کودکستان چی رقم کار مونه (How kinder works) - هزارگی (Hazaragi)

کیندر «که کودکستان» یا «آموزش ابتدائی طفولیت» گفته موشه، یک بخشی مهم رشد و یادگیری طفل شیم استه. ثبت نام کدون طفل شیم د یک برنامه کیندر بلده دو سال کمک مونه که مهارتای خوره رشد بیدیه تاکه د زندگی و مکتب خو خوب پیش بورن.

ساتای کاری کودکستان:

برنامای کیندر 3 ساله د هر هفته بین 5 تا 15 ساعت و برنامای کیندر 4 ساله بلده 15 ساعت استه.

نتیجای ثابت شده:

اطفالی که د برنامه کیندر مورن می تنن مهارتای مثل طریقه حساب کیدو و فامیدون شمارا و حروفا، و حل کدون مسائل ره یاد میگرن. طفل شیم اعتماد به نفس و مستقل بودو و مهارتای اجتماعی و عاطفی ره د کیندر یاد میگره. اونا اجتماعی شده و رفیقای نو پیدا خاد کدن.

تحقیق نشان میدیه که د 16 ساله گی، شاگردایی که پیش از مکتب امدو یک پروگرام کیندر ره بلده دو یا 3 سال رفتن نسبت به شاگردایی که نه رفتن نمرای خوبتر د ریاضی و انگلیسی میگرن.

پدر مادر و معلمای کیندر چی رقم با هم کار مونن:

کیندر وقتی خوب نتیجه میدیه که بین پدرمادر/سرپرستا، فامیلا و معلما همکاری وجود دشته شه. یه حیث یک پدرمادر/سرپرست، شیمو مهم ترین بخش رشد طفل خو استید. شیمو اوناره یاد می دید که خوب و بد ره فرق کنن، زیبون خوره، فرهنگ و ارزش ها مثل مهربانی و احترام ره یاد بیگرن. معلما د باره چیزایی که د کیندر انجام میدیَن و طریقایی که طفل شیم ره کمک کنه د خانه آموزش خوره ادامه بیدیه قد شیم توره مو گیَن. معلما می خوایَن د باره علاقه مندی های طفل شیم و طریقه یادگیری شی بوفامن.

هر وقت می تنید از معلم کیندر خو بخوایید که یک ترجمان بیگره. ای می تینه حضوری، تلفونی یا از طریق ویدیو باشه. استفاده ازی خدمت بلده فامیلا کدام هزینه ندره.

د کیندر چی کارا موشه:

معلما اطفال ره تشویق مونن که قد بازی کدو چیزای نو یاد بیگرن. فعالیتا شاید شامل رسامی، آوازخوانی، بال شدو د بلندی، کندو و دوش د فضای بیرونی، بازی کدو قد سامان بازی و کتاب خوانی باشه. بازی کدو اطفال ره تشویق مونه که از خیالای خو استفاده کده و چیزای نو کشف کنه، د حالیکه قد دیگا د شریک کدو و نوبت گرفتو هماهنگی مونن. اطفال د باره آوازا، کلمه ها و زیبو، به شمول فامیدو و توره گفتو د انگلیسی ره یاد میگرن.

کیندر ها بخشی از جامعه چند فرهنگی مو استن:

برنامای کیندر پدر/مادرا ره از هر رقم مردم خوش آمدید موگیه که بخشی از جامعه شی باشن. او یک جایی استه پدر/مادرا قد یکدیگه خوره شناخته شده و تجربای خوره شریک مونه و از یکدیگه خو یاد میگرن.

معلما می خوایین د باره طفل و فرهنگ شیم بوفامن. ای کار اوناره کمک مونه بلده برنامایی آمادگی بیگرن که بلده طفل شیم با معنی باشه، به شمول فعالیتایی که د باره روزا و برنامای فرهنگی استه و تنوع ره د ویکتوریا تجلیل کنن.

معلما شامل تمام کسائی موشه که د فعالیتا سهم میگرن، تاکه شاگردایی که انگلیسی توره نه موگیَن رقم دیگه شاگردا وری فرصت بلده بازی و یادگیری دیشته شن. باضی برنامای کیندر معلمای دو-زیبونه دیرن که قد اطفالی کمک مونن که انگلیسی یاد ندرن یا کم یاد دیرن. بلده اطفال همچنین یاد میدیَن که قد دیگرو خوی کنن و دیگرو ره هم قبول کنن و تفاوتای فرهنگی ره احترام کنن.

انواع برنامای کودکستان

اطفال می تنن یک برنامه کیندر سه-ساله ره یا د یک مرکز مراقبت روز طولانی (که مراقبت طفل هم گفته موشه) یا د یک خدمت کیندر مستقل (که جلسه ای هم گفته موشه) شرکت کنن. ای خدمات معمولاً یک برنامه کیندر چار ساله ره هم ارائه مونن.

یک مرکز مراقبت روز طولانی می تینه یک روز کامل آموزش و مراقبت، به شمول یک برنامه کیندر ره ارائه کنه. برنامه کیندر که توسط معلم اداره موشه می تینه توسط ساتای اضافی آموزش و مراقبت یکجای شونه.

د یک خدمت مستقل، یک برنامه کیندر فقط د روزایی خاص و ساتای کاری خاص انجام موشه. د یک خدمت مستقل معمولاً بلده 40 هفته د سال د وقتای ترم مکتب فعالیت مونه و همزمان قد مکتبا رخصت استن. ای روزا و ساتای کاری توسط خود خدمات کیندر تعیین موشه.

Updated