VCE ꤔꤢ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ (VCE and VCE Vocational Major) - ꤊꤢ꤬ꤛꤢ꤭ ꤜꤟꤤ꤬ (Karenni)

VCE ꤢ꤬ꤚꤤ꤬ꤢ꤬ꤚꤛꤢ꤭ ꤔꤢ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬

ꤠꤤ꤬ꤒꤥ꤭ꤚꤤ꤬ꤛꤢ꤬ ꤜꤤ꤬ꤙꤢ꤬ꤘꤛꤢꤩꤗꤢ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ (VCE) ꤗꤢ꤬ ꤠꤤ꤬ꤒꤥ꤬꤭ꤚꤤ꤬ꤛꤢ꤬ ꤢ꤬ꤒꤟꤢꤧ꤬ꤡꤟꤛꤢꤒꤟꤢꤧ꤬ꤘꤢꤧ꤬ ꤑꤟꤢꤩ꤭ꤒꤟꤥꤒꤣ꤬ꤒꤟꤥ ꤘꤣ ꤢ꤬ꤘꤢꤨ꤬ꤢ꤬ꤕꤚꤟꤢꤧ ꤛꤢꤩ꤭ꤔꤌꤣ꤬ ꤕꤚꤢꤧ꤯ ꤠꤤ꤬ꤒꤥ꤭ꤚꤤ꤬ꤛꤢ꤬ ꤜꤤ꤬ꤙꤢ꤬ꤘꤛꤢꤩꤗꤢ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ (VCE) ꤗꤢ꤬ ꤢ꤬ ꤙꤢꤗꤥ꤭ ꤊꤜꤛꤢ ꤘꤣ ꤞꤝꤥꤜꤤ꤬ꤟꤥ꤭ꤒꤟꤥꤘꤢꤨ꤬, TAFE ꤘꤣ ꤢ꤬ꤒꤟꤥꤘꤢꤨ꤬ ꤜꤣꤊꤜꤢꤪ꤭ ꤗꤟꤢꤒꤥ꤬ꤚꤢꤪ VET ꤜꤤ꤬ꤙꤢ꤬ꤘꤛꤢꤩꤗꤢ ꤒꤟꤢꤧ꤬ꤤ꤬ꤞꤝꤥꤒꤥ꤭, ꤒꤟꤢꤧ꤬ꤤ꤬ꤞꤝꤥꤗꤟꤢꤩ꤬ꤡꤟꤛꤢꤒꤟꤢꤧ꤬ ꤒꤢ꤬ꤟꤢꤩ꤬, ꤒꤟꤢꤧ꤬ꤤ꤬ꤞꤝꤥꤚꤟꤛꤢ꤬ꤒꤟꤢꤧ꤬ ꤒꤢ꤬ꤟꤢꤩ꤬ ꤔꤢ ꤕꤚꤟꤢꤧ꤬ꤗꤟꤢꤩ꤬ꤒꤟꤢꤧ꤬ ꤕꤜꤢꤪꤗꤟꤢꤨ꤬ꤖꤢꤨ ꤔꤌꤣ꤬ ꤕꤚꤢꤧ꤯

VCE ꤗꤢ꤬ ꤢ꤬ꤗꤟꤢꤩ꤬ꤜꤟꤛꤢꤓꤢꤩ꤬ꤘꤢꤨ꤬ ꤞꤛꤢꤖꤢꤨ ꤢ꤬ꤊꤢꤦ ꤙꤢꤩ꤬ꤔꤟꤌꤣ꤭ꤥ꤬ꤕꤢ꤬ꤔꤟꤤ ꤕꤟꤥ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬, ꤢ꤬ꤍꤟꤥꤜꤢ꤬ꤏꤢ ꤗꤢ꤬ ꤔꤟꤢꤧ꤬ ꤕꤟꤢꤨ꤭ꤞꤢꤧꤑꤢꤩ꤭ ꤔꤟꤤꤡꤟꤛꤢ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤣ ꤢ꤬ꤞꤢꤧ꤭ ꤂-ꤔꤢ꤬ ꤔꤢ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤘꤣ ꤔꤢꤪ꤭ꤢꤩ꤬ꤔꤟꤤꤡꤟꤛꤢ ꤘꤣ VCE ꤢ꤬ꤊꤢꤨ꤬꤭ꤔꤌꤣ꤬ ꤕꤚꤢꤧ꤯

VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤗꤢ꤬ ꤢ꤬ ꤊꤢꤦ ꤗꤟꤢꤩ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤔꤟꤢꤧ꤬ ꤔꤟꤤꤘꤢꤦ꤬ꤒꤣ꤬ꤕꤚꤟꤢꤧ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤔꤢ ꤒꤟꤢꤧ꤬ꤓꤝꤥ꤬꤭ꤕꤚꤟꤢꤧ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤘꤣ ꤔꤢꤪ꤭ꤢꤩ꤬ꤔꤟꤤꤡꤟꤛꤢ ꤒꤢ꤬ꤟꤢꤩ꤬ ꤕꤢ꤭꤯ ꤢ꤬ ꤊꤢꤦ ꤒꤢ꤬ꤚꤤ꤬ꤒꤢ꤬ꤚꤛꤢ꤭ ꤗꤟꤢꤩ꤬ꤡꤝꤟꤥ ꤔꤟꤢꤧ꤬ ꤒꤟꤢꤧ꤬ꤓꤝꤥ꤭ꤕꤚꤟꤢꤧ꤬ ꤘꤣꤑꤢꤩ꤭ ꤘꤣ ꤢ꤬ꤘꤢꤨ꤬ꤊꤛꤢꤜꤣ ꤒꤣ꤬ꤒꤟꤥ ꤕꤢ꤬꤭꤯

ꤔꤟꤢꤧ꤬ ꤗꤟꤢꤩ꤬ꤕꤜꤢꤦꤓꤌꤣ꤭ ꤔꤟꤤꤡꤟꤛꤢ ꤊꤌꤣ꤭ ꤕꤚꤢꤧ VET VCE ꤗꤟꤢꤒꤥ꤬ꤚꤢꤪ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬꤯ ꤞꤛꤢꤖꤢꤨ ꤊꤢꤦ ꤔꤝꤥꤖꤛꤢꤩ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ VCE VET ꤒꤢ꤬ꤟꤢꤩ꤬ ꤔꤌꤣ꤬ ꤢ꤬ꤥ꤬ 27, ꤚꤢꤪ ꤞꤝꤥꤜꤤ꤬ꤟꤥ꤭ ꤢꤧꤊꤜꤢꤪ꤭ ꤘꤣ ꤠꤤ꤬ꤒꤥ꤭ꤚꤤ꤬ꤛꤢ꤬ꤊꤟꤢꤩ ꤒꤢ꤬ꤟꤢꤩ꤬ ꤔꤌꤣ꤬ꤗꤢ꤬ ꤢ꤬ ꤘꤛꤢꤩ ꤘꤢꤨ꤬ꤚꤟꤢꤩꤊꤜꤢꤪ꤭ VET ꤒꤟꤢꤧ꤬ꤒꤢ꤬ꤚꤤ꤬ ꤕꤚꤥ꤬ꤊꤚꤟꤢꤧ꤬ ꤒꤢ꤬ꤟꤢꤩ꤬ ꤕꤚꤢꤧ꤯

VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤔꤌꤣ꤬ ꤢ꤬ ꤢꤧꤡꤛꤣꤔꤟꤤꤡꤟꤛꤢ ꤔꤟꤢꤧ꤬ ꤙꤤꤒꤢꤩ꤭

VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤗꤢ꤬ ꤢ꤬ ꤘꤛꤢꤩ ꤊꤜꤛꤢꤊꤜꤥ꤭ ꤒꤣ꤬ꤙꤥ꤭ ꤘꤣ:

• ꤒꤟꤢꤧ꤬ꤤ꤬ꤞꤝꤥꤗꤟꤢꤩ꤬ꤡꤟꤛꤢꤒꤟꤢꤧ꤬ ꤒꤢ꤬ꤟꤢꤩ꤬
• ꤒꤟꤢꤧ꤬ꤤ꤬ꤞꤝꤥꤚꤟꤛꤢ꤬ꤒꤟꤢꤧ꤬ ꤒꤢ꤬ꤟꤢꤩ꤬
• ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤔꤢ ꤒꤟꤢꤧ꤬ꤞꤝꤥꤒꤥ꤬꤭ ꤏꤛꤢꤩ꤭ꤔꤥ꤬ꤏꤛꤢꤩꤋꤛꤢꤩ꤭
• ꤞꤝꤥꤜꤤ꤬ꤟꤥ꤭ꤒꤟꤥꤘꤢꤨ꤬ (ꤘꤤ꤭ꤒꤢꤦꤔꤢ ꤊꤜꤛꤢꤔꤟꤌꤣ꤭ꤊꤢꤨ꤬꤭ ꤘꤣ ꤢ꤬ꤚꤟꤌꤣ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤒꤢ꤬ꤟꤢꤩ꤬)
• ꤒꤟꤢꤧ꤬ꤘꤛꤢꤩꤒꤟꤢ꤭ ꤒꤟꤢꤧ꤬ꤗꤟꤢꤩ꤬꤯

ꤒꤟꤥ꤭ꤔꤟꤤ ꤔꤢ ꤔꤟꤢꤧ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤥ꤬ꤢꤧꤜꤢ꤭ ꤓꤌꤣ꤭ꤘꤢꤦ꤬ꤟꤢꤪ ꤚꤢꤪ ꤋꤥ꤭ꤑꤟꤢ ꤔꤟꤢꤧ꤬ ꤜꤟꤢꤦ꤬ꤕꤟꤢꤨ꤭ꤞꤢꤧꤑꤢꤩ꤭ ꤔꤟꤤꤡꤟꤛꤢ ꤢꤧ꤬ꤞꤤ꤭ ꤘꤣ VCE ꤢ꤬ꤜꤟꤢꤧ꤭ ꤘꤣ ꤢ꤬ꤞꤢꤧ꤬꤭ꤔꤌꤣ꤬ ꤕꤚꤢꤧ꤯

ꤔꤟꤤꤙꤢꤧ꤬ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬

ꤞꤛꤢꤖꤢꤨ ꤔꤟꤢꤧ꤬ ꤊꤢꤦ ꤔꤟꤤꤙꤢꤧ꤬ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤔꤌꤣ꤬, ꤔꤟꤢꤧ꤬ ꤒꤥ꤬꤭ꤙꤢꤧ꤬ ꤗꤟꤢꤩ꤬ꤕꤜꤢꤦꤗꤟꤢꤩ꤬ꤓꤌꤣ꤭ ꤜꤣꤙꤢ꤭ꤙꤢꤧꤓꤛꤢ꤬ ꤕꤢ꤬ꤒꤤ꤮ꤒꤢ꤬ꤘꤢꤦ꤬ ꤛꤢꤨ꤬ꤔꤤ 16꤯ ꤒꤟꤢꤧ꤬ꤛꤢꤩ꤭ꤒꤢ꤬ꤟꤢꤩ꤬ ꤗꤢ꤬ ꤢ꤬ꤥ꤬ꤕꤢ꤬ꤔꤟꤌꤣ꤭ꤔꤟꤤ ꤛꤢꤨ꤬ꤔꤤ ꤘꤣ:

• VCE VM ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬ ꤗꤟꤢꤒꤥ꤬ꤚꤢꤪ VCE ꤜꤤ꤬ꤊꤢꤨ꤬꤭ꤜꤢ꤭
• VCE VM ꤒꤟꤢꤧ꤬ꤘꤛꤢꤙꤢꤧ꤬ꤗꤢꤒꤥ꤭ ꤗꤟꤢꤒꤥ꤬ꤚꤢꤪ VCE ꤜꤤ꤬ꤡꤟꤛꤢꤗꤢꤒꤥ꤭
• VCE VM ꤒꤟꤢꤧ꤬ꤡꤟꤛꤢꤘꤢꤧ꤬ ꤘꤣ ꤢ꤬ ꤤ꤭ꤡꤢꤦ꤭ꤔꤢ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤒꤢ꤬ꤟꤢꤩ꤬
• VCE VM ꤒꤟꤢꤧ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤔꤟꤤꤘꤢꤦ꤬ꤒꤣ꤬ꤕꤚꤟꤢꤧ꤬ ꤒꤢ꤬ꤟꤢꤩ꤬
• VET ꤘꤣ ꤜꤤ꤬ꤙꤢ꤬ꤘꤛꤢꤩꤗꤢ II ꤢ꤬ꤒꤟꤥ ꤗꤟꤢꤒꤥ꤬ꤚꤢꤪ ꤜꤣꤊꤜꤢꤪ꤭ (180 ꤗꤢꤦ꤭ ꤋꤢ꤭ꤜꤟꤢꤩ)

ꤞꤝꤥꤜꤤ꤬ꤟꤥ꤭ꤖꤢꤨ ꤘꤣ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤔꤌꤣ꤬ ꤢꤧꤕꤚꤟꤢꤧ꤬ ꤗꤢ꤬ ꤢ꤬ ꤊꤢꤦ ꤙꤢꤩ꤬ꤔꤟꤌꤣ꤭ꤕꤟꤥꤊꤌꤣ꤭ ꤕꤚꤢꤧ VCE ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤘꤣ ꤢ꤬ꤚꤟꤌꤣ꤬ ꤒꤢ꤬ꤟꤢꤩ꤬ ꤘꤣ ꤢꤧ꤬ꤞꤤ꤭ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤢ꤬ꤊꤢꤨ꤭ ꤔꤌꤣ꤬ ꤕꤚꤢꤧ꤯

ꤔꤟꤢꤧ꤬ ꤕꤚꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤗꤟꤢꤒꤥ꤬ꤚꤢꤪ ꤕꤚꤟꤢꤧ꤬ꤘꤛꤢꤩꤡꤛꤢ꤬ꤘꤛꤢꤩꤑꤢ꤬ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤔꤌꤣ꤬ ꤢ꤬ ꤊꤢꤦ ꤒꤢ꤬ꤚꤤ꤬ꤒꤢ꤬ꤚꤛꤢ꤭ꤡꤝꤟꤥ ꤕꤢꤩ ꤔꤟꤢꤧ꤬ ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤕꤢ꤭꤯ ꤞꤝꤥꤜꤤ꤬ꤟꤥ꤭ꤖꤢꤨ ꤢꤧꤕꤚꤟꤢꤧ꤬ ꤗꤢ꤬ ꤢ꤬ ꤊꤟꤢꤦ ꤗꤟꤢꤩ꤬ꤕꤜꤢꤦꤗꤟꤢꤩ꤬ꤓꤌꤣ꤭ ꤢꤧ꤬ꤞꤤ꤭ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤔꤌꤣ꤬ 2 ꤔꤢ꤬ꤜꤣ ꤕꤚꤢꤧ ꤕꤢ꤬꤭꤯

ꤔꤟꤢꤧ꤬ ꤊꤢꤦ ꤔꤢꤪ꤭ꤢꤩ꤬ ꤒꤟꤢꤧ꤬ꤞꤢꤧꤋꤢꤨ꤬ꤞꤢꤧꤑꤢꤩ꤭ ꤔꤢ ꤒꤟꤢꤧ꤬ꤡꤟꤛꤢꤘꤢꤧ꤬ ꤒꤢ꤬ꤟꤢꤩ꤬ ꤘꤣ ꤒꤟꤢꤧ꤬ꤒꤢ꤬ꤚꤤ꤬ꤕꤜꤢꤪ ꤘꤣ ꤔꤢꤪ꤭ꤢꤩ꤬ꤔꤟꤤꤡꤟꤛꤢ ꤒꤢ꤬ꤟꤢꤩ꤬ ꤞꤛꤢꤔꤢ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ꤊꤜꤢꤧ꤭ ꤒꤢ꤬ꤟꤢꤩ꤬ ꤕꤚꤢꤧ ꤕꤢ꤭꤯ ꤔꤟꤢꤧ꤬ ꤊꤢꤦ ꤗꤟꤢꤩ꤬ ꤘꤢꤪ꤭ꤖꤢꤨꤏꤥ꤬ꤖꤢꤨ-ꤋꤢ꤭ꤏꤛꤢꤩꤋꤢ꤭ꤚꤟꤛꤢ꤬ ꤒꤟꤢꤧ꤬ꤊꤟꤢꤨꤊꤟꤢꤚꤟꤢꤨꤚꤟꤛꤢ꤬ ꤒꤢ꤬ꤟꤢꤩ꤬ ꤕꤢ꤭ ꤚꤢꤪ ꤒꤟꤢꤧ꤬ꤚꤟꤛꤢ꤬ ꤘꤣ ꤢ꤬ꤕꤢ꤬ꤒꤟꤣ ꤔꤢ ꤒꤟꤢꤧ꤬ꤗꤟꤢꤩ꤬ꤕꤜꤢꤪꤗꤟꤢꤩ꤬ꤡꤢꤦ꤭ ꤜꤢꤨ꤭ ꤒꤟꤢꤧ꤬ꤗꤟꤢꤩ꤬ ꤔꤢ ꤕꤜꤢꤪꤗꤟꤢꤨ꤬ꤖꤢꤨ ꤢ꤬ꤊꤢꤨ꤭ꤕꤢ꤬꤭꤯ ꤔꤟꤢꤧ꤬ ꤔꤟꤤꤙꤢꤧ꤬ꤡꤟꤛꤢꤊꤌꤣ꤭ ꤕꤚꤢꤧ ꤊꤚꤤꤘꤤꤗꤢ ꤘꤣ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤗꤟꤢꤩ꤬-ꤊꤢꤨ꤭ ꤕꤚꤢꤧ꤯

ꤔꤟꤢꤧ꤬ ꤕꤚꤟꤢꤧ꤬ꤤ꤬ꤞꤛꤥꤤ꤬ꤞꤛꤢ꤬ ꤒꤢ꤬ꤟꤢꤩ꤬ꤔꤌꤣ꤬ ꤢ꤬ ꤊꤢꤦ ꤗꤛꤢꤒꤟꤢ꤭ꤗꤛꤢꤒꤟꤢꤩ꤬ ꤕꤢꤩ ꤔꤟꤢꤧ꤬ ꤒꤟꤢꤧ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤘꤤ꤭ꤒꤢꤦꤔꤢ ꤒꤟꤢꤧ꤬ꤊꤟꤢꤨꤊꤟꤢꤚꤟꤢꤨꤚꤟꤛꤢ꤬ ꤘꤣ ꤢ꤬ꤗꤛꤢꤩ꤭ꤗꤛꤢꤩ꤭ꤢ꤬ꤡꤣ꤬ꤡꤣ꤬ ꤒꤢ꤬ꤟꤢꤩ꤬ ꤕꤢ꤬꤭꤯ ꤔꤟꤢꤧ꤬ ꤔꤟꤤꤙꤢꤧ꤬ꤡꤟꤛꤢ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤢ꤬ꤗꤢ ꤘꤣ ꤜꤤ꤬ꤙꤢ꤬ꤤ꤬ꤞꤝꤥ ꤘꤣ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤒꤢ꤬ꤟꤢꤩ꤬ ꤢ꤬ꤥ꤬ ꤒꤥ꤬, ꤢ꤬ꤍꤟꤥꤜꤢ꤬ꤏꤢ ꤚꤢꤪ ꤜꤤ꤬ꤙꤢ꤬ꤤ꤬ꤞꤝꤥ ꤛꤢꤩ꤭ꤒꤢ꤬ꤟꤢꤩ꤬ ꤗꤢ꤬ ꤢꤨ꤭ ꤙꤢꤩ꤬ꤔꤟꤌꤣ꤭ꤔꤟꤤ ꤊꤟꤛꤢ ꤘꤣ ATAR ꤔꤌꤣ꤬ ꤒꤥ꤬ ꤕꤚꤢꤧ꤯ ꤖꤢꤨꤛꤢꤩ꤭ꤕꤚꤢꤧ ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ ꤒꤟꤢꤧ꤬ꤏꤢꤨ꤬ꤘꤛꤢ꤭ꤗꤛꤢ ꤒꤢ꤬ꤟꤢꤩ꤬ ꤗꤟꤢꤒꤥ꤬ꤚꤢꤪ ꤒꤟꤢꤧ꤬ꤗꤛꤢꤒꤟꤢ꤭ꤗꤛꤢꤒꤟꤢꤩ꤬ ꤘꤣ ꤢ꤬ꤊꤜꤢꤪ꤭ ꤒꤢ꤬ꤟꤢꤩ꤬ ꤥ꤬ ꤒꤥ꤬, ꤢ꤬ꤥ꤬ ꤕꤚꤢꤧ ꤒꤢꤦ꤮ ꤒꤟꤢꤧ꤬ꤓꤢꤦꤡꤟꤢꤩ꤬ꤗꤛꤢ ꤒꤟꤢꤧ꤬ꤗꤟꤢꤩ꤬ꤙꤢꤧ ꤘꤣ ꤢ꤬ꤡꤣ꤬ꤡꤣ꤬ ꤔꤢ ꤔꤟꤤꤙꤢꤧ꤬ ꤢ꤬ꤗꤢ ꤒꤢ꤬ꤟꤢꤩ꤬ ꤘꤣ VCE VET ꤒꤟꤢꤧ꤬ꤒꤢ꤬ꤚꤤ꤬ ꤕꤚꤥ꤬ꤊꤚꤟꤢꤧ꤬ ꤢ꤬ꤊꤢꤨ꤭ ꤔꤌꤣ꤬ ꤕꤚꤢꤧ꤯

ꤙꤤ ꤔꤟꤢꤧ꤬ ꤗꤟꤢꤩ꤬ꤕꤜꤢꤦꤓꤌꤣ꤭ꤟꤢꤪ ꤔꤟꤢꤧ꤬ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤢ꤬ꤋꤢꤧ꤭ꤔꤌꤣ꤬, ꤔꤟꤢꤧ꤬ ꤊꤢꤦ ꤔꤟꤤꤙꤢꤧ꤬ ꤠꤤ꤬ꤒꤥ꤭ꤚꤤ꤬ꤛꤢ꤬ ꤜꤤ꤬ꤙꤢ꤬ꤘꤛꤢꤩꤗꤢ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤔꤢ ꤍꤟꤥꤏꤢꤨ꤬ꤜꤣꤕꤟꤥ ‘ꤒꤟꤢꤧ꤬꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬’ ꤕꤢ꤬꤭꤯

VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤊꤜꤛꤢꤊꤜꤥ꤭- ꤊꤢ꤬ꤗꤢ꤬ꤜꤢ꤬ ꤢ꤬ꤒꤟꤢꤧ꤬ꤡꤛꤣꤊꤜꤛꤢ

ꤊꤢ꤬ꤗꤢ꤬ꤜꤢ꤬ ꤔꤌꤣ꤬ ꤢ꤬ ꤞꤢꤧꤐꤟꤢꤦ ꤤ꤬ꤞꤝꤥꤤ꤬ꤞꤛꤢ꤬ ꤘꤣ ꤒꤟꤢꤧ꤬ꤗꤟꤢꤩ꤬ꤊꤢꤨ꤭ ꤚꤢꤪ ꤢ꤬ ꤞꤢꤧꤐꤟꤢꤦ ꤓꤝꤥ꤭ ꤕꤚꤢꤧ꤬ꤗꤟꤢꤩ꤬ꤓꤢꤩꤊꤚꤢꤩ꤭ ꤒꤣ꤬ꤕꤚꤟꤢꤧ꤬, ꤖꤢꤨꤔꤌꤣ꤬ꤚꤢꤪ ꤢ꤬ ꤡꤛꤣ ꤏꤢꤨ꤬ꤔꤟꤌꤣ꤭ ꤒꤟꤢꤧ꤬ꤚꤢ꤭ ꤘꤣ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ (VCE VM) ꤔꤌꤣ꤬ ꤕꤚꤢꤧ꤯ ꤢ꤬ ꤊꤢꤦ ꤗꤟꤢꤩ꤬ VCE VM ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤒꤢ꤬ꤟꤢꤩ꤬ ꤔꤢ VCE VET ꤜꤤ꤬ꤙꤢ꤬ꤘꤛꤢꤩꤗꤢ II ꤘꤣ ꤒꤟꤢꤧ꤬ꤙꤛꤢꤓꤛꤢ꤬ꤏꤢꤪꤓꤛꤢ꤬ ꤕꤚꤢꤧ ꤕꤢ꤭꤯ ꤊꤢ꤬ꤗꤢ꤬ꤜꤢ꤬ ꤔꤌꤣ꤬ ꤢ꤬ ꤊꤢꤦ ꤗꤟꤢꤩ꤬ꤕꤜꤢꤦꤗꤟꤢꤩ꤬ꤓꤌꤣ꤭ꤔꤟꤤ ꤞꤝꤥꤜꤤ꤬ꤟꤥ꤭ ꤑꤟꤢꤩ꤭ꤒꤟꤥꤒꤣ꤬ꤒꤟꤥ ꤔꤢ ꤠꤤ꤬ꤒꤥ꤬꤭ꤚꤤ꤬ꤛꤢ꤬ ꤜꤤ꤬ꤙꤢ꤬ꤘꤛꤢꤩꤗꤢ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ- ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤕꤚꤢꤧ ꤕꤢ꤬꤭꤯ ꤢ꤬ ꤟꤢꤩꤏꤥ꤬ꤘꤣ꤬ꤑꤢ꤭ ꤜꤟꤢꤪ꤭ꤟꤢꤪ ꤒꤟꤢꤧ꤬ꤛꤢꤩ꤭ ꤔꤢ ꤢ꤬ꤟꤤ꤬ꤖꤢꤨꤖꤛꤢ꤭ꤖꤢꤨ, ꤕꤚꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤔꤢ ꤕꤚꤟꤢꤧ꤬ꤘꤛꤢꤩꤡꤛꤢ꤬ꤘꤛꤢꤩꤑꤢ꤬ ꤞꤝꤥꤜꤤ꤬ꤟꤥ꤭ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤟꤢꤪ꤯

ꤛꤢꤩ꤭ ꤒꤛꤢ꤬ꤟꤤꤒꤥ꤬ ꤔꤌꤣ꤬, ꤊꤢ꤬ꤗꤢ꤬ꤜꤢ꤬ ꤔꤌꤣ꤬ ꤢ꤬ ꤔꤢꤪ꤭ꤢꤩ꤬ ꤢ꤬ꤏꤛꤣꤢ꤬ꤋꤢꤧ꤭ ꤘꤣ ꤢ꤬ꤖꤛꤢꤩ꤭ꤢ꤬ꤖꤟꤌꤣ꤭ ꤒꤢ꤬ꤟꤢꤩ꤬ ꤢ꤬ꤒꤢ꤬ꤚꤢꤧꤒꤢ꤬ꤕꤟꤥ꤬ꤊꤢꤨ꤭ ꤚꤢꤪ ꤢ꤬ ꤤ꤬ꤏꤢꤪꤓꤛꤢ꤬ꤡꤝꤟꤥ ꤢꤧ꤬ꤞꤤ꤭ ꤟꤤ꤬ꤜꤟꤢꤩꤞꤢꤦ꤬ꤖꤢꤨ ꤒꤢ꤬ꤟꤢꤩ꤬ ꤕꤚꤢꤧ꤯ ꤢ꤬ꤔꤢ꤬ 10 ꤢ꤬ꤊꤢꤨ꤭ꤔꤌꤣ꤬, ꤊꤢ꤬ꤗꤢ꤬ꤜꤢ꤬ ꤥ꤬ꤕꤢ꤬ꤔꤟꤌꤣ꤭ꤔꤟꤤ ꤘꤣ TAFE ꤒꤣ꤬ꤑꤢꤩ꤭ ꤢ꤬ꤊꤢꤨ꤭ ꤚꤢꤪ ꤢ꤬ ꤗꤛꤢꤓꤛꤢꤩ꤬ꤞꤢꤧꤑꤢꤩ꤭ꤏꤤꤒꤣ꤬ꤙꤢꤧ꤬ ꤔꤢ VET ꤒꤟꤢꤧ꤬ꤙꤛꤢꤓꤛꤢ꤬ꤏꤢꤪꤓꤛꤢ꤬ ꤕꤚꤢꤧ꤯ ꤓꤌꤣ꤭ꤚꤢꤪ ꤢ꤬ ꤓꤢꤩ꤬ꤡꤛꤣꤕꤟꤢꤨ꤭ꤞꤢꤧꤑꤢꤩ꤭ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤣ ꤕꤚꤟꤢꤧ꤬ꤗꤟꤢꤩ꤬ꤓꤢꤩ꤬ ꤜꤟꤥꤜꤟꤤ꤬ ꤘꤣ ꤘꤢꤪ꤭ꤏꤥ꤬ꤊꤜꤢꤧ꤭ ꤚꤢꤪ ꤢ꤬ ꤏꤢꤨ꤬ꤘꤛꤢ꤭ꤗꤛꤢ ꤒꤢ꤬ꤚꤛꤢ꤮ꤗꤢ꤬ ꤢ꤬ ꤗꤟꤢꤩ꤬ꤔꤟꤤ ꤏꤢꤜꤟꤢꤩ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤘꤣ ꤢ꤬ꤒꤢ꤬ꤚꤤ꤬ꤤ꤬ꤏꤢꤪꤓꤛꤢ꤬ ꤘꤣ ꤊꤥ꤬ꤕꤢ꤬ꤔꤤ꤬ ꤊꤢꤨ꤭ꤛꤢꤩ꤭ ꤙꤤ ꤢ꤬ꤥ꤬ꤕꤢ꤬꤭ 11ꤔꤢ꤬ ꤢ꤬ꤋꤢꤧ꤭ꤔꤌꤣ꤬ ꤕꤚꤢꤧ꤯ ꤛꤢꤩ꤭ ꤢ꤬ꤍꤟꤥꤜꤢ꤬ꤏꤢ ꤗꤢ꤬ ꤢ꤬ ꤡꤢ꤬ꤢꤩ꤬ ꤞꤝꤥꤜꤤ꤬ꤟꤥ꤭ ꤢ꤬ꤏꤛꤣꤢ꤬ꤋꤢꤧ꤭ ꤒꤢ꤬ꤟꤢꤩ꤬ ꤙꤤ ꤕꤚꤟꤢꤧ꤬ꤗꤟꤢꤩ꤬ꤓꤢꤩ꤬ ꤜꤟꤥꤜꤟꤤ꤬ ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤘꤣ ꤒꤟꤢꤧ꤬ꤗꤟꤢꤩ꤬ꤊꤢꤨ꤭ ꤔꤌꤣ꤬ ꤕꤚꤢꤧ ꤕꤢ꤬꤭꤯ ꤢ꤬ ꤊꤢꤦ ꤔꤟꤤꤙꤢꤧ꤬ ꤊꤚꤤꤘꤤꤗꤢ ꤘꤣ ꤢ꤬ꤏꤛꤣꤢ꤬ꤋꤢꤧ꤭ ꤘꤣ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤊꤢꤨ꤭ꤛꤢꤩ꤭ ꤕꤚꤢꤧ ꤕꤢ꤭꤯ ꤙꤤ ꤢ꤬ ꤗꤟꤢꤩ꤬ꤕꤜꤢꤦꤗꤟꤢꤩ꤬ꤓꤌꤣ꤭ꤊꤛꤢ꤭ 12 ꤔꤢ꤬ ꤢ꤬ꤋꤢꤧ꤭ꤔꤌꤣ꤬, ꤊꤢ꤬ꤗꤢ꤬ꤜꤢ꤬ ꤛꤢꤩ꤭ ꤢ꤬ ꤗꤛꤢꤏꤢꤦ꤭ ꤔꤟꤤꤙꤢꤧ꤬ ꤒꤟꤢꤧ꤬ꤤ꤬ꤞꤝꤥꤗꤟꤢꤩ꤬ꤡꤟꤛꤢꤒꤟꤢꤧ꤬ ꤔꤢ ꤊꤥ꤬ꤕꤢ꤬ꤔꤤ꤬ ꤛꤢꤩ꤭ꤒꤣ꤬ꤡꤣ꤬ ꤕꤚꤢꤧ꤯

ꤊꤢ꤬ꤗꤢ꤬ꤜꤢ꤬ ꤒꤟꤢꤧ꤬꤬ꤕꤟꤢꤨ꤭ꤞꤢꤧꤑꤢꤩ꤭ 11 ꤔꤢ꤬ ꤒꤢ꤬ꤟꤢꤩ꤬

• VCE VM ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬ ꤛꤢꤨ꤬ꤔꤤ 1 ꤔꤢ 2
• VCE ꤒꤟꤢꤧ꤬ꤘꤛꤢꤙꤢꤧ꤬ꤞꤢꤧꤑꤢꤩ꤭ꤗꤢꤒꤥ꤭ ꤘꤣ ꤢ꤬ꤡꤣ꤬ꤡꤣ꤬ ꤛꤢꤨ꤬ꤔꤤ 1 ꤔꤢ 2
• VCE VM ꤒꤟꤢꤧ꤬ꤡꤟꤛꤢꤘꤢꤧ꤬ ꤘꤣ ꤢ꤬ꤒꤥ꤬꤭ꤢ꤬ꤚꤟꤢꤧ꤭ꤔꤢ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 1 ꤔꤢ 2
• VCE VET ꤜꤤ꤬ꤙꤢ꤬ꤘꤛꤢꤩꤗꤢ II ꤘꤣ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤒꤟꤢꤧ꤬ꤙꤛꤢꤓꤛꤢ꤬ꤏꤢꤪꤓꤛꤢ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 1 ꤔꤢ 2
• VET ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤘꤣ ꤢ꤬ꤒꤢ꤬ꤚꤤ꤬ꤓꤛꤢ꤬ꤗꤢ꤬ꤊꤜꤟꤢꤪ꤬ ꤛꤢꤨ꤬ꤔꤤ 1 (90ꤗꤢꤦ꤭)

ꤊꤢ꤬ꤗꤢ꤬ꤜꤢ꤬ ꤒꤟꤢꤧ꤬꤬ꤕꤟꤢꤨ꤭ꤞꤢꤧꤑꤢꤩ꤭ 12 ꤔꤢ꤬ ꤒꤢ꤬ꤟꤢꤩ꤬

• VCE VM ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬ ꤛꤢꤨ꤬ꤔꤤ 3 ꤔꤢ 4
• VCE ꤒꤟꤢꤧ꤬ꤘꤛꤢꤙꤢꤧ꤬ꤞꤢꤧꤑꤢꤩ꤭ꤗꤢꤒꤥ꤭ ꤘꤣ ꤢ꤬ꤡꤣ꤬ꤡꤣ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 3 ꤔꤢ 4
• VCE VM VPC ꤒꤟꤢꤧ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤔꤟꤤꤘꤢꤦ꤬ꤒꤣ꤬ꤕꤚꤟꤢꤧ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 3 ꤔꤢ 4
• VCE VM ꤒꤟꤢꤧ꤬ꤡꤟꤛꤢꤘꤢꤧ꤬ ꤘꤣ ꤢ꤬ꤒꤥ꤬꤭ꤢ꤬ꤚꤟꤢꤧ꤭ꤔꤢ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 3 ꤔꤢ 4
• VCE VET ꤜꤤ꤬ꤙꤢ꤬ꤘꤛꤢꤩꤗꤢ II ꤘꤣ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤒꤟꤢꤧ꤬ꤙꤛꤢꤓꤛꤢ꤬ꤏꤢꤪꤓꤛꤢ꤬ ꤒꤢ꤬ꤟꤢꤩ꤬ ꤛꤢꤨ꤬ꤔꤤ 3 ꤔꤢ 4
• VET ꤒꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤘꤣ ꤢ꤬ꤒꤢ꤬ꤚꤤ꤬ꤓꤛꤢ꤬ꤗꤢ꤬ꤊꤜꤟꤢꤪ꤬ ꤛꤢꤨ꤬ꤔꤤ 2 (90 ꤗꤢꤦ꤭)

VCE ꤔꤌꤣ꤬ ꤢ꤬ ꤢꤧꤡꤛꤣꤔꤟꤤꤡꤟꤛꤢ ꤔꤟꤢꤧ꤬ ꤙꤤꤒꤢꤩ꤭

VCE ꤔꤌꤣ꤬ ꤢ꤬ ꤘꤛꤢꤩ ꤡꤢꤪꤡꤢꤦ ꤊꤜꤛꤢꤊꤜꤥ꤭ ꤘꤣ ꤞꤝꤥꤜꤤ꤬ꤟꤥ꤭ꤒꤟꤥꤘꤢꤨ꤬ ꤚꤢꤪ ꤢ꤬ ꤘꤛꤢꤩꤡꤟꤛꤢ ꤔꤟꤢꤧ꤬ ꤔꤢ ATAR ꤒꤣ꤬ꤡꤣ꤬꤯

ꤖꤛꤢꤩꤔꤟꤤ VCE

ꤞꤛꤢꤖꤢꤨ ꤔꤟꤢꤧ꤬ ꤊꤢꤦ ꤔꤟꤤꤙꤢꤧ꤬ VCE ꤔꤌꤣ꤬, ꤔꤟꤢꤧ꤬ ꤒꤥ꤬꤭ꤙꤢꤧ꤬ ꤗꤟꤢꤩ꤬ꤕꤜꤢꤦꤗꤟꤢꤩ꤬ꤓꤌꤣ꤭ ꤜꤣꤙꤢ꤭ꤙꤢꤧꤓꤛꤢ꤬ ꤕꤢ꤬ꤒꤤ꤮ꤒꤢ꤬ꤘꤢꤦ ꤛꤢꤨ꤭ꤔꤤ 16, ꤥ꤬ꤕꤢ꤬ꤒꤟꤣꤊꤌꤣ꤭:

• 3 ꤛꤢꤨ꤭ꤔꤤ ꤘꤣ ꤜꤤ꤬ꤊꤢꤨ꤭ꤜꤢ꤭ ꤢ꤬ꤗꤟꤢꤨ꤬, ꤥ꤬ꤕꤢ꤬ꤒꤟꤣꤊꤌꤣ꤭ ꤛꤢꤨ꤬ꤔꤤ 3 ꤔꤢ 4 ꤏꤤ꤭ꤡꤢꤦ꤭
• ꤕꤢ꤬ꤒꤤ꤮ꤒꤢ꤬ꤘꤢꤦ꤬ 3 ꤛꤢꤨ꤭ꤔꤤ ꤘꤣ ꤢ꤬ꤚꤟꤌꤣ꤬ ꤏꤤ꤭ꤡꤢꤦ꤭ꤔꤢ ꤛꤢꤨ꤬ꤔꤤ 3 ꤔꤢ 4 ꤒꤟꤢꤧ꤬ꤕꤟꤢꤨ꤬ꤞꤢꤧꤑꤢꤩ꤭ ꤒꤢ꤬ꤟꤢꤩ꤬꤯

ꤘꤣ 11 ꤔꤢ꤬ ꤔꤢ 12 ꤔꤢ꤬ ꤢ꤬ꤊꤢꤨ꤭ꤔꤌꤣ꤬, ꤞꤝꤥꤜꤤ꤬ꤟꤥ꤭ꤖꤢꤨ ꤢꤧꤕꤚꤟꤢꤧ꤬ ꤗꤢ꤬ ꤢ꤬ ꤕꤟꤢꤨ꤭ꤞꤢꤧꤑꤢꤩ꤭ ꤛꤢꤨ꤬ꤔꤤ 20 ꤔꤢ 24 ꤒꤢ꤬ꤟꤢꤩ꤬ ꤢ꤬ꤕꤜꤢꤧ꤬ꤊꤢꤨ꤭, ꤚꤢꤪ ꤢꤧꤒꤢ꤬ꤊꤤ꤬ ꤗꤢ꤬ 11 ꤔꤢ꤬ ꤢ꤬ꤊꤢꤨ꤭ꤔꤌꤣ꤬ ꤢ꤬ ꤤ꤬ꤞꤝꤥ ꤜꤢ꤬ꤟꤛꤢ꤭ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤬ ꤢ꤬ꤡꤣ꤬ 6, ꤚꤢꤪ 12 ꤔꤢ꤬ ꤢ꤬ꤊꤢꤨ꤭ꤔꤌꤣ꤬ ꤢ꤬ꤒꤟꤢ꤬꤭ꤊꤢ꤬ꤜꤟꤛꤢ꤬ꤊꤛꤢ꤬ ꤘꤣ 5 ꤡꤣ꤬ ꤖꤢꤨꤔꤌꤣ꤬ ꤕꤚꤢꤧ꤯

ꤊꤤ꤬ ꤔꤟꤢꤧ꤬ ꤏꤢꤨ꤬ꤔꤟꤌꤣ꤭ ꤒꤟꤢꤧ꤬ꤚꤢ꤭ ꤘꤣ VCE ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤘꤢꤨ꤬ ꤔꤌꤣ꤬ ꤟꤢꤩꤚꤢꤪ ꤔꤟꤢꤧ꤬ ꤖꤛꤢꤩꤔꤟꤤꤡꤟꤛꤢ ꤒꤢꤦꤕꤚꤢꤧ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤒꤟꤢꤧ꤬ꤟꤣꤚꤢ꤭ꤜꤤ꤬ꤜꤢꤧ꤬ ꤘꤣ ꤢ꤬ꤞꤢꤧ꤭ ꤒꤢ꤬ꤟꤢꤩ꤬, ꤒꤟꤢꤧ꤬ꤘꤛꤢꤙꤢꤧ꤬ꤞꤢꤧꤑꤢꤩ꤭ꤗꤢꤒꤥ꤭, ꤒꤟꤢꤧ꤬ꤡꤟꤛꤢꤘꤢꤧ꤬ ꤘꤣ ꤢ꤬ꤒꤥ꤬꤭ꤢ꤬ꤚꤟꤢꤧ꤭ꤔꤢ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤒꤢ꤬ꤟꤢꤩ꤬ ꤔꤢ ꤒꤟꤢꤧ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤒꤟꤢꤧ꤬ꤡꤟꤛꤢꤘꤢꤧ꤬ ꤔꤟꤤꤘꤢꤦ꤬ꤒꤣ꤬ꤕꤚꤟꤢꤧ꤬ ꤒꤢ꤬ꤟꤢꤩ꤬ ꤕꤚꤢꤧ꤯

ꤟꤢꤩꤙꤢꤧ꤬ꤔꤢ ꤔꤟꤢꤧ꤬ ꤕꤚꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤗꤟꤢꤒꤥ꤬ꤚꤢꤪ ꤕꤚꤟꤢꤧ꤬ꤘꤛꤢꤩꤡꤛꤢ꤬ꤘꤛꤢꤩꤑꤢ꤬ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤢ꤬ꤚꤤ꤬ꤢ꤬ꤊꤛꤢ꤭ ꤞꤛꤢꤖꤢꤨ ꤊꤢꤦ ꤗꤟꤢꤩ꤬ꤓꤛꤢ꤬ ꤔꤟꤢꤧ꤬ VCE ꤕꤚꤥ꤬ꤊꤚꤟꤢꤧ꤬ ꤒꤟꤢꤧ꤬ꤒꤢ꤬ꤚꤤ꤬ ꤘꤣ ꤢ꤬ꤒꤥ꤭ꤢ꤬ꤚꤟꤢꤧ꤬꤭ ꤚꤛꤢꤜꤣꤔꤢ ꤔꤟꤢꤧ꤬ ꤖꤢꤨꤒꤢꤩ꤭ꤔꤌꤣ꤬ ꤔꤤ꤯

VCE ꤊꤜꤛꤢꤊꤜꤥ꤭ - ꤘꤢꤧꤏꤛꤤ꤬ ꤢ꤬ꤒꤟꤢꤧ꤬ꤡꤛꤣꤊꤟꤛꤢ

ꤘꤢꤧꤏꤛꤤ꤬ ꤔꤌꤣ꤬ ꤢ꤬ ꤞꤢꤧꤐꤟꤢꤦꤓꤝꤥ꤭ ꤕꤚꤟꤢꤧ꤬ꤡꤤ꤬ꤚꤛꤢ꤬ꤒꤟꤢꤧ꤬ ꤒꤣ꤬ꤕꤚꤟꤢꤧ꤬ ꤖꤢꤨꤔꤌꤣ꤬ꤚꤢꤪ ꤢ꤬ ꤡꤛꤣꤏꤢꤨ꤬ꤔꤟꤌꤣ꤭ ꤒꤟꤢꤧ꤬ꤚꤢ꤭ ꤘꤣ VCE ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤒꤢ꤬ꤟꤢꤩ꤬ ꤢ꤬ꤊꤢꤨ꤭ ꤞꤛꤢꤔꤢ ꤜꤤ꤬ꤊꤢꤨ꤭ꤜꤢ꤭, ꤜꤤ꤬ꤡꤟꤛꤢꤗꤢꤒꤥ꤭, ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤒꤟꤢꤧ꤬ꤞꤝꤥꤒꤟꤢꤧ꤬ꤞꤛꤢ꤬, ꤔꤟꤢꤩꤊꤜꤟꤢꤪ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ, ꤒꤟꤢꤧ꤬ꤘꤛꤢꤊꤛꤢ꤭ ꤔꤢ VCE VET ꤒꤟꤢꤧ꤬ꤗꤟꤢꤩ꤬ꤊꤟꤌꤣꤗꤟꤢꤩ꤬ꤋꤢ ꤕꤚꤢꤧ꤯ ꤢ꤬ ꤊꤢꤦ ꤗꤟꤢꤩ꤬ꤕꤜꤢꤦꤗꤟꤢꤩ꤬ꤓꤌꤣ꤭ꤊꤛꤢ꤭ ꤞꤝꤥꤜꤤ꤬ꤟꤥ꤭ ꤑꤟꤢꤩ꤭ꤒꤟꤥꤒꤣ꤬ꤒꤟꤥ ꤔꤢ ꤢ꤬ VCE ꤕꤢ꤭꤯

ꤘꤢꤧꤏꤛꤤ꤬ ꤔꤌꤣ꤬ ꤢ꤬ ꤔꤝꤥꤖꤛꤢꤩ ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ ꤘꤣ ꤢ꤬ꤒꤥ꤭ꤢ꤬ꤚꤟꤢꤧ꤭ꤔꤢ ꤢ꤬ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤏꤛꤢꤩꤔꤥ꤬ꤏꤛꤢꤩꤋꤛꤢꤩ꤭ꤕꤢ꤭ ꤒꤢ꤬ꤟꤢꤩ꤬ ꤞꤛꤢꤊꤌꤣ꤭ꤕꤟꤥꤔꤢ ꤒꤟꤢꤧ꤬ ꤘꤣ ꤢ꤬ꤒꤥ꤭ꤞꤢꤧꤕꤜꤢꤪ꤭ ꤗꤟꤢ ꤜꤢ꤬ꤊꤥ꤭ ꤜꤢꤨ꤭ ꤔꤌꤣ꤬ ꤒꤢ꤬ꤟꤢꤩ꤬ ꤟꤢꤪ꤯ ꤢ꤬ ꤟꤢꤩꤙꤢꤧ꤬ꤘꤣ꤬ꤑꤢ꤭ꤔꤟꤤ ꤢ꤬ꤒꤟꤢꤧ꤬ꤔꤝꤥꤖꤛꤢꤩ ꤒꤢ꤬ꤟꤢꤩ꤬ ꤔꤢ ꤢ꤬ꤕꤚꤟꤢꤧ꤬ꤤ꤬ꤞꤝꤥꤤ꤬ꤞꤛꤢ꤬ ꤔꤢ ꤢ꤬ꤕꤚꤟꤢꤧ꤬ꤘꤛꤢꤩꤡꤛꤢ꤬ꤘꤛꤢꤩꤑꤢ꤬ ꤞꤝꤥꤜꤤ꤬ꤟꤥ꤭ ꤒꤟꤢꤧ꤬ꤢꤩ꤬ꤏꤢꤧ꤬ꤚꤟꤛꤢ꤬ꤒꤟꤢꤧ꤬ ꤞꤛꤢꤖꤢꤨ ꤢ꤬ ꤊꤢꤦ ꤒꤥ꤭ꤙꤢꤧ꤬ꤔꤢ ꤞꤝꤥꤜꤤ꤬ꤜꤥ꤭ꤒꤟꤥꤘꤢꤨ꤬ ꤢ꤬ꤒꤟꤢꤧ꤬ꤜꤥ꤬ꤙꤢꤧ꤬ ꤘꤣ ꤢ꤬ꤜꤟꤢꤩ ꤕꤟꤢꤨ꤭ꤤ꤬ꤞꤝꤥꤞꤢꤧꤑꤢꤩ꤭ ꤒꤟꤢꤧ꤬ꤞꤝꤥꤒꤟꤢꤧ꤬ꤞꤛꤢ꤬ ꤒꤢ꤬ꤟꤢꤩ꤬ ꤔꤌꤣ꤬ ꤕꤚꤢꤧ꤯

ꤘꤢꤧꤏꤛꤤ꤬ ꤢ꤬ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ 10 ꤔꤢ꤬ ꤒꤢ꤬ꤟꤢꤩ꤬

• VCE ꤔꤟꤢꤩꤊꤜꤟꤢꤪ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤛꤢꤨ꤬ꤔꤤ 1 ꤔꤢ 2

ꤘꤢꤧꤏꤛꤤ꤬ ꤢ꤬ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ 11 ꤔꤢ꤬ ꤒꤢ꤬ꤟꤢꤩ꤬

• VCE ꤊꤢꤨ꤭ꤜꤢ꤭ ꤛꤢꤨ꤬ꤔꤤ 1 ꤔꤢ 2
• VCE ꤒꤟꤢꤧ꤬ꤘꤛꤢꤙꤢꤧ꤬ꤞꤢꤧꤑꤢꤩ꤭ꤗꤢꤒꤥ꤭ ꤊꤜꤛꤢꤊꤜꤥ꤭ ꤛꤢꤨ꤬ꤔꤤ 1 ꤔꤢ 2
• VCE ꤒꤟꤢꤧ꤬ꤕꤟꤢꤨ꤬꤭ꤞꤢꤧꤑꤢꤩ꤭ ꤒꤟꤢꤧ꤬ꤞꤝꤥꤒꤟꤢꤧ꤬ꤞꤛꤢ꤬ ꤛꤢꤨ꤬ꤔꤤ 1 ꤔꤢ 2
• VCE ꤒꤟꤢꤧ꤬ꤘꤛꤢꤊꤛꤢ꤭ ꤓꤢꤦ꤭ꤋꤢꤧ꤭ꤋꤥ꤭ꤑꤟꤢ ꤛꤢꤨ꤬ꤔꤤ 1 ꤔꤢ 2
• VCE ꤔꤟꤢꤩꤊꤜꤟꤢꤪ ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤛꤢꤨ꤬ꤔꤤ 3 ꤔꤢ 4
• VCE VET ꤜꤤ꤬ꤙꤢ꤬ꤘꤛꤢꤩꤗꤢ III ꤘꤣ ꤒꤟꤢꤧ꤬ꤗꤟꤢꤩ꤬ꤊꤟꤌꤣꤗꤟꤢꤩ꤬ꤋꤢ ꤛꤢꤨ꤬ꤔꤤ 1 ꤔꤢ 2

ꤘꤢꤧꤏꤛꤤ꤬ ꤢ꤬ꤒꤟꤢꤧ꤬ꤕꤟꤢꤨ꤭ꤞꤢꤧꤑꤢꤩ꤭ 12 ꤔꤢ꤬ ꤒꤢ꤬ꤟꤢꤩ꤬

• VCE ꤊꤢꤨ꤭ꤜꤢ꤭ ꤛꤢꤨ꤬ꤔꤤ 3 ꤔꤢ 4
• VCE ꤒꤟꤢꤧ꤬ꤘꤛꤢꤙꤢꤧ꤬ꤞꤢꤧꤑꤢꤩ꤭ꤗꤢꤒꤥ꤭ ꤊꤜꤛꤢꤊꤜꤥ꤭ ꤛꤢꤨ꤬ꤔꤤ 3 ꤔꤢ 4
• VCE ꤒꤟꤢꤧ꤬ꤑꤟꤢ꤭ꤊꤢ꤬ꤓꤢꤪ꤬ꤏꤢꤏꤢꤦ꤬ ꤒꤟꤢꤧ꤬ꤘꤛꤢꤊꤛꤢ꤭ ꤛꤢꤨ꤬ꤔꤤ 3 ꤔꤢ 4
• VCE ꤒꤟꤢꤧ꤬ꤕꤟꤢꤨ꤬꤭ꤞꤢꤧꤑꤢꤩ꤭ ꤒꤟꤢꤧ꤬ꤞꤝꤥꤒꤟꤢꤧ꤬ꤞꤛꤢ꤬ ꤛꤢꤨ꤬ꤔꤤ 3 ꤔꤢ 4
• VCE VET ꤜꤤ꤬ꤙꤢ꤬ꤘꤛꤢꤩꤗꤢ III ꤘꤣ ꤒꤟꤢꤧ꤬ꤗꤟꤢꤩ꤬ꤊꤟꤌꤣꤗꤟꤢꤩ꤬ꤋꤢ ꤛꤢꤨ꤬ꤔꤤ 3 ꤔꤢ 4

ꤞꤢꤧꤐꤟꤢꤦꤞꤢꤧꤑꤢꤩ꤭ ꤊꤜꤢꤪ꤭ꤕꤟꤥ ꤒꤟꤢꤧ꤬ꤚꤤ꤬ꤒꤟꤢꤧ꤬ꤊꤛꤢ꤭

VCE ꤒꤟꤢꤧ꤬ꤓꤝꤥ꤭ꤓꤛꤢ꤬ ꤒꤢ꤬ꤟꤢꤩ꤬ ꤔꤢ ATAR 

ꤒꤟꤢꤧ꤬ꤓꤢꤦꤡꤟꤢꤩ꤬ꤗꤛꤢ ꤒꤟꤢꤧ꤬ꤗꤟꤢꤩ꤬ꤙꤢꤧꤓꤛꤢ꤬ ꤘꤣ ꤢ꤬ꤡꤣ꤬ꤡꤣ꤬ (GAT)

VCE VM ꤜꤤ꤬ꤙꤢ꤬ꤤ꤬ꤞꤝꤥ

ꤠꤢ꤭ VCE ꤞꤝꤥ꤬ꤜꤤ꤬ꤟꤥ꤭ꤖꤢꤨ ꤒꤟꤢꤧ꤬ꤐꤟꤢꤨ꤭ꤊꤜꤛꤢꤊꤜꤥ꤭