬܵܐ ܐܲܝܟ݂ ܐܲܩܡܵܝܬܵܐ). ܐܲܢܹܐ ܚܸܠܡܲܬܹ̈ܐ ܥܝܵܕܵܐܝܼܬ ܐܵܦ ܟܹܐ ܡܲܩܪܸܒ݂ܝܼ ܚܲܕ݉ ܚܘܼܪܙܵܐ ܕܓܲܢܲܬ ܫܲܒ݂ܖܹ̈ܐ ܕܐܲܪܒܥܵܐ ܫܸܢܹ̈ܐ.
ܚܲܕ݉ ܩܸܢܛܪܘܿܢ ܕܝܲܨܝܼܦܘܼܬܵܐ ܕܝܵܘܡܵܐ ܝܲܪܝܼܟ݂ܵܐ ܡܵܨܹܐ ܡܲܩܪܸܒ݂ ܟܠܹܗ ܝܵܘܡܵܐ ܕܡܲܠܲܦܬܵܐ ܘܝܲܨܝܼܦܘܼܬܵܐ، ܒܸܚܒ݂ܵܫܵܐ ܚܘܼܪܙܵܐ ܕܓܲܢܲܬ ܫܲܒ݂ܖܹ̈ܐ. ܚܘܼܪܙܵܐ ܕܓܲܢܲܬ ܫܲܒ݂ܖܹ̈ܐ ܡܗܘܿܕܝܵܐ ܒܡܲܠܦܵܢܵܐ ܡܸܬܡܵܨܝܵܢܬܵܐ ܝܠܵܗ̇ ܕܦܵܐܹܫ ܡܘܿܟܡܸܠܵܐ ܒܣܲܥܲܬܹ̈ܐ ܙܵܘܕܵܢܹ̈ܐ ܕܝܘܼܠܦܵܢܵܐ ܘܝܲܨܝܼܦܘܼܬܵܐ.
ܓܵܘ ܚܕܵܐ ܚܸܠܡܲܬ ܕܓܲܢܲܬ ܫܲܒ݂ܖܹ̈ܐ ܫܪܝܼܬܵܐ، ܚܲܕ݉ ܚܘܼܪܙܵܐ ܕ ܓܲܢܲܬ ܫܲܒ݂ܖܹ̈ܐ (ܟܸܢܕܵܐ) ܒܸܕ ܦܵܠܹܚ ܒܝܵܘܡܵܢܹ̈ܐ ܦܖ̈ܝܼܫܹܐ ܘܒܥܸܕܵܢܵܬܹ̈ܐ ܡܬܘܿܚܡܹ̈ܐ. ܚܕܵܐ ܚܸܠܡܲܬ ܕܓܲܢܲܬ ܫܲܒ݂ܖܹ̈ܐ ܫܪܝܼܬܵܐ ܟܹܐ ܦܵܠܚܵܐ ܥܝܵܕܵܐܝܼܬ ܩܵܐ ܡܸܬܚܵܐ ܕ40 ܫܵܒ݂ܘܿܥܹ̈ܐ ܒܟܠ ܫܹܢ݉ܬܵܐ ܘܟܹܐ ܫܵܩܠܵܐ ܒܸܛܠܵܢܵܐ ܒܥܸܕܵܢܵܐ ܐܝܼܡܲܢ ܕܟܹܐ ܫܵܩܠܝܼ ܓܵܘ ܟܠܲܝܗܝ ܡܲܕܖ̈ܲܫܝܵܬܹܐ. ܐܲܢܹܐ ܝܵܘܡܵܢܹ̈ܐ ܘܣܵܥܲܬܹ̈ܐ ܝܼܢܵܐ ܪܫܝܼܡܹܐ ܒܝܲܕ ܚܸܠܡܲܬ ܕ ܓܲܢܲܬ ܫܲܒ݂ܖܹ̈ܐ (ܟܸܢܕܵܐ).
Updated