ܡܲܦܠܘܼܚܹܐ ܬܘܼܠܚܵܡܵܐ ܕ VicEmergency ܩܵܐ ܡܲܪ̈ܥܲܫܝܵܬܹܐ ܘܙܘܼܗܵܪܹ̈ܐ - ܐܵܬܘܿܪܵܝܵܐ - Assyrian

ܢܨܵܒ݂ܬܵܐ ܕܬܘܼܠܚܵܡܵܐ ܕ VicEmergency ܕܕܝܼܵܘܟ݂ܘܿܢ

ܬܘܼܠܚܵܡܵܐ ܕ VicEmergency ܟܹܐ ܝܵܗܸܒ݂ܠܵܘܟ݂ܘܿܢ ܡܵܘܕܥܵܢܘܼܬܵܐ ܕܥܸܕܵܢܵܐ ܫܲܪܝܼܪܬܵܐ ܘܙܘܼܗܵܪܹ̈ܐ ܒܘܼܬ ܥܪ̈ܝܼܨܘܼܝܵܬܹܐ ܕܡܵܨܝܼ ܥܵܒ݂ܕܝܼ ܟܵܐܪ ܥܲܠܵܘܟ݂ܘܿܢ.

ܐܲܢܹܐ ܒܸܚܒ݂ܵܫܵܐ ܝܢܵܐ ܢܘܼܪܹ̈ܐ، ܛܵܘܦܵܢܹ̈ܐ، ܥܲܠܥܵܠܹ̈ܐ، ܪ̈ܵܘܕܵܢܹܐ، ܙܘܼܗܵܪܹ̈ܐ ܕܗܵܘܵܐ ܘܒܘܼܫ ܙܵܘܕܵܐ.

ܐܵܢܲܢܩܵܝܬܵܐ ܝܠܵܗ̇ ܢܨܵܒ݂ܬܵܐ ܕܬܘܼܠܚܵܡܵܐ ܕ VicEmergency ܥܲܠ ܬܹܠܝܼܦ̮ܘܿܢܵܘܟ݂ܘܿܢ ܘܕܝܵܕܥܝܼܬܘܿܢ ܕܵܐܟ݂ܝܼ ܡܲܦܠܸܚܝܼܬܘܿܢ ܠܹܗ.

ܡܲܨܠܹܝܡܘܼܢ ܠܹܗ ܬܘܼܠܚܵܡܵܐ

ܡܵܨܹܝܬܘܿܢ ܕܡܲܨܠܹܝܬܘܿܢ ܠܹܗ ܬܘܼܠܚܵܡܵܐ ܠܓܵܘ ܬܹܠܝܼܦ̮ܘܿܢܵܘܟ݂ܘܿܢ ܙܪܝܼܙܵܐ. ܐܵܗܵܐ ܡܲܥܢܵܝܹܗ ܝܠܹܗ ܕܐܲܚܬܘܿܢ ܡܵܨܹܝܬܘܿܢ ܕܩܲܒܠܝܼܬܘܿܢ ܠܗܘܿܢ ܡܲܪ̈ܥܲܫܝܵܬܹܐ ܒܟܠ ܐܲܝܟܵܐ ܕܝܼܬܘܿܢ

ܡܲܨܠܹܝܡܘܼܢ ܡ̣ܢ App Store ܠܓܵܘ ܐܲܣܵܢܵܘܟ݂̈ܘܿܢ ܕ Apple 

ܡܲܨܠܹܝܡܘܼܢ ܡ̣ܢ Google Play ܠܓܵܘ ܐܲܣܵܢܵܘܟ݂ܘܿܢ ܕ Android

ܡܲܦܠܲܚܬܵܐ ܕܬܘܼܠܚܵܡܵܐ ܝܼܠܵܗ̇ ܗܵܣܵܢܵܝܝܼ

ܐܝܼܡܲܢ ܕܦܵܬܚܝܼܬܘܿܢ ܠܹܗ ܬܘܼܠܚܵܡܵܐ، ܒܸܕ ܚܵܙܹܝܬܘܿܢ ܚܲܕ ܚܲܪܝܼܛܵܐ ܕܐܘܿܚܕܵܢܵܐ ܕܒ݂ܝܼܟܬܘܿܪܝܵܐ.

ܥܲܠ ܚܲܪܝܼܛܵܐ ܐܝܼܬ ܝܘܼܩܢܹ̈ܐ ܟܘܼܡܹ̈ܐ ܘܚܘܵܪܹ̈ܐ. ܐܲܢܹܐ ܒܸܪܡܵܙܵܐ ܝܢܵܐ ܠܟܠ ܚܕܵܐ ܩܪܵܝܬܵܐ ܩܵܐ ܬܠܵܬܵܐ ܨܝܼܦܵܪܹ̈ܐ (000). ܚܲܕܟܡܵܐ ܓܵܗܹ̈ܐ ܚܲܕ ܓܸܕܫܵܐ ܐܝܼܬܠܹܗ ܙܵܘܕܵܐ ܡ̣ܢ ܚܲܕ ܝܘܼܩܢܵܐ. ܐܲܝܵܐ ܗܵܕܟ݂ܵܐ ܝܠܵܗ̇ ܣܵܒܵܒ ܪܵܒܵܐ ܐ݇ܢܵܫܹ̈ܐ ܡܘܼܚܒܸܪܹܐ ܝܢܵܐ ܠܬܲܫܪܘܼܪܹܐ ܒܘܼܬ ܓܸܕܫܵܐ.

ܟܠܚܲܕ ܝܘܼܩܢܵܐ ܡܲܕܥܘܼܝܵܘܟ݂ܘܿܢ ܝܠܹܗ ܐܵܗܵܐ ܡܘܿܕܝ݇ ܦܸܨܠܵܐ ܕܓܸܕܫܵܐ ܝܠܹܗ. ܡܲܦܠܸܚܘܼܢ ܠܵܗ̇ ܐܲܝܵܐ ܡܵܘܕܥܵܢܘܼܬܵܐ ܠܸܩܛܵܥܝܵܐ ܒܚܸܝܵܠܵܘܟ݂ܘܿܢ ܐܸܢ ܐܵܗܵܐ ܝܼܠܹܗ ܚܲܕ ܡܸܢܕܝܼ ܕܣܢܝܼܩܹܐ ܝܬܘܿܢ ܕܝܵܕܥܝܼܬܘܿܢ ܒܘܼܬ ܕܝܼܹܗ ܘܕܥܵܒ݂ܕܝܼܬܘܿܢ ܚܲܕ ܡܸܢܕܝܼ ܒܘܼܬ ܕܝܼܹܗ.

ܓܵܘ ܬܘܼܠܚܵܡܵܐ ܐܲܚܬܘܿܢ ܒܲܠܟܵܐ ܕܚܵܙܹܝܬܘܿܢ ܝܘܼܩܢܹ̈ܐ ܙܲܪ̈ܕܹܐ ܝܲܢ ܦܘܼܪ̈ܬܩܵܠܵܝܹܐ ܝܲܢ ܣܡܘܼܩܹ̈ܐ ܘܕܘܼܟܵܢܹ̈ܐ ܦܪ̈ܝܼܫܹܐ. ܐܲܢܹܐ ܝܼܢܵܐ ܙܘܼܗܵܪܹ̈ܐ.3 ܕܲܪ̈ܓ݂ܹܐ ܕܙܘܼܗܵܪܵܐ ܦܝܼܫܹܐ ܝܢܵܐ ܡܦܘܼܫܩܹܐ ܓܵܘ ܣܲܗܡܵܐ ܦܵܝܫܵܢܵܐ ܕܐܲܝܵܐ ܦܵܬܵܐ.

ܒܪܹܝܡܘܼܢ ܚܲܕ ܠܦܵܦܵܐ ܦܲܪܨܘܿܦܵܝܵܐ

ܠܩܲܒܘܼܠܹܐ ܒܘܼܫ ܙܵܘܕܵܐ ܝܘܼܬܪܵܢܵܐ ܡ̣ܢ ܬܘܼܠܚܵܡܵܐ، ܒܪܹܝܡܘܼܢ ܠܹܗ ܠܦܵܦܵܐ ܦܲܪܨܘܿܦܵܝܵܐ ܕܓܵܢܵܘܟ݂ܘܿܢ.

ܡܵܨܹܝܬܘܿܢ ܕܡܲܦܠܸܚܝܼܬܘܿܢ ܠܹܗ ܬܘܼܠܚܵܡܵܐ ܕܠܵܐ ܚܲܕ ܠܦܵܦܵܐ ܦܲܪܨܘܿܦܵܝܵܐ، ܐܝܼܢܵܐ ܒܒܪܵܝܬܵܐ ܕܚܲܕ ܠܦܵܦܵܐ ܦܲܪܨܘܿܦܵܝܵܐ، ܐܲܚܬܘܿܢ ܡܵܨܹܝܬܘܿܢ ܕܚܲܡܹܝܬܘܿܢ ܠܗܘܿܢ ܦܸܢܝܵܬܹ̈ܐ

ܡܵܨܹܝܬܘܿܢ ܕܡܲܦܠܸܚܝܼܬܘܿܢ ܠܹܗ ܬܘܼܠܚܵܡܵܐ ܕܠܵܐ ܚܲܕ ܠܦܵܦܵܐ ܦܲܪܨܘܿܦܵܝܵܐ، ܐܝܼܢܵܐ ܒܒܪܵܝܬܵܐ ܕܚܲܕ ܠܦܵܦܵܐ ܦܲܪܨܘܿܦܵܝܵܐ، ܐܲܚܬܘܿܢ ܡܵܨܹܝܬܘܿܢ ܕܚܲܡܹܝܬܘܿܢ ܠܗܘܿܢ ܦܸܢܝܵܬܹ̈ܐ ܕܡܲܪܗܲܝܬܵܐ ܕܥܲܝܢܵܐ ܕܕܝܼܵܘܟ݂ܘܿܢ ܘܕܩܲܒܠܝܼܬܘܿܢ ܡܲܚܒܲܪ̈ܝܵܬܹܐ.

ܠܸܒܪܵܝܹܗ ܠܦܵܦܵܘܟ݂ܘܿܢ ܦܲܪܨܘܿܦܵܝܵܐ:

1. ܦܬܘܿܚܘܼܢ ܠܹܗ Menu (ܣܸܕܪܵܐ) ܕܬܘܼܠܚܵܡܵܐ ܘܦܪܘܿܫܘܼܢ Create a profile (ܒܪܹܝܡܘܼܢ ܚܕܵܐ ܨܘܼܪܬܵܐ ܦܲܪܨܘܿܦܵܝܬܵܐ)
2. ܡܲܥܒ݂ܸܪܘܼܢ ܠܗܘܿܢ ܦܘܼܨܵܠܵܘܟ݂̈ܘܿܢ ܘܚܕܵܐ ܡܸܠܬܵܐ ܕܐ݇ܪܵܙܵܐ (ܦܵܣܒ݂ܘܿܪܕ).

ܪ̈ܘܼܟܵܒ݂ܵܘܟ݂ܘܿܢ ܒܸܕ ܦܵܝܫܝܼ ܚܘܼܡܝܹܐ ܘܡܘܼܦܠܸܚܹܐ ܐܝܼܡܲܢ ܕܥܵܒ݂ܪܝܼܬܘܿܢ ܠܓܵܘ ܬܘܼܠܚܵܡܵܐ ܕ VicEmergency ܐܵܦ ܡ̣ܢ ܓܵܘ ܬܘܼܩܵܢܹ̈ܐ ܐ݇ܚܪܹ̈ܢܹܐ.

ܚܲܡܹܝܡܘܼܢ ܠܗܘܿܢ ܦܸܢܝܵܬܹ̈ܐ ܕܡܲܪܗܲܝܬܵܐ ܕܥܲܝܢܵܐ ܬܚܘܼܬ ܠܦܵܦܵܘܟ݂ܘܿܢ ܦܲܪܨܘܿܦܵܝܵܐ

ܦܸܢܝܵܬܹ̈ܐ ܕܡܲܪܗܲܝܬܵܐ ܕܥܲܝܢܵܐ ܝܼܢܵܐ ܦܸܢܝܵܬܹ̈ܐ ܕܐܝܼܬܠܗܘܿܢ ܛܝܼܡܵܐ ܩܵܐܠܵܘܟ݂ܘܿܢ، ܐܲܝܟ݂ ܒܲܝܬܵܘܟ݂ܘܿܢ، ܦܘܼܠܚܵܢܵܐ، ܡܲܕܪܲܫܬܵܐ ܕܫܲܒ݂ܪܹ̈ܐ ܝܲܢ ܚܕܵܐ ܕܘܼܟܵܐ ܕܣܲܚܒܘܼܪܘܿܗ̇ ܝܬܘܿܢ. ܐܝܼܡܲܢ ܕܐܝܼܬ ܚܕܵܐ ܥܵܒ݂ܘܿܕܘܼܬܵܐ ܓܵܘ ܚܕܵܐ ܡ̣ܢ ܦܸܢܝܵܬܵܘܟ݂̈ܘܿܢ ܕܡܲܪܗܲܝܬܵܐ ܕܥܲܝܢܵܐ، ܐܲܚܬܘܿܢ ܒܸܕ ܩܲܒܠܝܼܬܘܿܢ ܚܕܵܐ ܡܲܚܒܲܪܬܵܐ.

ܕܵܐܟ݂ܝܼ ܠܸܒܪܵܝܵܐ ܚܕܵܐ ܦܢܝܼܬܵܐ ܕܡܲܪܗܲܝܬܵܐ ܕܥܲܝܢܵܐ:

1. ܦܬܘܿܚܘܼܢ ܠܵܗ̇ ܫܲܫܬܵܐ ܕܒܲܝܬܵܐ ܕܬܘܼܠܚܵܡܵܐ ܘܦܪܘܿܫܘܼܢ Create watch zone (ܒܪܹܹܝܡܘܿܢ ܦܢܝܼܬܵܐ ܕܡܲܪܗܲܝܬܵܐ ܕܥܲܝܢܵܐ)
2. ܢܩܘܿܪܘܼܢ ܥܲܠ ܚܲܪܝܼܛܵܐ ܐܲܝܟܵܐ ܕܒܵܥܹܝܬܘܿܢ ܕܦܢܝܼܬܵܐ ܕܡܲܪܗܲܝܬܵܐ ܕܥܲܝܢܵܐ ܗܵܘܝܵܐ، ܝܲܢ ܛܲܥܹܝܡܘܼܢ ܒܵܬ݇ܪ ܚܕܵܐ ܐܲܕܪܹܝܣ ܝܲܢ ܡܲܗܲܠܵܐ.
3. ܗܲܒ݂ܠܘܼܢ ܠܵܗ̇ ܦܢܝܼܬܵܘܟ݂ܘܿܢ ܕܡܲܪܗܲܝܬܵܐ ܕܥܲܝܢܵܐ ܚܲܕ ܫܸܡܵܐ.
4. ܦܪܘܿܫܘܼܢ ܠܵܗ̇ ܓܘܼܒ݂ܪܘܼܬܵܐ ܕܦܢܝܼܬܵܐ ܕܐܲܚܬܘܿܢ ܒܵܥܹܝܬܘܿܢ ܕܡܲܪܗܹܝܬܘܿܢ ܥܲܝܢܵܐ ܥܲܠܵܗ̇. ܓܵܘ ܦܸܢܝܵܬܹ̈ܐ ܩܘܼܪ̈ܝܵܝܹܐ ܥܒ݂ܘܿܕܘܼܢ ܠܵܗ̇ ܓܘܼܒ݂ܪܘܼܬܵܐ ܕܠܵܐ ܗܵܘܝܵܐ ܒܵܨܘܿܪܬܵܐ ܡ̣ܢ 10 ܟܝܼܠܘܿܡܲܬܪܹ̈ܐ. ܓܵܘ ܦܸܢܝܵܬܹ̈ܐ ܡܕܝܼܢܵܝܹ̈ܐ، ܦܸܢܝܵܬܹ̈ܐ ܒܘܼܫ ܙܥܘܿܪܹ̈ܐ ܕܒܓܘܼܒ݂ܪܘܼܬܵܐ ܕ 500 ܡܲܬܪܹ̈ܐ ܗܲܠ 1 ܟܝܼܠܘܿܡܲܬܪܵܐ ܟܹܐ ܦܵܠܚܝܼ ܒܘܼܫ ܨܦܵܝܝܼ.
5. ܦܪܘܿܫܘܼܢ ܠܗܘܿܢ ܐܵܢܝܼ ܦܸܨܠܹ̈ܐ ܕܓܸܕܫܹ̈ܐ ܕܒܵܥܹܝܬܘܿܢ ܩܲܒܠܝܼܬܘܿܢ ܡܲܚܒܲܪ̈ܝܵܬܹܐ ܩܵܐܠܲܝܗܝ. ܐܲܚܬܘܿܢ ܐܲܡܝܼܢܵܐܝܼܬ ܒܸܕ ܩܲܒܠܝܼܬܘܿܢ ܡܲܚܒܲܪܬܵܐ ܐܝܼܡܲܢ ܕܚܲܕ Emergency Warning (ܙܘܼܗܵܪܵܐ ܕܥܪܝܼܨܘܼܬܵܐ) ܝܲܢ ܐܝܼܡܲܢ ܕܚܲܕ ܙܘܼܗܵܪܵܐ ܕ Watch and Act ( ܓܲܫܩܘܼܢ ܘܥܒ݂ܘܿܕܘܼܢ ܚܲܕ ܡܸܢܕܝܼ) ܦܝܵܫܵܐ ܝܠܹܗ ܦܪܝܼܣܵܐ ܓܵܘ ܦܸܢܝܵܬܵܘܟ݂̈ܘܿܢ ܕܡܲܪܗܲܝܬܵܐ ܕܥܲܝܢܵܐ.

ܡܘܿܕܝܼ ܠܸܥܒ݂ܵܕܵܐ ܐܝܼܡܲܢ ܕܚܲܕ ܙܘܼܗܵܪܵܐ ܦܝܵܫܵܐ ܝܠܹܗ ܦܪܝܼܣܵܐ

ܐܝܼܡܲܢ ܕܚܲܕ ܓܸܕܫܵܐ ܝܼܠܹܗ ܚܸܪܒܵܐ، ܚܲܕ ܙܘܼܗܵܪܵܐ ܒܲܠܟܵܐ ܕܦܵܐܸܫ ܦܪܝܼܣܵܐ. ܩܪܹܝܡܘܼܢ ܠܹܗ ܙܘܼܗܵܪܵܐ ܒܕܸܩܵܐܝܼܬ ܘܫܩܘܿܠܘܼܢ ܠܐܵܢܝܼ ܦܵܣܘܿܥܝܵܬܹ̈ܐ ܕܙܘܼܗܵܪܵܐ ܡܲܚܫܘܼܚܲܝܗܝ ܝܠܹܗ.

ܐܸܢ ܙܘܼܗܵܪܵܐ ܝܼܠܹܗ ܓܵܘ ܦܢܝܼܬܵܘܟ݂ܘܿܢ ܕܡܲܪܗܲܝܬܵܐ ܕܥܲܝܢܵܐ، ܒܸܕ ܩܲܒܠܝܼܬܘܿܢ ܚܕܵܐ ܡܲܚܒܲܪܬܵܐ ܒܐܘܼܪܚܵܐ ܕܬܘܼܠܚܵܡܵܐ ܕܥܲܠ ܬܹܠܝܼܦ̮ܘܿܢܵܘܟ݂ܘܿܢ.

ܬܵܡܵܐ ܐܝܼܬ 3 ܫܲܘܝܹ̈ܐ ܕܙܘܼܗܵܪܵܐ. ܙܘܼܗܵܪܹ̈ܐ ܦܝܼܫܹܐ ܝܢܵܐ ܦܪܝܼܣܹܐ ܐܝܼܡܲܢ ܕܩܲܘܲܡܝܵܬܹ̈ܐ ܩܲܘܘܼܡܹܐ ܝܢܵܐ. ܐܵܢܝܼ ܠܹܐ ܦܵܝܫܝܼ ܦܪܝܼܣܹܐ ܡ̣ܢ ܒܘܼܫ ܒܵܨܘܿܪܵܐ ܚܸܪܒܵܐ ܠܒܘܼܫ ܪܵܒܵܐ ܚܸܪܒܵܐ. ܚܲܕܟܡܵܐ ܓܵܗܹ̈ܐ ܙܘܼܗܵܪܵܐ ܩܲܕܡܵܝܵܐ ܕܩܲܒܠܝܼܬܘܿܢ ܠܹܗ ܝܼܠܹܗ ܗ̇ܘ ܒܘܼܫ ܪܵܒܵܐ ܚܸܪܒܵܐ.

ܙܘܼܗܵܪܹ̈ܐ ܡܘܼܦܠܸܚܹ̈ܐ ܒܥܸܕܵܢܵܐ ܕܥܪ̈ܝܼܨܘܼܝܵܬܹܐ

ܙܘܼܗܵܪܹ̈ܐ ܟܹܐ ܦܵܝܫܝܼ ܦܪܝܼܣܹܐ ܐܝܼܡܲܢ ܕܡܸܬܗܵܘܝܵܢܬܵܐ ܝܠܵܗ̇ ܕܚܕܵܐ ܥܪܝܼܨܘܼܬܵܐ ܒܸܕ ܡܵܚܝܵܐ ܥܲܠܵܘܟ݂ܘܿܢ.

ܐܵܢܝܼ ܟܹܐ ܝܵܗܒ݂ܝܼܠܵܘܟ݂ܘܿܢ ܡܵܘܕܥܵܢܘܼܬܵܐ ܐܵܢܲܢܩܵܝܬܵܐ ܘܐܵܡܪܝܼܠܵܘܟ݂ܘܿܢ ܡܘܿܕܝܼ ܥܵܒ݂ܕܝܼܬܘܿܢ ܕܦܵܝܫܝܼܬܘܿܢ ܣܵܠܵܡܲܬ.

ܐܲܢܹܐ ܙܘܼܗܵܪܹ̈ܐ ܒܸܕ ܗܵܘܝܼ ܒܠܸܫܵܢܵܐ ܐܸܢܓܠܸܣܵܝܵܐ. ܡܲܦܠܲܚܬܵܐ ܕܪܲܢܓܵܐ ܕܙܘܼܗܵܪܵܐ ܝܼܠܵܗ̇ ܗ̇ܝ ܐܘܼܪܚܵܐ ܒܘܼܫ ܨܦܵܝܝܼ ܩܵܐܠܵܘܟ݂ܘܿܢ ܕܝܵܕܥܝܼܬܘܿܢ ܟܡܵܐ ܚܸܪܒܵܐ ܝܠܹܗ ܓܸܕܫܵܐ.

3 ܫܲܘܝܹ̈ܐ ܕܙܘܼܗܵܪܵܐ

ܬܵܡܵܐ ܐܝܼܬ 3 ܫܲܘܝܹ̈ܐ ܦܪ̈ܝܼܫܹܐ ܕܙܘܼܗܵܪܹ̈ܐ ܓܵܘ ܛܲܟ݂ܣܵܐ ܕܙܘܼܗܵܪܹ̈ܐ ܕܐܘܿܣܬܪܵܠܝܵܐ:

ܪܲܢܓܵܐ ܙܲܪܕܵܐ - Advice (ܢܲܨܝܼܗܲܬ)

ܙܘܼܗܵܪܵܐ ܙܲܪܕܵܐ ܕ Advice (ܢܲܨܝܼܗܲܬ) ܡܲܕܥܘܼܝܵܘܟ݂ܘܿܢ ܝܠܹܗ ܕܚܲܕ ܓܸܕܫܵܐ ܩܲܘܘܼܡܹܐ ܝܠܹܗ ܓܵܘ ܦܢܝܼܬܵܘܟ݂ܘܿܢ. ܙܘܼܗܵܪܵܐ ܐܵܦ ܒܲܠܟܵܐ ܡܲܕܥܘܼܝܵܘܟ݂ܘܿܢ ܝܠܹܗ ܕܩܹܘܲܢܕܹܢܘܿܣ ܕܓܸܕܫܵܐ ܒܨܝܼܪܐ ܝܠܹܗ.

ܪܲܢܓܵܐ ܦܸܪܬܩܵܠܵܝܵܐ - Watch and Act (ܓܲܫܩܘܼܢ ܘܥܒ݂ܘܿܕܘܼܢ ܚܲܕ ܡܸܢܕܝܼ)

ܙܘܼܗܵܪܵܐ ܦܸܪܬܩܵܠܵܝܵܐ ܕ Watch and Act (ܓܲܫܩܘܼܢ ܘܥܒ݂ܘܿܕܘܼܢ ܚܲܕ ܡܸܢܕܝܼ) ܡܲܕܥܘܼܝܵܘܟ݂ܘܿܢ ܝܼܠܹܗ ܕܚܕܵܐ ܥܪܝܼܨܘܼܬܐ ܫܲܪܘܼܝܹܐ ܝܠܵܗ̇ ܒܩܘܼܪܒܵܝܘܼܬܵܐ ܐܸܠܵܘܟ݂ܘܿܢ. ܐܵܢܲܢܩܵܝܬܵܐ ܝܠܵܗ̇ ܕܗܵܘܹܝܬܘܿܢ ܗܕܝܼܪܹܐ ܠܸܫܩܵܠܵܐ ܦܵܣܘܿܥܝܵܬܹ̈ܐ ܠܸܢܛܵܪܵܐ ܩܵܐ ܓܵܢܵܘܟ݂ܘܿܢ ܘܩܵܐ ܐ݇ܚܪܹ̈ܢܹܐ.

ܪܲܢܓܵܐ ܣܡܘܼܩܵܐ - Emergency Warning (ܙܘܼܗܵܪܵܐ ܕܥܪܝܼܨܘܼܬܵܐ)

Warning (ܙܘܼܗܵܪܵܐ ܕܥܪܝܼܨܘܼܬܵܐ) ܒܓܵܘܢܵܐ ܣܡܘܼܩܵܐ ܡܲܥܢܵܝܸܗ ܝܼܠܹܗ ܕܐܲܚܬܘܿܢ ܝܼܬܘܿܢ ܓܵܘ ܩܹܘܲܢܕܹܢܘܿܣ ܗܵܫܵܝܵܐ. ܓܵܪܲܓ ܕܥܵܒ݂ܕܝܼܬܘܿܢ ܚܲܕ ܡܸܢܕܝܼ ܗܲܕܝܼܵܐ.

ܩܪܵܝܬܵܐ ܕܚܲܕ ܙܘܼܗܵܪܵܐ

ܐܝܼܡܲܢ ܕܦܵܬܚܝܼܬܘܿܢ ܠܵܗ̇ ܚܕܵܐ ܡܲܚܒܲܪܬܵܐ ܓܵܘ ܬܘܼܠܚܵܡܵܐ، ܒܸܕ ܚܵܙܹܝܬܘܿܢ ܚܲܕ ܝܘܼܩܢܵܐ ܕܙܘܼܗܵܪܵܐ ܪܡܝܼܙܵܐ ܒܪ̈ܲܢܓܹܐ ܘܚܕܵܐ ܦܢܝܼܬܵܐ ܗܲܪ ܒܗ̇ܘ ܪܲܢܓܵܐ ܥܲܠ ܚܲܪܝܼܛܵܐ ܡܲܚܙܘܼܝܹܐ ܙܘܼܗܵܪܵܐ ܠܐܲܝܟܵܐ ܒܸܪܡܵܙܵܐ ܝܠܹܗ.

ܢܩܘܿܪܘܼܢ ܥܲܠ ܝܘܼܩܢܵܐ ܝܲܢ ܥܲܠ ܦܢܝܼܬܵܐ ܡܪܘܼܢܓܸܢܬܵܐ ܠܸܩܪܵܝܹܗ ܙܘܼܗܵܪܵܐ.

ܩܵܐ ܒܘܼܫ ܙܵܘܕܵܐ ܡܵܘܕܥܵܢܘܼܬܵܐ ܒܘܼܬ ܥܪܝܼܨܘܼܬܵܐ، ܦܪܘܿܫܘܼܢ More info (ܒܘܼܫ ܙܵܘܕܵܐ ܡܵܘܕܥܵܢܘܼܬܵܐ).

ܐܲܡܝܼܢܵܐܝܼܬ ܗܵܘܹܝܬܘܿܢ ܒܸܬܒܵܥܵܐ ܠܦܘܼܩܕܵܢܹ̈ܐ ܚܒ݂ܝܼܫܹ̈ܐ ܓܵܘ ܙܘܼܗܵܪܵܐ ܠܚܲܡܘܼܝܘܿܗ̇ ܓܵܢܵܘܟ݂ܘܿܢ ܣܵܠܵܡܲܬ.

ܪܹܐܙܵܐ ܕܙܘܼܗܵܪܹ̈ܐ

ܙܘܼܗܵܪܹ̈ܐ ܡܵܨܝܼ ܕܐܵܬܝܼ ܒܟܠ ܪܹܐܙܵܐ ܕܗܵܘܹܐ. ܐܵܢܝܼ ܟܹܐ ܡܲܝܕܸܥܝܼ ܐܝܼܟܲܢܵܝܘܼܬܵܐ ܗܵܫܵܝܬܵܐ ܘܠܡܘܿܕܝܼ ܐܲܚܬܘܿܢ ܣܢܝܼܩܹܐ ܝܬܘܿܢ ܕܝܵܕܥܝܼܬܘܿܢ ܠܗܲܝܘܼܪܵܘܟ݂ܘܿܢ ܕܦܵܝܫܝܼܬܘܿܢ ܒܣܵܠܵܡܲܬܘܼܬܵܐ. ܒܲܠܟܵܐ ܕܐܲܚܬܘܿܢ ܩܲܕ݇ܡܵܝܬܵܐ ܠܵܐ ܩܲܒܠܝܼܬܘܿܢ ܢܲܨܝܼܗܲܬ ܕܙܘܼܗܵܪܵܐ ܒܪܲܢܓܵܐ ܙܲܪܕܵܐ.

ܩܪܹܹܝܡܘܼܢ ܠܹܗ ܟܠ ܙܘܼܗܵܪܵܐ ܐܝܼܡܲܢ ܕܩܲܒܠܝܼܬܘܿܢ ܠܹܗ ܘܥܒ݂ܘܿܕܘܼܢ ܐܲܝܟ݂ ܕܦܝܼܫܹܐ ܝܬܘܿܢ ܦܘܼܩܕܹܐ.

ܦܲܪܡܵܝܬܵܐ ܕܦܘܼܩܕܵܢܹ̈ܐ ܓܵܘ ܙܘܼܗܵܪܹ̈ܐ

ܟܠܚܲܕ ܙܘܼܗܵܪܵܐ ܟܹܐ ܚܵܒ݂ܸܫ ܦܘܼܩܕܵܢܹ̈ܐ ܒܘܼܬ ܐܲܝܢܝܼ ܦܵܣܘܿܥܝܵܬܹ̈ܐ ܐܲܚܬܘܿܢ ܓܵܪܲܓ ܫܵܩܠܝܼܬܘܿܢ.

ܐܲܢܹܐ ܦܘܼܩܕܵܢܹ̈ܐ ܡܵܨܝܼ ܕܗܵܘܝܼ ܦܪ̈ܝܼܫܹܐ، ܬܠܝܼܬܵܐ ܝܠܵܗ̇ ܥܲܠ ܦܸܨܠܵܐ ܕܥܪܝܼܨܘܼܬܵܐ، ܘܥܲܠ ܐܲܗܘܵܠܹ̈ܐ ܘܩܹܘܲܢܕܹܢܘܿܣܹ̈ܐ ܩܵܐ ܟܢܘܼܫܬܵܐ.

ܦܘܼܫܘܼܢ ܒܹܝܕܵܥܝܵܐ

ܡܲܥܢܵܝܵܐ ܕܚܲܕ ܙܘܼܗܵܪܵܐ ܕܢܲܨܝܼܗܲܬ ܒܪܲܢܓܵܐ ܙܲܪܕܵܐ ܝܼܠܹܗ ܕܚܲܕ ܓܸܕܫܵܐ ܫܘܼܪܝܵܐ ܝܠܹܗ ܐܝܼܢܵܐ ܠܲܝܬ ܚܲܕ ܩܸܢܛܵܐ ܗܵܫܵܝܵܐ. ܐܸܢ ܩܲܒܠܝܼܬܘܿܢ ܠܹܗ ܐܵܗܵܐ ܙܘܼܗܵܪܵܐ، ܐܵܢܲܢܩܵܝܬܵܐ ܝܠܵܗ̇ ܕܦܵܝܫܝܼܬܢ ܒܹܝܕܵܥܝܵܐ ܐܸܢ ܩܘܼܘܸܡܠܵܗ̇ ܘܐܲܗܘܵܠ ܫܘܼܚܠܸܦܠܵܗ̇.

ܩܵܐ ܛܘܼܦ̮ܣܵܐ، ܒܲܠܟܵܐ ܕܩܲܒܠܝܼܬܘܿܢ ܚܲܕ ܙܘܼܗܵܪܵܐ ܕܢܲܨܝܼܗܲܬ ܒܪܲܢܓܵܐ ܙܲܪܕܵܐ ܡܲܕܥܘܼܝܵܘܟ݂ܘܿܢ Stay informed (ܦܘܼܫܘܼܢ ܒܹܝܕܵܥܝܵܐ).

ܐܸܢ ܐܵܗܵܐ ܙܘܼܗܵܪܵܐ ܦܝܼܫܵܐ ܝܠܹܗ ܣܘܼܒܸܒܵܐ ܒܚܲܕ ܥܲܠܥܵܠܵܐ، ܙܘܼܗܵܪܵܐ ܕܢܲܨܝܼܗܲܬ ܒܪܲܢܓܵܐ ܙܲܪܕܵܐ ܒܸܕ ܡܲܚܙܹܐ ܚܲܕ ܥܲܝܒ݂ܵܐ ܕܥܲܠܥܵܠܵܐ.

ܐܸܢ ܐܵܗܵܐ ܙܘܼܗܵܪܵܐ ܦܝܼܫܵܐ ܝܠܹܗ ܣܘܼܒܸܒܵܐ ܒܚܲܕ ܥܲܠܥܵܠܵܐ، ܙܘܼܗܵܪܵܐ ܕܢܲܨܝܼܗܲܬ ܒܪܲܢܓܵܐ ܙܲܪܕܵܐ ܒܸܕ ܡܲܚܙܹܐ ܚܲܕ ܥܲܝܒ݂ܵܐ ܕܥܲܠܥܵܠܵܐ.

ܡܲܥܢܵܝܵܐ ܕܦܘܼܫܘܼܢ ܒܹܝܕܵܥܝܵܐ ܡܵܨܹܐ ܕܗܵܘܹܐ ܡܸܢܕܝܼܵܢܹ̈ܐ ܐܲܝܟ݂:

• ܡܠܵܝܬܵܐ ܕܬܹܠܝܼܦ̮ܘܿܢܵܘܟ݂ܘܿܢ ܚܲܝܠܵܐ ܕܒܸܪܩܵܐ
• ܡܲܟܠܵܝܬܵܐ ܕܪܵܕܝܼܬܵܘܟ݂ܘܿܢ ܓܵܘ ܚܕܵܐ ܕܘܼܟܵܐ ܡܟܘܼܣܝܼܬܵܐ ܘܪܸܚܩܵܐ ܡ̣ܢ ܐܝܼܠܵܢܹ̈ܐ
• ݇ܣܵܪܬܵܐ ܕܟܲܪ̈ܦܵܬܹܐ ܕܠܒ݂ܲܕܲܪ ܕܒܲܝܬܵܐ ܒܫܲܘܦܲܝܗܝ
• ܦܝܵܫܬܵܐ ܠܓܵܘܵܐ ܕܒܲܝܬܵܐ.

ܐܸܢ ܐܵܗܵܐ ܙܘܼܗܵܪܵܐ ܝܼܠܹܗ ܩܵܐ ܛܵܘܦܵܢܵܐ، ܙܘܼܗܵܪܵܐ ܕܪܲܢܓܵܐ ܙܲܪܕܵܐ ܒܸܕ ܡܲܚܙܹܐ ܚܲܕ ܒܲܝܬܵܐ ܥܲܡ ܡܝܼܵܐ ܕܛܵܘܦܵܢܵܐ. ܐܵܗܵܐ ܙܘܼܗܵܪܵܐ ܒܲܠܟܵܐ ܕܡܲܕܥܘܼܝܵܘܟ݂ܘܿܢ ܝܼܠܹܗ ܕ Prepare now (ܗܲܕܪܘܼܢ ܗܵܕܝܼܵܐ).

ܗܲܕܲܪܬܵܐ ܡܵܨܝܵܐ ܕܚܵܒ݂ܫܵܐ ܡܸܢܕܝܼܵܢܹ̈ܐ ܐܲܝܟ݂:

• ܨܲܚܨܵܝܬܵܐ ܕܡܗܲܕܝܵܢܵܐ ܕܛܵܘܦܵܢܵܐ ܓܵܘ ܡܲܗܲܠܵܘܟ݂ܘܿܢ
• ܗܲܡܙܲܡܬܵܐ ܥܲܡ ܒܲܝܬܘܼܬܵܘܟ݂ܘܿܢ ܘܐ݇ܢܵܫܹ̈ܐ ܕܒܸܚܵܝܵܐ ܝܢܵܐ ܓܵܘ ܒܲܝܬܵܘܟ݂ܘܿܢ ܘܫܒ݂ܵܒ݂ܵܘܟ݂̈ܘܿܢ ܒܘܼܬ ܡܸܢܕܝܼ ܕܒܸܕ ܥܵܒ݂ܕܝܼܬܘܿܢ ܠܹܗ
• ܡܲܛܥܲܢܬܵܐ ܕܪܵܕܝܼܬܵܘܟ݂ܘܿܢ ܒܡܸܢܕܝܼܵܢܹܹ̈ܐ ܐܲܠܨܵܝܹ̈ܐ.

ܚܕܵܐ ܥܪܝܼܨܘܼܬܵܐ ܫܲܪܘܼܝܹܐ ܝܠܵܗ̇ ܒܩܘܼܪܒܵܝܘܼܬܵܐ ܐܸܠܵܘܟ݂ܘܿܢ

ܚܲܕ ܙܘܼܗܵܪܵܐ ܦܸܪܬܩܵܠܵܝܵܐ ܕ Watch and Act ( ܓܲܫܩܘܼܢ ܘܥܒ݂ܘܿܕܘܼܢ ܚܲܕ ܡܸܢܕܝܼ) ܡܲܕܥܘܼܝܵܘܟ݂ܘܿܢ ܝܼܠܹܗ ܕܚܕܵܐ ܥܪܝܼܨܘܼܬܵܐ ܫܲܪܘܼܝܹܐ ܝܠܵܗ̇ ܒܩܘܼܪܒܵܝܘܼܬܵܐ ܐܸܠܵܘܟ݂ܘܿܢ. ܐܸܢ ܩܲܒܠܝܼܬܘܿܢ ܠܹܗ ܐܵܗܵܐ ܙܘܼܗܵܪܵܐ، ܐܵܢܲܢܩܵܝܬܵܐ ܝܠܵܗ̇ ܕܫܲܪܹܝܬܘܿܢ ܫܩܵܠܵܐ ܦܵܣܘܿܥܝܵܬܹ̈ܐ ܠܸܢܛܵܪܵܐ ܩܵܐ ܓܵܢܵܘܟ݂ܘܿܢ ܘܩܵܐ ܐ݇ܚܪܹ̈ܢܹܐ.

ܩܵܐ ܛܘܼܦ̮ܣܵܐ، ܒܲܠܟܵܐ ܕܩܲܒܠܝܼܬܘܿܢ ܚܲܕ ܙܘܼܗܵܪܵܐ ܦܲܩܘܼܕܵܘܟ݂ܘܿܢ ܕ ‘Monitor conditions as they are changing’ (ܡܲܪܗܘܼܢ ܥܲܝܢܵܐ ܥܲܠ ܐܲܗܘܵܠܹ̈ܐ ܟܲܕ ܫܲܚܠܘܼܦܹܐ ܝܢܵܐ).

ܐܸܢ ܐܵܗܵܐ ܝܼܠܹܗ ܩܵܐ ܚܲܕ ܢܘܼܪܵܐ ܕܡܲܝܫܵܬܹ̈ܐ، ܙܘܼܗܵܪܵܐ ܦܸܪܬܩܵܠܵܝܵܐ ܒܸܕ ܡܲܚܙܹܐ ܚܲܕ ܝܘܼܩܢܵܐ ܕܠܵܗܵܐ ܕܢܘܼܪܵܐ.

ܡܲܪܗܲܝܬܵܐ ܕܥܲܝܢܵܐ ܥܲܠ ܐܲܗܘܵܠܹ̈ܐ ܡܵܨܝܵܐ ܕܚܵܒ݂ܫܵܐ ܡܸܢܕܝܼܵܲܢܹ̈ܐ ܐܲܝܟ݂:

• ܨܲܚܨܵܝܬܵܐ ܪܹܐܙܵܢܵܐܝܼܬ ܕܬܘܼܠܚܵܡܵܐ ܕ VicEmergency
• ܦܬܵܚܬܵܐ ܕܦܪܵܣܩܵܠܵܘܟ݂ܘܿܢ ܠܦܵܪܘܿܣܵܐ ܕܛܸܒܹ̈ܐ ܕܥܪܝܼܨܘܼܬܵܐ ܓܵܘ ܦܢܝܼܬܵܘܟ݂ܘܿܢ
• ܒܸܝܵܗܒ݂ܵܐ ܘܒܸܫܩܵܠܵܐ ܥܲܡ ܫܒ݂ܵܒ݂ܵܘܟ݂̈ܘܿܢ ܠܐܲܟܘܼܕܹܐ ܕܐܵܢܝܼ ܒܹܝܕܵܥܝܵܐ ܝܢܵܐ ܡܘܿܕܝܼ ܩܲܘܘܼܡܹܐ ܝܠܹܗ
• ܦܲܟܘܼܪܹܐ ܠܒ݂ܲܕܲܪ ܕܒܲܝܬܵܐ ܠܸܚܙܵܝܵܐ ܢܝܼܫܲܢܩܹ̈ܐ ܝܲܢ ܬܸܢܵܐ ܝܲܢ ܩܸܛܡܵܐ ܝܲܢ ܠܵܗܹ̈ܐ ܕܢܘܼܪܵܐ. ܐܸܢ ܐܲܗܘܵܠܹ̈ܐ ܒܸܗܘܵܝܵܐ ܝܢܵܐ ܒܘܼܫ ܚܸܪܒܵܐ، ܐܵܢܲܢܩܵܝܬܵܐ ܝܠܵܗ̇ ܕܡܲܦܠܸܚܝܼܬܘܿܢ ܠܹܗ ܚܘܼܛܵܛܵܘܟ݂ܘܿܢ ܕܢܘܼܪܵܐ ܘܕܦܵܠܛܝܼܬܘܿܢ ܡ̣ܢ ܒܲܝܬܵܐ.

ܬܒܵܥܬܵܐ ܠܦܘܼܩܕܵܢܹ̈ܐ ܕܙܘܼܗܵܪܵܐ ܗܵܫܵܐܝܼܬ

ܡܲܥܢܵܝܵܐ ܕܚܲܕ ܙܘܼܗܵܪܵܐ ܕܥܪܝܼܨܘܼܬܵܐ ܒܪܲܢܓܵܐ ܣܡܘܼܩܵܐ ܝܼܠܹܗ ܕܐܲܚܬܘܿܢ ܝܼܬܘܿܢ ܓܵܘ ܩܸܢܛܵܐ ܗܵܫܵܝܵܐ، ܘܕܥܪܝܼܨܘܼܬܵܐ ܒܸܕ ܥܵܒ݂ܕܵܐ ܟܵܐܪ ܥܲܠܵܘܟ݂ܘܿܢ. ܐܸܢ ܐܲܚܬܘܿܢ ܩܲܒܠܝܼܬܘܿܢ ܠܹܗ ܐܵܗܵܐ ܙܘܼܗܵܪܵܐ، ܬܒܘܿܥܘܼܢ ܠܦܘܼܩܕܵܢܹ̈ܐ ܚܲܕܪܹܫܵܐ، ܣܵܒܵܒ ܟܠ ܥܲܪܩܲܠܬܵܐ ܕܗܵܘܝܵܐ ܡܵܨܝܵܐ ܕܡܲܬܒ݂ܵܐ ܠܗܘܿܢ ܚܲܝܵܘܟ݂ܘܿܢ ܓܵܘ ܩܹܘܲܢܕܹܢܘܿܣ.

ܩܵܐ ܛܘܼܦ̮ܣܵܐ، ܐܸܢ ܩܲܒܠܝܼܬܘܿܢ ܚܲܕ ܙܘܼܗܵܪܵܐ ܕܥܪܝܼܨܘܼܬܵܐ ܒܪܲܢܓܵܐ ܣܡܘܼܩܵܐ ܩܵܐ ܚܲܕ ܢܘܼܪܵܐ ܥܲܡ ܦܘܼܩܕܵܢܵܐ Take shelter now (ܡܣܲܬܪܘܼܢ ܠܵܗ̇ ܓܵܢܵܘܟ݂ܘܿܢ ܗܵܕܝܼܵܐ)، ܡܲܥܢܵܝܵܐ ܕܙܘܼܗܵܪܵܐ ܝܼܠܹܗ ܕܦܠܵܛܬܵܐ ܡ̣ܢ ܓܵܘ ܒܲܝܬܵܐ ܝܼܠܵܗ̇ ܪܵܒܵܐ ܩܹܘܲܢܕܹܢܘܿܣܵܝܬܵܐ.

ܡܲܥܢܵܝܵܐ ܕܡܣܲܬܲܪܬܵܐ ܕܓܵܢܵܐ ܡܵܨܹܐ ܕܚܵܒ݂ܸܫ ܡܸܢܕܝܼܵܢܹ̈ܐ ܐܲܝܟ݂:

• ܥܒ݂ܵܪܬܵܐ ܠܓܵܘܵܐ ܕܒܲܝܬܵܐ، ܕܒ݂ܵܪܬܵܐ ܕܟܠܲܝܗܝ ܬܲܪ̈ܥܹܐ ܘܟܵܘܵܬܹ̈ܐ ܘܡܲܦܩܹ̈ܐ
• ܠܒ݂ܵܫܬܵܐ ܕܠܒ݂ܘܼܫܹ̈ܐ ܡܢܲܛܪ̈ܵܢܹܐ، ܐܲܝܟ݂ ܕܟܬܵܢܵܐ ܝܲܢ ܥܲܡܪܵܐ ܚܠܝܼܡܵܐ ܘܓܲܡܒܘܼܙܹ̈ܐ ܕܦܘܼܠܚܵܢܵܐ
• ܪܚܵܫܬܵܐ ܠܓܵܘ ܚܕܵܐ ܐܘܿܬܵܓ݂ ܕܐܝܼܬܠܵܗ̇ ܚܲܕ ܡܲܦܩܵܐ ܨܸܦܝܵܐ ܘܚܲܕ ܚܸܙܘܵܐ ܕܐܲܗܘܵܠܹ̈ܐ ܠܒ݂ܲܕܲܪ ܕܒܲܝܬܵܐ.

ܠܸܦܪܵܩܵܐ ܡ̣ܢ ܐܲܝܵܐ ܐܲܝܟܲܢܵܝܘܼܬܵܐ (ܐܲܗܘܵܠ)، ܐܲܡܝܼܢܵܐܝܼܬ ܡܲܪܝܸܙܘܼܢ ܕܦܵܠܛܝܼܬܘܿܢ ܒܟ݂ܝܼܪܵܐܝܼܬ. ܒܲܠܟܵܐ ܕܡܲܟ̰ܡܸܥܝܵܢܹ̈ܐ ܕܢܘܼܪܵܐ ܠܵܐ ܗܵܘܝܼ ܡܵܨܝܵܢܹ̈ܐ ܕܡܵܛܝܼ ܐܸܠܵܘܟ݂ܘܿܢ ܒܟܠ ܥܸܕܵܢܵܐ ܕܗܵܘܝܵܐ.

ܦܲܪܡܵܝܬܵܐ ܕܙܘܼܗܵܪܹ̈ܐ ܘܡܘܿܕܝܼ ܠܸܥܒ݂ܵܕܵܐ ܡ̣ܢ ܒܵܬ݇ܪ ܩܲܒܲܠܬܲܝܗܝ ܝܼܠܵܗ̇ ܐܵܢܲܢܩܵܝܬܵܐ. ܐ݇ܢܵܫܹ̈ܐ ܦܝܵܫܵܐ ܝܢܵܐ ܡܘܼܬܒ݂ܹܐ ܓܵܘ ܩܹܘܲܢܕܹܢܘܿܣ ܘܗܵܘܝܵܐ ܕܡܵܝܬܝܼ ܣܵܒܵܒ ܐܵܢܝܼ ܠܹܐ ܝܵܕܥܝܼ ܡܘܿܕܝܼ ܥܵܒ݂ܕܝܼ ܡ̣ܢ ܩܲܕ݇ܡ ܥܸܕܵܢܵܐ.

ܡܵܘܕܥܵܢܘܼܬܵܐ ܕܟܢܘܼܫܬܵܐ

ܐܵܦ ܐܸܓܲܪ̈ܝܵܬܹܐ ܕܡܵܘܕܥܵܢܘܼܬܵܐ ܕܟܢܘܼܫܬܵܐ ܟܹܐ ܡܲܒܝܸܢܝܼ ܥܲܠ ܚܲܪܝܼܛܵܐ ܕܙܘܼܗܵܪܹ̈ܐ. ܐܲܢܹܐ ܐܸܓܲܪ̈ܝܵܬܹܐ ܦܝܼܫܹܐ ܝܢܵܐ ܡܘܼܚܙܸܝܹܐ ܒܪܲܢܓܵܐ ܡܝܼܠܵܢܵܐ ܐܝܼܡܲܢ ܕܩܸܢܛܵܐ ܒܵܨܘܿܪܵܐ ܝܠܹܗ ܝܲܢ ܠܲܝܬ ܩܸܢܛܵܐ. ܐܵܢܝܼ ܟܹܹܐ ܝܵܗܒ݂ܝܼ ܡܵܘܕܥܵܢܘܼܬܵܐ ܪܫܝܼܡܬܵܐ ܘܚܘܼܕܵܬܹ̈ܐ ܒܘܼܬ ܓܸܕܫܹ̈ܐ.

ܗܕܝܼܪܹܐ ܝܬܘܿܢ ܩܵܐ ܥܸܕܵܢܵܐ ܕܚܕܵܐ ܥܪܝܼܨܘܼܬܵܐ؟

ܦܲܪܡܵܝܬܵܐ ܕܙܘܼܗܵܪܹ̈ܐ ܝܼܠܵܗ̇ ܚܲܕ ܣܲܗܡܵܐ ܕܗܲܕܲܪܬܵܐ ܩܵܐ ܚܕܵܐ ܥܪܝܼܨܘܼܬܵܐ.

ܬܘܼܠܚܵܡܵܐ ܘܫܲܘܦܵܐ ܐܹܠܸܟܬܪܘܿܢܵܝܵܐ ܕ VicEmergency ܟܹܐ ܝܵܗܒ݂ܝܼܠܵܘܟ݂ܘܿܢ ܡܵܘܕܥܵܢܘܼܬܵܐ ܐܵܢܲܢܩܵܝܬܵܐ ܡ̣ܢ ܩܲܕ݇ܡ ܘܒܡܸܬܚܵܐ ܘܡ̣ܢ ܒܵܬ݇ܪ ܕܩܲܘܲܡܝܵܬܹ̈ܐ.

ܗܲܕܲܪܬܵܐ ܕܓܵܢܵܐ ܩܵܐ ܥܪ̈ܝܼܨܘܼܝܵܬܹܐ ܝܼܠܵܗ̇ ܘܵܠܝܼܬܵܐ ܕܟܠܚܲܕ:

• make a plan (ܬܲܪܨܘܼܢ ܚܲܕ ܚܘܼܛܵܛܵܐ)
• ܡܲܨܠܹܝܡܘܼܢ ܠܹܗ ܬܘܼܠܚܵܡܵܐ ܕ VicEmergency ܘܝܕܹܝܥܡܘܼܢ ܕܵܐܟ݂ܝܼ ܡܲܦܠܸܚܝܼܬܘܿܢ ܠܹܗ
• ܝܕܹܝܥܡܘܼܢ ܠܗܘܿܢ ܩܸܢܛܵܘܟ݂̈ܘܿܢ ܦܢܝܼܬܵܝܹ̈ܐ.