ܥܲܡܚܕܵܕܹܐ، ܐܲܚܢܲܢ ܡܵܨܲܚ ܡܲܒܪܸܝܲܚ ܡܲܕܪܲܫܝܵܬܹܐ ܒܘܼܫ ܫܲܝܢܵܝܹܐ (ܣܲܠܵܡܲܬ) ܐܲܝܟܵܐ ܕܟܠܚܲܕ ܪܵܓܼܹܫ ܒܒܲܝܬܵܝܘܼܬܵܐ، ܝܵܠܹܦ ܘܗܵܘܹܐ ܡܲܢܬܸܝܵܢܹܐ.
ܐܝܼܡܲܢ ܕܡܲܕܪܲܫܝܵܬܹܐ، ܒܲܝܬܘܼܝܵܬܹܐ ܘܐܸܣܟܘܿܠܵܝܹܐ ܦܵܠܚܝܼ ܥܲܡܚܕܵܕܹܐ، ܐܲܚܢܲܢ ܒܸܕ ܩܵܢܲܚ ܠܐܵܢܝܼ ܦܠܵܛܹܐ ܒܘܼܫ ܨܦܵܝܝܼ. ܐܲܢܹܐ ܫܲܘܬܲܦܝܵܬܹܐ (ܫܲܪܝܼܟܘܼܝܵܬܹܐ) ܝܼܢܵܐ ܐܵܢܲܢܩܵܝܹܐ ܩܵܐ ܡܲܒܪܵܝܬܵܐ ܕܡܲܚܕܘܼܪܹܐ ܕܡܲܕܪܲܫܬܵܐ ܕܟܹܐ ܣܵܢܕܝܼ ܩܵܐ ܟܠܲܝܗܝ ܐܸܣܟܘܿܠܵܝܹܐ ܕܪܵܓܼܫܝܼ ܒܒܲܝܬܵܝܘܼܬܵܐ، ܝܵܠܦܝܼ ܘܡܲܢܬܝܼ ܒܝܘܼܠܦܵܢܲܝܗܝ. ܐܲܝܟܼ ܚܲܕ ܐܲܒܼܵܗܵܐ ܝܲܢ ܡܲܣܸܡܵܢܹܐ ܕܒܵܠܵܐ، ܐܲܚܬܘܿܢ ܐܝܼܬܠܵܘܟܼܘܿܢ ܚܲܕ ܓܲܪܵܐ ܪܵܒܵܐ ܐܵܢܲܢܩܵܝܵܐ ܓܵܘ ܗܲܝܲܪܬܵܐ ܕܫܲܒܼܪܵܘܟܼܘܿܢ ܕܦܲܪܡܹܐ ܘܬܲܡܸܡ ܠܣܒܵܪܝܵܬܹܐ ܡܫܲܪܸܟܵܢܹܐ ܕܕܘܼܒܵܪܹܐ.
ܕܵܐܟܼܝܼ ܐܸܣܟܘܿܠܵܝܹܐ ܟܹܐ ܡܲܚܙܝܼ ܠܕܘܼܒܵܪܹܐ ܣܒܝܼܪܹܐ
ܓܵܘ ܡܲܕܪܲܫܬܵܐ، ܣܒܝܼܪܬܵܐ ܝܠܵܗܿ ܡܼܢ ܟܠܲܝܗܝ ܐܸܣܟܘܿܠܵܝܹܐ ܕܗܵܘܝܼ ܡܝܲܩܪܵܢܹܐ، ܫܲܝܢܵܝܹܐ، ܘܒܠܝܼܓܹܐ. ܐܲܢܹܐ ܕܘܼܒܵܪܹܐ ܟܹܐ ܗܲܝܸܪܝܼ ܒܥܒܼܵܕܬܵܐ ܕܡܲܕܪܲܫܝܵܬܹܐ ܕܗܵܘܝܼ ܚܕܵܐ ܕܘܼܟܬܵܐ ܐܲܝܟܵܐ ܕܟܠܚܲܕ ܡܵܨܹܐ ܗܵܘܹܐ ܡܲܢܬܸܝܵܢܵܐ.
ܐܸܣܟܘܿܠܵܝܹܐ ܟܹܐ ܬܲܡܸܡܝܼ ܠܐܲܢܹܐ ܣܒܵܪܝܵܬܹܐ ܕܕܘܼܒܵܪܹܐ ܒܗܘܵܝܬܵܐ ܡܝܲܩܪܵܢܹܐ، ܫܲܝܢܵܝܹܐ ܘ ܒܠܝܼܓܹܐ.
ܡܝܲܩܪܵܢܹܐ
- ܒܸܬܒܵܥܵܐ ܦܘܼܩܕܵܢܹܐ ܕܡܲܠܦܵܢܹܐ ܘܩܵܢܘܿܢܹܐ ܕܡܲܕܪܲܫܝܵܬܹܐ.
- ܡܲܣܘܼܡܹܐ ܒܵܠܵܐ ܥܲܠ ܡܘܼܠܟܵܢܹܐ ܕܡܲܕܪܲܫܬܵܐ ܘܥܲܠ ܡܸܢܕܝܼܵܢܹܐ ܐ݉ܚܹܪ݉ܢܹܐ ܕܓܵܘ ܡܲܕܪܲܫܬܵܐ.
- ܡܲܦܠܘܼܚܹܐ ܠܸܫܵܢܵܐ ܡܝܲܩܪܵܢܵܐ.
ܫܲܝܢܵܝܹܐ
- ܚܲܡܘܼܝܹܐ ܠܓܵܢܲܝܗܝ ܘܠܐ݉ܚܹܪ݉ܢܹܐ ܫܲܝܢܵܝܹܐ (ܣܲܠܵܡܲܬ) ܡܼܢ ܙܝܵܢܵܐ.
- ܡܲܕܘܼܥܹܐ ܝܲܢ ܒܸܛܠܵܒܵܐ ܗܲܝܲܪܬܵܐ ܡܼܢ ܚܲܕ ܟܡܝܼܠܵܐ ܒܫܸܢܹܐ ܐܸܢ ܐܵܢܝܼ ܝܲܢ ܐ݉ܚܹܪ݉ܢܹܐ ܠܵܐ ܝܢܵܐ ܦܝܼܫܹܐ ܡܘܼܥܡܸܠܹܐ ܒܟܹܐܢܘܼܬܵܐ.
- ܐܲܚܟ̰ܝܼ ܡܲܝܬܘܼܝܹܐ ܡܸܢܕܝܼܵܢܹܐ ܫܲܝܢܵܝܹܐ ܘܐܵܢܲܢܩܵܝܹܐ ܠܡܲܕܪܲܫܬܵܐ.
ܒܠܝܼܓܹܐ
- ܒܸܐ݉ܙܵܠܵܐ ܠܡܲܕܪܲܫܬܵܐ ܟܠܝܘܿܡ، ܒܸܗܕܵܪܵܐ ܒܥܸܕܵܢܵܐ، ܘܒܸܗܘܵܝܵܐ ܗܵܙܹܪ ܩܵܐ ܝܠܵܦܬܵܐ.
- ܫܲܪܘܼܟܹܐ، ܓ̰ܲܪܘܼܒܹܐ ܕܝܵܠܦܝܼ ܒܟܠ ܚܲܝܠܲܝܗܝ، ܘܒܸܛܠܵܒܵܐ ܗܲܝܲܪܬܵܐ ܐܝܼܡܲܢ ܕܣܵܢܩܝܼ.
- ܒܝܼܕܵܥܝܵܐ ܘܒܸܬܒܵܥܵܐ ܠܫܘܼܝܵܫܹܐ ܕܡܲܕܪܲܫܬܵܐ، ܒܸܚܒܼܵܫܵܐ ܫܘܼܝܵܫܵܐ ܕܬܹܠܹܦ̮ܘܿܢ ܕܡܘܿܒܵܝܠ.
ܕܵܐܟܼܝܼ ܐܲܒܼܵܗܹ̈ܐ ܘܡܲܣܸܡܵܢܹܐ ܕܒܵܠܵܐ ܡܵܨܝܼ ܗܲܝܸܪܝܼ
ܒܡܲܚܙܵܝܬܵܐ ܕܵܐܟܼܝܼ ܠܡܲܦܠܘܼܚܹܐ ܕܘܼܒܵܪܹܐ ܐܲܝܟܼ ܛܘܼܦ̮ܣܵܐ ܘܚܲܦܲܛܬܵܐ ܕܕܘܼܒܵܪܹܐ ܡܣܝܼܡܵܢܹܐ، ܐܲܚܬܘܿܢ ܒܗܲܝܸܪܝܼܬܘܿܢ ܩܵܐ ܫܲܒܼܪܵܘܟܼܘܿܢ ܕܒܵܢܹܐ ܡܗܝܼܪܘܼܝܵܬܹܐ ܘܥܵܕܲܬܹܐ ܕܐܵܢܝܼ ܣܢܝܼܩܹܐ ܝܢܵܐ ܐܸܠܲܝܗܝ ܩܵܐ ܕܗܵܘܝܼ ܡܲܢܬܝܼܵܢܹܐ ܓܵܘ ܡܲܕܪܲܫܬܵܐ. ܐܝܼܡܲܢ ܕܒܲܝܬܘܼܝܵܬܹܐ ܘܡܲܕܪܲܫܝܵܬܹܐ ܦܵܠܚܝܼ ܥܲܡܚܕܵܕܹܐ، ܐܸܣܟܘܿܠܵܝܹܐ ܡܵܨܝܼ ܩܵܢܝܼ ܠܦܠܵܛܹܐ ܒܘܼܫ ܨܦܵܝܝܼ.
ܐܲܒܼܵܗܹܐ ܘܡܲܣܸܡܵܢܹܐ ܕܒܵܠܵܐ ܡܵܨܝܼ ܗܲܝܸܪܝܼ ܒܣܢܵܕܬܵܐ ܕܕܘܼܒܵܪܹܐ ܕܫܲܒܼܪܲܝܗܝ ܩܵܐ ܕܗܵܘܝܼ:
ܡܝܲܩܪܵܢܹܐ
- ܒܝܼܕܵܥܝܵܐ ܩܵܢܘܿܢܹܐ ܕܡܲܕܪܲܫܬܵܐ ܘܩܵܐ ܕܣܵܢܕܝܼ ܠܗܘܿܢ ܓܵܘ ܒܲܝܬܵܐ.
- ܡܲܚܙܘܼܝܹܐ ܕܵܐܟܼܝܼ ܠܡܲܦܠܘܼܚܹܐ ܕܘܼܒܵܪܹܐ ܡܝܲܩܪܵܢܹܐ ܐܲܝܟܼ ܛܘܼܦ̮ܣܵܐ ܕܐܘܼܪܚܵܐ ܕܕܵܐܟܼܝܼ ܐܲܚܬܘܿܢ ܟܹܐ ܗܲܡܙܸܡܝܼܬܘܿܢ ܥܲܡ ܘܒܘܼܬ ܦܵܠܵܚܹܐ ܕܡܲܕܪܲܫܬܵܐ، ܒܲܝܬܘܼܝܵܬܹܐ، ܘܐ݉ܚܹܪ݉ܢܹܐ، ܦܲܪܨܘܿܦܵܐܝܼܬ ܘܥܲܠ ܐܸܢܬܸܪܢܸܬ.
- ܡܲܦܠܘܼܚܹܐ ܐܘܼܪܚܵܬܹܐ ܕܡܲܕܪܲܫܬܵܐ ܠܗܲܡܙܘܼܡܹܐ ܒܘܼܬ ܘܠܸܫܪܵܝܵܐ ܢܸܓܵܪܵܢܘܼܝܵܬܹܐ ܒܟܼܝܼܪܵܐܝܼܬ (ܡܼܢ ܩܵܕ݉ܡ ܥܸܕܵܢܵܐ).
ܫܲܝܢܵܝܹܐ
- ܒܸܦܠܵܚܵܐ ܥܲܡܚܕܵܕܹܐ ܥܲܡ ܦܵܠܵܚܹܐ ܕܡܲܕܪܲܫܬܵܐ ܐܸܢ ܫܲܒܼܪܵܘܟܼܘܿܢ ܒܸܗܘܵܝܵܐ ܝܢܵܐ ܩܵܐܠܹܗ ܩܸܛܪܹܐ ܓܵܘ ܡܲܕܪܲܫܬܵܐ ܠܦܲܪܡܘܼܝܹܐ ܘܠܸܫܪܵܝܵܐ ܠܩܸܛܪܵܐ.
- ܐܲܟܘܼܕܹܐ ܕܫܲܒܼܪܵܘܟܼܘܿܢ ܝܵܕܥܹܐ ܕܨܦܵܝܝܼ ܝܠܵܗܿ ܛܠܵܒܬܵܐ ܕܗܲܝܲܪܬܵܐ ܡܼܢ ܚܲܕ ܟܡܝܼܠܵܐ ܒܫܸܢܹܐ ܕܐܝܼܬܗܘܿܢ ܗܲܝܡܵܢܘܼܬܵܐ ܒܝܼܹܗ ܓܵܘ ܡܲܕܪܲܫܬܵܐ.
- ܐܲܟܘܼܕܹܐ ܕܫܲܒܼܪܵܘܟܼܘܿܢ ܦܵܐܹܫ ܫܲܝܢܵܝܵܐ ܥܲܠ ܐܸܢܬܸܪܢܸܬ ܒܗܲܡܙܲܡܬܵܐ ܥܲܡܲܝܗܝ ܘܠܸܕܪܵܫܵܐ ܢܸܓܵܪܵܢܘܼܝܵܬܹܐ ܒܟܼܝܼܪܵܐܝܼܬ.
ܒܠܝܼܓܹܐ
- ܗܲܝܘܼܪܹܐ ܠܫܲܒܼܪܵܘܟܼܘܿܢ ܕܗܲܕܸܪ ܠܡܲܕܪܲܫܬܵܐ ܟܠܝܘܿܡ ــ ܟܠ ܝܵܘܡܵܐ ܝܼܠܹܗ ܐܵܢܲܢܩܵܝܵܐ.
- ܝܵܗܒܼܘܼܠܹܐ ܘܒܸܫܩܵܠܵܐ ܥܲܡ ܦܵܠܵܚܹܐ ܕܡܲܕܪܲܫܬܵܐ ܘܒܸܦܠܵܚܵܐ ܥܲܡܚܕܵܕܹܐ ܠܸܣܢܵܕܵܐ ܠܝܘܼܠܦܵܢܵܐ ܘܠܛܵܒܼܘܼܬܵܐ ܕܚܲܝܹܐ ܕܫܲܒܼܪܵܘܟܼܘܿܢ.
- ܗܲܡܙܲܡܬܵܐ ܥܲܡ ܫܲܒܼܪܵܘܟܼܘܿܢ ܒܘܼܬ ܝܵܘܡܲܝܗܝ ܘܕܵܐܟܼܝܼ ܝܢܵܐ ܒܸܪܓܼܵܫܵܐ، ܘܚܲܦܘܼܛܹܐ ܠܝܠܵܦܬܲܝܗܝ ܒܚܙܵܝܬܵܐ ܕܫܘܼܓܼ݉ܠܲܝܗܝ ܘܪܚܵܫܬܲܝܗܝ ܠܵܩܵܕ݉ܡܵܐ ܒܩܪܵܝܬܲܝܗܝ.
ܐܲܚܢܲܢ ܒܝܼܕܵܥܝܵܐ ܝܘܲܚ ܕܚܲܕܟܡܵܐ ܐܸܣܟܘܿܠܵܝܹܐ ܘܒܲܝܬܘܼܝܵܬܲܝܗܝ ܒܸܚܙܵܝܵܐ ܝܢܵܐ ܥܲܣܩܘܼܬܵܐ ܒܸܗܕܵܪܬܵܐ ܠܡܲܕܪܲܫܬܵܐ ܝܲܢ ܒܡܲܥܡܲܠܬܵܐ ܥܲܡ ܠܵܐ ܩܒܵܠܬܵܐ ܕܡܲܕܪܲܫܬܵܐ. ܠܲܐܟܼܐ ܝܼܢܵܐ ܚܲܕܟܡܵܐ ܡܲܒܘܼܥܹܐ ܕܡܵܨܝܼ ܗܲܝܸܪܝܼ ܠܵܘܟܼܘܿܢ:
ܕܵܐܟܼܝܼ ܡܲܕܪܲܫܝܵܬܹܐ ܟܹܐ ܣܵܢܕܝܼ ܠܐܸܣܟܘܿܠܵܝܹܐ ܩܵܐ ܕܬܲܡܸܡܝܼ ܠܣܒܵܪܝܵܬܹܐ ܕܕܘܼܒܵܪܹܐ
ܒܡܲܠܲܦܬܵܐ ܘܬܢܵܝܬܵܐ ܕܡܲܬܲܒܼܬܵܐ ܕܚܲܝܠܵܐ ܠܫܠܵܡܬܵܐ ܠܕܘܼܒܵܪܹܐ ܡܣܝܼܡܵܢܹܐ، ܫܲܝܢܵܝܹܐ ܘܡܲܚܕܘܼܪܹܐ ܝܘܼܠܦܵܢܵܝܹܐ ܟܹܐܢܹܐ ܥܲܡ ܚܕܵܐ ܩܲܢܛܪܵܢܬܵܐ ܥܲܠ ܝܠܵܦܬܵܐ ܘܛܵܒܼܘܼܬܵܐ ܕܚܲܝܹܐ.
ܡܲܕܪܲܫܝܵܬܹܐ ܟܹܐ ܗܲܝܸܪܝܼ ܠܒܲܝܬܘܼܝܵܬܹܐ ܘܠܐܸܣܟܘܿܠܵܝܹܐ ܒܗܘܵܝܬܵܐ ܡܝܲܩܪܵܢܹܐ، ܫܲܝܢܵܝܹܐ ܘܒܠܝܼܓܹܐ.
ܡܝܲܩܪܵܢܹܐ
- ܡܲܠܘܼܦܹܐ ܘܡܲܚܙܘܼܝܹܐ ܩܵܢܘܿܢܹܐ ܕܡܲܕܪܲܫܬܵܐ ܘܣܒܵܪܝܵܬܹܐ ܕܕܘܼܒܵܪܹܐ ܡܣܝܼܡܵܢܹܐ ܩܵܐ ܐܸܣܟܘܿܠܵܝܹܐ.
- ܡܲܠܘܼܦܹܐ ܒܡܸܠܝܘܼܬܵܐ، ܡܲܚܙܘܼܝܹܐ ܘܒܸܚܩܵܪܵܐ ܕܘܼܒܵܪܹܐ ܡܝܲܩܪܵܢܹܐ ܣܒܝܼܪܹܐ.
- ܒܠܝܼܓܹܐ ܫܲܘܬܵܦܵܐܝܼܬ ܘܡܣܝܼܡܵܢܵܐܝܼܬ ܥܲܡ ܟܠܲܝܗܝ ܐܸܣܟܘܿܠܵܝܹܐ ܘܡܲܣܸܡܵܢܹܐ ܕܒܵܠܵܐ.
ܫܲܝܢܵܝܹܐ
- ܕܗܵܘܝܼ ܠܗܘܿܢ ܫܘܼܝܵܫܹܐ ܘܐܘܼܪܚܵܬܹܐ ܕܥܒܼܵܕܬܵܐ ܕܦܘܼܠܚܵܢܵܐ ܨܸܦܝܹܐ ܠܸܪܚܵܩܵܐ ܡܼܢ ܘܠܸܥܢܵܝܵܐ ܠܓܘܼܡܕܵܢܘܼܬܵܐ (ܡܲܚܙܵܝܬܵܐ ܕܚܲܝܠܵܐ) ܘܠܚܲܡܲܝܬܵܐ ܕܐܸܣܟܘܿܠܵܝܹܐ ܕܗܵܘܝܼ ܫܲܝܢܵܝܹܐ (ܣܲܠܵܡܲܬ).
- ܡܲܩܪܘܼܒܼܹܐ ܣܢܵܕܝܵܬܹܐ ܙܵܘܕܵܢܹܐ ܩܵܐ ܐܸܣܟܘܿܠܵܝܹܐ ܠܵܩܵܕ݉ܡܵܐ، ܘܒܸܣܢܵܕܵܐ ܐܸܣܟܘܿܠܵܝܹܐ ܕܗܲܡܙܸܡܝܼ ܘܛܵܠܒܝܼ ܗܲܝܲܪܬܵܐ.
- ܒܸܪܫܵܡܵܐ ܘܒܸܕܪܵܫܵܐ ܩܸܛܪܹܐ ܠܵܩܵܕ݉ܡܵܐ ܠܚܲܡܘܼܝܹܐ ܚܲܕ ܡܲܚܕܘܼܪܵܐ ܕܡܲܕܪܼܫܬܵܐ ܫܲܝܢܵܝܵܐ ܦܲܓܼܪܵܢܵܐܝܼܬ، ܫܲܘܬܵܦܵܐܝܼܬ ܘܡܲܪܕܘܼܬܵܢܵܐܝܼܬ.
ܒܠܝܼܓܹܐ
- ܡܲܩܪܘܼܒܼܹܐ ܝܘܼܠܦܵܢܵܐ ܫܘܼܡܠܵܝܵܐ، ܒܸܢܝܵܐ ܥܲܠ ܫܘܼܪܵܪܵܐ ܕܬܲܡܸܡ ܠܣܢܝܼܩܘܼܝܵܬܹܐ ܕܟܠܲܝܗܝ ܐܸܣܟܘܿܠܵܝܹܐ.
- ܝܵܗܒܼܘܼܠܹܐ ܚܲܝܠܵܐ ܩܵܐ ܐܸܣܟܘܿܠܵܝܹܐ ܕܗܵܘܹܐܠܗܘܿܢ ܪܸܥܝܵܢܵܐ ܓܵܘ ܫܩܵܠܬܵܐ ܕܦܘܼܣܩܵܢܹܐ ܕܥܵܒܼܕܝܼ ܟܵܐܪ ܥܲܠ ܝܠܵܦܬܲܝܗܝ ܘܥܲܠ ܚܲܝܘܼܬܵܐ ܕܡܲܕܪܲܫܬܵܐ.
- ܒܢܵܝܵܐ ܐܲܣܘܼܪܹܐ ܚܲܝܠܵܢܹܐ ܠܐܲܟܘܼܕܹܐ ܟܠܲܝܗܝ ܐܸܣܟܘܿܠܵܝܹܐ ܪܵܓܼܫܝܼ ܕܦܝܼܫܹܐ ܝܢܵܐ ܚܸܙܝܹܐ، ܫܸܡܥܝܹܐ ܘܡܛܘܼܝܡܸܢܹܐ.
ܡܲܟܼܬܒܼܵܐ ܕܡܲܠܲܦܬܵܐ ܟܹܐ ܡܙܲܘܸܕ ܡܲܒܘܼܥܹܐ ܘܣܢܵܕܬܵܐ ܩܵܐ ܡܲܕܪܲܫܝܵܬܹܐ ܠܒܢܵܝܵܐ ܕܘܼܒܵܪܹܐ ܡܣܝܼܡܵܢܹܐ ܕܐܸܣܟܘܿܠܵܝܵܐ ܘܠܸܒܢܵܝܵܐ ܐܲܣܘܼܪܹܐ ܡܣܝܼܡܵܢܹܐ ܒܹܝܠ ܡܲܕܪܲܫܝܵܬܹܐ، ܐܸܣܟܘܿܠܵܝܹܐ ܘܒܲܝܬܘܼܝܵܬܹܐ.
ܐܲܝܟܵܐ ܕܐܲܒܼܵܗܹܐ ܘܡܲܣܸܡܵܢܹܐ ܕܒܵܠܵܐ ܡܵܨܝܼ ܐܵܙܠ݉ܝܼ ܠܸܛܠܵܒܵܐ ܗܲܝܲܪܬܵܐ
ܐܸܢ ܐܲܚܬܘܿܢ ܢܸܓܵܪܵܢ ܝܬܘܿܢ ܒܘܼܬ ܛܵܒܼܘܼܬܵܐ ܕܚܲܝܹܐ ܕܫܲܒܼܪܵܘܟܼܘܿܢ ܝܲܢ ܕܘܼܒܵܪܹܐ ܝܲܢ ܫܲܝܢܘܼܬܵܐ (ܣܲܠܵܡܲܬܘܼܬܵܐ) ܕܫܲܒ݂ܪܵܘܟ݂ܘܿܢ، ܐܲܚܬܘܿܢ ܡܵܨܝܼܬܘܿܢ:
- ܗܲܡܙܸܡܝܼܬܘܿܢ ܥܲܡ ܡܲܠܦܵܢܵܐ ܕܫܲܒܼܪܵܘܟܼܘܿܢ ܝܲܢ ܦܲܪܨܘܿܦܵܐ ܝܕܝܼܥܵܐ ܕܗܲܡܙܸܡܝܼܬܘܿܢ ܥܲܡܹܗ ܐܲܝܟܼ ܦܵܣܘܿܥܬܵܐ ܩܲܕܡܵܝܬܵܐ ܘܬܵܒܥܝܼܬܘܿܢ ܠܐܘܼܪܚܵܬܹܐ ܕܦܘܼܠܚܵܢܵܐ ܕܡܲܕܪܲܫܬܵܐ ܩܵܐ ܝܵܗܒܼܫܩܵܠܵܐ ܒܘܼܬ ܢܸܓܵܪܵܢܘܼܝܵܬܹܐ.
- ܛܵܠܒܝܼܬܘܿܢ ܣܢܵܕܬܵܐ ܝܲܢ ܦܲܫܲܛܬܵܐ ܡܼܢ ܡܲܕܪܲܫܬܵܐ ـ ܐܵܢܝܼ ܡܵܨܝܼ ܕܐܵܣܪܝܼ ܠܵܘܟܼܘܿܢ ܥܲܡ ܦܵܠܵܚܹܐ ܕܛܵܒܼܘܼܬܵܐ ܕܚܲܝܹܐ ܝܲܢ ܚܸܠܡܲܬܹܐ ܕܚܲܒܝܼܪܹܐ.
- ܡܲܚܒܸܪܝܼܬܘܿܢ ܩܵܐ ܡܲܟܼܬܒܼܵܐ ܐܸܩܠܹܝܡܵܝܵܐ ܕܡܲܟ݂ܬܒ݂ܵܐ ܕܡܲܠܲܦܬܵܐ ܐܸܢ ܐܲܚܬܘܿܢ ܣܵܢܩܝܼܬܘܿܢ ܠܗܲܝܲܪܬܵܐ ܙܵܘܕܵܢܬܵܐ.
ܡܲܒܘܼܥܹܐ ܕܒܹܐܬܵܝܵܐ ܝܼܢܵܐ، ܐܵܦ ܝܼܢܵܐ ܡܸܬܩܲܢܝܵܢܹܐ:
- ܫܲܒܼܟܵܐ ܕܦܘܼܠܚܵܢܵܐ ܕܡܲܩܲܡܬܵܐ ܕܫܲܒܼܪܹܐ ــ ܟܹܐ ܡܙܲܘܸܕܵܐ ܢܲܨܝܼܗܲܬ ܩܵܐ ܐܲܒܼܵܗܹܐ ܒܘܼܬ ܫܲܒܼܪܹܐ ܕܒܥܘܼܡܪܵܐ ܕܡܲܕܪܲܫܬܵܐ، ܫܲܒܼܪܹܐ ܕܡܼܢ ܩܵܕ݉ܡ ܥܘܼܡܪܵܐ ܕܥܠܲܝܡܘܼܢܹܐ ܘ ܥܠܲܝܡܘܼܢܹܐ.
- ܩܲܝܘܼܡܵܐ ܕܫܲܝܢܘܼܬܵܐ ܐܸܠܸܟܬܪܘܿܢܵܝܬܵܐ ــ ܢܲܨܝܼܗܲܬ ܩܵܐ ܐܲܒܼܵܗܹܐ ܘܡܲܣܸܡܵܢܹܐ ܕܒܵܠܵܐ ܠܗܲܝܘܼܪܹܐ ܒܚܲܡܲܝܬܵܐ ܕܫܲܒܼܪܹܐ ܣܲܠܵܡܲܬ ܥܲܠ ܐܸܢܬܸܪܢܸܬ.
- ܚܘܼܛܵܐ ܕܬܲܫܪܲܪܬܵܐ ܕܛܘܼܗܡܵܢܵܝܘܼܬܵܐ (ܫܲܒܼܛܵܢܵܝܘܼܬܵܐ) ــ ܝܠܘܿܦܘܼܢ ܕܵܐܟܼܝܼ ܬܲܫܪܸܪܝܼܬܘܿܢ ܠܗܘܿܢ ܛܘܼܗܡܵܢܵܝܘܼܬܵܐ ܝܲܢ ܦܵܪܘܿܫܘܼܬܵܐ ܬܲܘܕܝܼܬܵܢܵܝܬܵܐ ܓܵܘ ܡܲܕܪܲܫܝܵܬܹܐ.
- ܡܲܟܠܸܝܵܢܹܐ ܕܓܘܼܡܕܵܢܹܐ ــ ܢܲܨܝܼܗܲܬ ܩܵܐ ܐܲܒܼܵܗܹܐ ܘܡܲܣܸܡܵܢܹܐ ܕܒܵܠܵܐ ܒܘܼܬ ܓܘܼܡܕܵܢܘܼܬܵܐ.
Updated